Nagara Seithigal - Road Development

தெற்குப்பாளையத்தில் தார்ச் சாலை அமைக்க பூமிபூஜை

Tuesday, 24 September 2013 12:11 administrator நாளிதழ்௧ள் - சாலை௧ள் மேம்பாடு

தினமணி 24.09.2013

தெற்குப்பாளையத்தில் தார்ச் சாலை அமைக்க பூமிபூஜை

பெரியநாயக்கன்பாளையம் அருகே, கூடலூர் கவுண்டம்பாளையம் பேரூராட்சிக்குட்பட்ட தெற்குப்பாளையத்தில் புதிய தார்ச் சாலை அமைப்பதற்கான பூமிபூஜை திங்கள்கிழமை நடைபெற்றது.

இங்குள்ள 13-ஆவது வார்டுக்குட்பட்ட காந்தி நகரில் பேரூராட்சி பொது நிதியின் கீழ் ரூ.6.20 லட்சம் செலவில் புதிய தார்ச் சாலை அமைக்க தீர்மானம் நிறைவேற்றப்பட்டது. இதையடுத்து, திங்கள்கிழமை நடைபெற்ற தார்ச் சாலை அமைக்கும் பணிக்கான பூமிபூஜை நிகழ்ச்சிக்கு பேரூராட்சித் தலைவர் அ.அறிவரசு தலைமை வகித்து பணியைத் தொடங்கி வைத்தார். பேரூராட்சித் துணைத் தலைவர் ஆர்.செல்வராஜன், வார்டு கவுன்சிலர் மோகன்தாஸ் ஆகியோர் முன்னிலை வகித்தனர்.

இதில், ஊர்க்கவுண்டர் கிட்டுசாமி, கவுன்சிலர்கள் ஜெயராஜ், கவிதா துரைராஜ், முருகானந்தம், காந்தி நகர் குடியிருப்போர் சங்க நிர்வாகிகள், மகளிர் குழு நிர்வாகிகள், பேரூராட்சி பொறியியல் உதவியாளர் ராஜேந்திரன் உள்ளிட்டோர் கலந்து கொண்டனர்.

நீலாங்கரையில் ரூ. 8.66 கோடியில் சாலைப் பணிகள் தொடக்கம்

Tuesday, 24 September 2013 12:04 administrator நாளிதழ்௧ள் - சாலை௧ள் மேம்பாடு

தினமணி 24.09.2013

சென்னை நீலாங்கரையில் ரூ. 8.66 கோடி மதிப்பில் 118 சாலைகள் அமைக்கும் பணிகள் திங்கள்கிழமை தொடங்கப்பட்டுள்ளது.

இது குறித்து மாநகராட்சி வெளியிட்ட செய்திக் குறிப்பு: நீலாங்கரை (வார்டு 192) பகுதியில் ரூ. 8.66 கோடியில் 118 சாலைகள் அமைக்கும் பணிகளை தமிழக கால்நடை பராமரிப்புத் துறை அமைச்சர் டி.கே.எம். சின்னையா, மேயர் சைதை துரைசாமி ஆகியோர் தொடங்கி வைத்தனர்.

மேலும் நீலாங்கரையில் ரூ. 14 லட்சம் மதிப்பில் கட்டப்பட்ட தொழிலாளர் குடியிருப்பு பூங்காவையும் அவர்கள் திறந்து வைத்தனர்.

பின்னர் தரமணி மத்திய பல்தொழில்நுட்ப வளாகத்தில் ரூ. 97.60 லட்சம் மதிப்பில் 600 மீட்டர் நீளமுள்ள 2 சாலைகளை சீரமைக்கும் பணியையும் மேயர் தொடங்கி வைத்தார் என்று அந்த செய்திக் குறிப்பில் தெரிவிக்கப்பட்டுள்ளது.

ரூ.3.4 கோடியில் சி.பி.டி.,வளாக சாலை பணி துவக்கம் மாநகராட்சி நடவடிக்கை

Tuesday, 24 September 2013 12:03 administrator நாளிதழ்௧ள் - சாலை௧ள் மேம்பாடு

தினமலர் 24.09.2013

ரூ.3.4 கோடியில் சி.பி.டி.,வளாக சாலை பணி துவக்கம் மாநகராட்சி நடவடிக்கை

தரமணி: தரமணி சி.பி.டி.,வளாகத்தில் உள்ள சாலைகளை சீரமைப்பதற்காக, நேற்று பூமி பூஜை நடந்தது.

தரமணி, கானகம், களிக்குன்றம், பள்ளிப்பட்டு ஆகிய பகுதிகளை சேர்ந்த பல்லாயிரக்கணக்கானோர் பயன்படுத்தும் சி.பி.டி., வளாக நான்காவது சாலை போக்குவரத்திற்கு லாயக்கற்று காணப்பட்டது.

இதுகுறித்து பகுதி வாசிகள் சம்பந்தப்பட்ட துறை அதிகாரிகளிடம் பலமுறை புகார் கொடுத்தும் நடவடிக்கை எடுக்கப்படவில்லை.

கடந்த மாதம் ஜனாதிபதி வருகையை முன்னிட்டு, சி.பி.டி.,வளாக மூன்றாவது சாலை மட்டும் அமைக்கப்பட்டது. பொதுமக்கள் அதிகம் பயன்படுத்தும் நான்காவது சாலை கண்டுகொள்ளாமல் விடப்பட்டதால், பகுதிவாசிகள் அதிருப்தியடைந்தனர்.

இதுகுறித்து ‘தினமலர்’ நாளிதழ் படத்துடன் கூடிய விரிவான செய்தியை வெளியிட்டது. செய்தி வெளியான அன்று மாநகராட்சி கமிஷனர் விக்ரம்கபூர் சம்பவ இடத்திற்கு சென்று ஆய்வு மேற்கொண்டார்.

அப்போது, அவர் கூறுகையில்,‘‘சி.பி.டி., வளாக சாலைகள் அனைத்தும் தொழில்நுட்ப கல்வித்துறை கட்டுப்பாட்டில் உள்ளன. அவற்றை சீரமைக்க அந்த துறையிடம் அனுமதி கோரப்பட்டுள்ளது,’’ என்றார்.

ஆனால், அன்றே சி.பி.டி.,வளாக சாலைகள் அமைக்க சம்பந்தப்பட்ட துறை கமிஷனர், மாநகராட்சிக்கு அனுமதியளித்தார். இதையடுத்து, திட்ட மதிப்பீடு தயாரிக்கப்பட்டு ஒப்பந்தம் கோரப்பட்டது.

இந்த நிலையில், சி.பி.டி., நகரில் உள்ள சாலைகள் அனைத்தும் எட்டு பகுதிகளாக பிரிக்கப்பட்டு 3.4 கோடி ரூபாய் மதிப்பில் சாலைகள் அமைப்பதற்கான பூமி பூஜை நேற்று நடந்தது. நிகழ்ச்சியில் மேயர் சைதை துரைசாமி, எம்.எல்.ஏ., அசோக், மண்டலக் குழு தலைவர் முருகன் உள்ளிட்டோர் பங்கேற்றனர்.