Urban News

தினமலர்                12.08.2013

ரூ. 20 கோடியில் மாநகராட்சி மின் சேமிப்பு திட்டம்! விரிவாக்கப்பகுதியில் விரைவில் அறிமுகம்

கோவை:கோவை மாநகராட்சி இணைப்பு பகுதிகளில், மின் சக்தி சேமிப்பு திறனுள்ள மின் விளக்குகளை பொருத்தி, 10 ஆண்டுகளுக்கு பராமரிக்கவும், மின்சக்தியை சேமிக்கவும் திட்டமிடப்பட்டுள்ளது. ஒருங்கிணைந்த நகர்ப்புற மேம்பாட்டு திட்டம் மற்றும் பொதுநிதியில் இதற்காக 20 கோடி ரூபாய் ஒதுக்கப்பட்டுள்ளது.

கோவை மாநகராட்சியின் பழைய 72 வார்டுகளில் (தற்போதைய 60 வார்டு) 41 ஆயிரத்து 500 தெருவிளக்குகளும், இணைப்பு பகுதிகளில் (தற்போதைய 40 வார்டு) 29 ஆயிரத்து 200 தெருவிளக்குகளும் உள்ளன. சோடியம் லைட், ஐமேக் லைட், டியூப் லைட்டுகள் உள்ளன.

தெருவிளக்கு மின் பயன்பாட்டுக்காக மாதம் 90 லட்சம் ரூபாய் வரையிலும் மாநகராட்சி நிர்வாகம் செலவிடுகிறது. இதுதவிர, தெருவிளக்கு மின்கம்பங்கள், தெருவிளக்குகள் பராமரிப்புக்கு தனியாக நிதி ஒதுக்கப்படுகிறது.

மின் சக்தியை சிக்கனப்படுத்த, குறைந்த மின் சக்தியில் அதிக ஒளி கொடுக்கக்கூடிய தெருவிளக்குகளை பொருத்த மாநகராட்சி நிர்வாகத்துக்கு அரசு உத்தரவிட்டுள்ளது.

கோவையில் 2010ல், உலகத் தமிழ்ச் செம்மொழி மாநாடு நடந்தபோது, மாநகராட்சி பகுதியிலுள்ள முக்கிய ரோடுகளில் மின் சக்தி சேமிப்பு திறனுள்ள விளக்குகள் பொருத்தப்பட்டன. அவிநாசி ரோடு, திருச்சி ரோடு, உக்கடம் பைபாஸ் ரோடு, புதிதாக மேம்படுத்தப்பட்ட திட்டச்சாலை, இணைப்பு சாலைகளில் மின்சக்தி சேமிப்பு விளக்குகள் பொருத்தப்பட்டு பயன்பாட்டில் உள்ளது.

மாநகராட்சி பழைய வார்டுகளில் மின் சக்தி சேமிப்பு விளக்குகள் மாற்றப்பட்டு வருகின்றன.

இந்நிலையில், மாநகராட்சி இணைப்பு பகுதிகளில் தெருவிளக்குகளை முறைப்படுத்தவும், மின் சக்தி சேமிப்பு விளக்குகள் பொருத்தவும்மாநகராட்சி நிர்வாகம் முடிவு செய்தது.

ஒருங்கிணைந்த நகர்ப்புற மேம்பாட்டு திட்டம் மற்றும் பொதுநிதியில் இதற்காக 20 கோடி ரூபாய் ஒதுக்கப்பட்டுள்ளது. இத்திட்டத்திற்கான டெண்டர் கோரப்பட்டது. டில்லியை சேர்ந்த நிறுவனத்தின் டெண்டர் ஏற்றுக்கொள்ளப்பட்டுள்ளது.

"மாநகராட்சி இணைப்பு பகுதிகளில் இந்நிறுவனம் நான்கு மாதங்களுக்கு நேராய்வு தணிக்கை செய்ய வேண்டும். எந்தெந்த பகுதியில் கூடுதலாக தெருவிளக்கு கம்பம் அமைக்க வேண்டும்; சோடியம் லைட்டுகளை மாற்றி அமைக்க வேண்டும்; தேவையற்ற இடங்களில் உள்ள தெருவிளக்குகளை அகற்ற வேண்டும்' என, அறிக்கை கொடுக்க உத்தரவிடப்பட்டது.

இப்பணிகள் முடிந்ததும், தற்போதுள்ள தெருவிளக்குகளுக்கு பதிலாக மின்சக்தி சேமிப்பு விளக்குகள் பொருத்தப்பட்டு, தேவையற்ற விளக்குகள் அகற்றப்படும்.

முதல் ஆண்டு பராமரிப்பில் 35 சதவீதம் மின் சக்தி சேமிக்கப்பட வேண்டும். இல்லாவிட்டால், இந்நிறுவனத்துடன் ஏற்படுத்தப்பட்ட ஒப்பந்தம் ரத்து செய்யப்படும் என்ற நிபந்தனையுடன் அனுமதி வழங்கப்பட்டுள்ளது.

35 சதவீத மின்சக்தி சேமிப்பு

மேயர் வேலுசாமி கூறுகையில், ""மாநகராட்சியுடன் இணைப்பட்ட பகுதிகளில், தெருவிளக்கு மின் சக்தி செலவுக்காக ஆண்டுக்கு 4.97 கோடி ரூபாய் செலவிடப்படுகிறது. பராமரிப்பு செலவுக்காக ஆண்டுக்கு 1.50 கோடி ரூபாய் செலவாகிறது. மின் சக்தி சேமிப்பு விளக்குகள் பொருத்தினால், பராமரிப்பு செலவும் குறையும்.

