Urban News

தினமணி           08.03.2013

கிழக்கு தில்லி மாநகராட்சியில் இலவச உதவி தொலைபேசி சேவை

கிழக்கு தில்லி மாநகராட்சியில் புகார்களை எளிதில் தெரிவிக்கும் வகையில் இலவச உதவி தொலைபேசி சேவையை மாநகராட்சி மேயர் அன்னபூர்ணா மிஸ்ரா வியாழக்கிழமை தொடங்கி வைத்தார்.

இது தொடர்பாக கிழக்கு தில்லி மாநகராட்சி வியாழக்கிழமை வெளியிட்ட செய்திக்குறிப்பு:

மாநகராட்சி சேவைகள் தொடர்பான புகார்களைத் தெரிவிக்கவும், மாநகராட்சியின் திட்டங்கள் குறித்து அறிந்து கொள்ளும் வகையிலும் இலவச உதவி தொலைபேசி சேவை தொடங்கப்பட்டுள்ளது.  இந்த தொலைபேசி எண் 155303.

இந்த சேவைக்கான அலுவலகம் கிழக்கு தில்லி மாநகராட்சித் தலைமை அலுவலகமான உத்யோக் சதனில் செயல்படும். இந்த தொலைபேசி எண்ணில் காலை 6 மணி முதல் இரவு 10 மணி வரை தொடர்பு கொள்ளலாம்.

இந்த சேவையை விரைவில் 24 மணி நேரமும் நீட்டிக்க திட்டமிடப்பட்டுள்ளது.

இந்த தொலைபேசி மூலம் தெரிவிக்கப்படும் புகார்கள் சம்பந்தப்பட்ட துறை அதிகாரிகளுக்கு அனுப்பி வைக்கப்படும். அளிக்கப்படும் புகார்களுக்கு உரிய நடவடிக்கை எடுக்கப்படுகிறதா என்பதும் கண்காணிக்கப்படும்.

குப்பைகள் அள்ள 30 புதிய லாரிகள்: கிழக்கு தில்லி மாநகராட்சியை மேலும் தூய்மையாக வைக்க,குப்பைகளை அள்ள 30 புதிய லாரிகளின் சேவையை அன்னப்பூர்ணா மிஸ்ரா கர்கர்டோமாவில் வியாழக்கிழமை தொடங்கி வைத்தார்.

நிகழ்ச்சியில் பேசிய அவர், ""குப்பைகள் அள்ளப்பட்டு, காஜிப்பூருக்கு எடுத்து செல்ல இந்த லாரிகள் பயன்படுத்தப்படும்'' என்றார்.

தின மணி           27.02.2013

தொடுதிரை கணினி அமைக்க கோரிக்கை

ராமநாதபுரம் மாவட்டம் கீழக்கரை நகராட்சியில் தொடுதிரை கணினி அமைக்க வேண்டும் என பொதுமக்கள் கோரிக்கை விடுத்துள்ளனர்.

கீழக்கரை நகராட்சியில் சொத்து வரி, தண்ணீர் வரி, நகராட்சிக்குச் சொந்தமான கடை வாடகை, தொழில் வரி உள்ளிட்ட விபரங்கள் அறிவதற்கு மக்கள் நகராட்சியில் காத்துக் கிடக்கும் சூழ்நிலை உள்ளது. இந்த விபரங்களை விரைவாக அறிந்து கொள்வதற்கு தமிழகத்தில் பல்வேறு அரசு அலுவலகங்களில் பொதுமக்கள் வசதிக்காக தொடுதிரை கணினி அமைக்கப்பட்டுள்ளது. இதுபோன்ற தொடுதிரை கணினியை கீழக்கரை நகராட்சி அலுவலகத்திலும் அமைக்க வேண்டும். இதனால் பொதுமக்களுக்கு சிரமமும், அலுவலர்களின் பணிச்சுமையும் குறையும்.   இதுகுறித்து நகர் காங்கிரஸ் தலைவர் ஹமீதுகான் கூறுகையில், ஏற்கெனவே காரைக்குடி,சிவகங்கை போன்ற நகராட்சி அலுவலகங்களில் தொடுதிரை கணினி அமைக்கப்பட்டுள்ளது. இதன்மூலம் பொது மக்கள் பலன் அடைந்து வருகின்றனர். நகராட்சி கணினியில் உள்ள தகவல்களை அப்படியே தொடுதிரை கணினிக்கு மாற்றம் செய்வது தற்போதய கணினி உலகத்தில் மிகவும் எளிதாகும். எனவே கீழக்கரை நகராட்சி நிர்வாகம் அலுவலக  வளாகத்தில் தொடுதிரை கணினி அமைக்க வேண்டும் என்றார்.