மின் சக்தி சேமிப்பு விளக்குகள் பொருத்தும் திட்டத்திற்கு 20 கோடி ரூபாய் ஒதுக்கப்பட்டுள்ளது. ஒப்பந்தப்புள்ளி எடுத்துள்ள நிறுவனம் தணிக்கை அறிக்கை தயாரிக்க 41.48 லட்சம் ரூபாய் கேட்டுள்ளது. டிசம்பருக்குள் தணிக்கை பணி முடிந்து, மின் சக்தி சேமிப்பு விளக்கு பொருத்தப்படுகிறது. ஓராண்டில் இப்பணி நிறைவு செய்யப்படும். இதன் மூலம் 35 சதவீதம் மின் சக்தி சேமிக்கப்படும்,'' என்றார்.

தினகரன்              05.08.2013

மாநகராட்சி பகுதி வளர்ச்சிக்காக ரூ23.76 கோடியில் புது திட்டம்

ஈரோடு, : ஈரோடு மாநகராட்சியில் ஒருங்கிணைந்த நகர்ப்புற மேம்பாட்டு இயக்கம் சார்பில் 23 கோடியே 76 லட்சம் ரூபாய் மதிப்பீட்டில் பல்வேறு வளர்ச்சி திட்டப்பணிகளை மேற்கொள்ள திட்டமிடப்பட்டுள்ளது.

ஈரோடு மாநகராட்சியில் ஒருங்கிணைந்த நகர்ப்புற மேம்பாட்டு இயக்கம் மூலமாக 2013-14ம் ஆண்டில் திடக்கழிவு மேலாண்மை, சாலைகள் சீரமைத்தல், மழைநீர் வடிகால் கட்டுதல், தெருவிளக்குகள் பராமரித்தல், பாலங்கள் கட்டுதல் போன்ற பணிகள் ரூ.23 கோடியே 76 லட்சம் மதிப்பீட்டில் மேற்கொள்ளப்படவுள்ளது.

அதன்படி வெண்டிபாளையம் உரக்கிடங்கு ரூ.6 கோடியே 60 லட்சம் மதிப்பீட்டில் மேம்படுத்தப்படவுள்ளது. சாலைகள் சீரமைப்பு திட்டத்தில் ஜவுளிநகர் மெயின்ரோடு மற்றும் குறுக்கு சாலைகளில் ஒரு கி.மீட்டர் தூரம் ரூ.68.20 லட்சம் ரூபாய் மதிப்பீட்டிலும், மாணிக்கம்பாளையம் வீட்டுவசதி வாரிய குடியிருப்பு பகுதியில் ரூ.50 லட்சம் ரூபாய் மதிப்பீட்டிலும் தார்ச் சாலைகள் அமைக்கப்படவுள்ளது.

மழைநீர் வடிகால் கட்டுதல் திட்டத்தில் சி.எம்.நகர், அம்பேத்கர் நகர், சொட்டையம்பாளையம் மெயின்ரோட்டில் இருந்து சத்தி ரோடு வரை, பாலக்காட்டூர், எஸ்.எஸ்.பி. பள்ளி முதல் பெருமாள்மலை வரை, மங்கலத்துறை சந்திப்பில் இருந்து ஜவுளிநகர் வரை, சிந்தன்நகர், தென்றல்நகர், இபிபி நகர், மாணிக்கம்பாளையம் ஹவுசிங் யூனிட், பண்ணை நகர், அணைக்கட்டு பகுதி, பெரியார்நகர், முத்துசாமி காலனி, மரப்பாலம் உள்ளிட்ட பல்வேறு பகுதிகளில் 31 இடங்களில் 20 கி.மீட்டர் தூரம் ரூ.9 கோடியே 2 லட்சத்து 80 ஆயிரம் மதிப்பீட்டில் மழைநீர் வடிகால் அமைக்கப்படவுள்ளது.

மேலும் தெருவிளக்குகள் 4 கோடி ரூபாய் மதிப்பீட்டில் அமைக்கப்படவுள்ளது. காசிபாளையம் மலைக்கோவில் பகுதியிலும், பெரும்பள்ளம் அண்ணாடெக்ஸ் பகுதியிலும், கட்டபொம்மன் வீதியிலும் என 3 இடங்களில் 2 கோடியே 95 லட்சம் ரூபாய் மதிப்பீட்டில் பாலங்கள் கட்டப்படவுள்ளது. இந்த ஆண்டு 23 கோடியே 73 லட்ச ரூபாய் மதிப்பீட்டில் பணிகளை மேற்கொள்ள திட்டமிடப்பட்டுள்ளது.

 இதுகுறித்து மேயர் மல்லிகா பரமசிவம் கூறியதாவது: ஒருங்கிணைந்த நகர்ப்புற மேம்பாட்டு இயக்கத்தின் மூலமாக எந்தெந்த வார்டுகளில் என்னென்ன பணிகளை செய்ய வேண்டும் என்பது குறித்து ஆய்வு செய்யப்பட்டு திட்ட அறிக்கை தயாரிக்கப்பட்டுள்ளது. அதிக இடங்களில் மழைநீர் வடிகால் கட்டப்படவுள்ளது.

இதற்கு தேவைப்படும் நிதி குறித்து அரசுக்கு அறிக்கை அனுப்பப்பட்டுள்ளது. அரசு நிதி ஒதுக்கீடு போக மீதமுள்ள தொகையை மாநகராட்சி பொது நிதியில் இருந்து மேற்கொள்ள திட்டமிடப்பட்டுள்ளது. அரசிடமிருந்து அனுமதி பெற்ற பிறகு பணிகள் தொடங்கப்படும். இவ்வாறு மேயர் தெரிவித்துள்ளார்.