Urban News

புதுடில்லி:நம் நாட்டில் தகவல் தொடர்பு வளர்ந்த அளவுக்கு, சுகாதார வசதிகள் மேம்படவில்லை என ஐ.நா., அறிக்கையில் கூறப்பட்டுள் ளது.ஐக்கிய நாடுகளின் சுற்றுச்சூழல் மற்றும் சுகாதார கல்வி அமைப்பின் இயக்குனர் ஜாபர் அடில், இது குறித்து அறிக்கையில் கூறியுள்ளதாவது:கடந்த 2001ல் இந்தியாவில், 1 சதவீதத்தினரிடம் கூட மொபைல் போன் இல்லை. தற்போது, 45 சதவீதம் பேரிடம் மொபைல் போன் உள்ளது. அந்த அளவுக்கு தகவல் தொடர்பு புரட்சி ஏற்பட்டுள்ளது.

ஆனால், இந்த நாட்டின் சுகாதாரத்தை ஒப்பிடுகையில், 31 சதவீதம் பேருக்கு மட்டுமே கழிவறை வசதி உள்ளது. மற்றவர்கள் திறந்தவெளியில் தான் இயற்கை உபாதைகளை கழிக்க வேண்டிய நிலையில் உள்ளனர்.வரும் 2015ம் ஆண்டுக்குள், இந்தியாவில் 100 சதவீதம் பேருக்கு கழிவறை வசதி கிடைக்க இலக்கு நிர்ணயிக்கப்பட்டது. ஆனால், தற்போதுள்ள சூழ்நிலையில் அது முடியாத காரியமாக உள்ளது.

ஒரு கழிவறை கட்ட, குறைந்தபட்சம் 15 ஆயிரம் ரூபாய் செலவாகிறது. எனவே, 2015ம் ஆண்டுக்குள், 50 சதவீதம் பேருக்காவது கழிவறை வசதியை ஏற்படுத்தி தர வேண்டும் என, முடிவு செய்யப்பட் டுள்ளது. 2025ம் ஆண்டுக்குள், அனைவருக்கும் கழிவறை கட்டும் வகையில் இலக்கு நிர்ணயிக்கப்பட்டுள்ளது.இவ்வாறு ஜாபர் அடில் அறிக்கையில் கூறியுள்ளார்.

பெங்களூர், ஏப்.12: தோட்ட விளைபொருள்களை விற்பனை செய்ய தலா ரூ.100 கோடி செலவில் கோலார் உள்பட 4 நகரங்களில் "மெகா சந்தைகள்' கட்டப்படும் என்று தோட்டக்கலைத் துறை மற்றும் சிறைத்துறை அமைச்சர் உமேஷ் கத்தி தெரிவித்தார்.

அவர் திங்கள்கிழமை அளித்த பேட்டி: தோட்ட விளைபொருள்களை விற்பனை செய்ய மாவட்டம்தோறும் சந்தைகள் அமைக்கும் திட்டத்தை அரசு மேற்கொண்டு வருகிறது. இதன்மூலம் விவசாயிகள் விளைவித்த தோட்ட விளை பொருள்களை விற்பனை செய்ய நல்ல வாய்ப்பு கிடைக்கும். சரியான விலையும் கிடைக்கும்.

தோட்டக்கலைத் துறையை மேம்படுத்த தேசிய தோட்டக்கலைத் துறை மிஷன் ரூ.110 கோடியை கர்நாடகத்துக்கு ஒதுக்கியுள்ளது. இதன்மூலம் தோட்டக்கலைத் துறையை மேம்படுத்த நடவடிக்கை எடுக்கப்படும்.

தற்போது தோட்ட விளைபொருள்கள் ஆண்டுக்கு 15 லட்சம் டன் உற்பத்தி செய்யப்படுகிறது. இதை 21 லட்சம் டன்னாக அதிகரிக்கத் திட்டமிடப்பட்டுள்ளது. இதற்காக விவசாயிகளுக்கு தரமான விதை, பூச்சி மருந்துகள் வழங்கப்படும்.

விளைபொருள்களை சந்தைப்படுத்துதல் மிகவும் முக்கியமாகும். இதற்காக கோலார்,பெல்காம், மைசூர் மற்றும் ஹாசன் ஆகிய நான்கு நகரங்களில் 4 மெகா சந்தைகள் கட்டத் திட்டமிடப்பட்டுள்ளது.

இந்த சந்தையில் விவசாயிகளுக்குத் தேவையான அனைத்து வசதிகளும் செய்து கொடுக்கப்படும். இந்த மெகா சந்தை ஒவ்வொன்றும் தலா ரூ.100 கோடி செலவில் கட்டப்படும். விவசாயிகளிடம் தோட்ட விளைபொருள்களை பெங்களூரில் உள்ள ஹாப்காம்ஸ் போன்ற அமைப்பு மூலம் கொள்முதல் செய்து அவை மெகா மார்க்கெட்டுகளில் விற்பனை செய்யப்படும்.

இதனால் இடைத்தரகர்கள் இல்லாமல் விவசாயிகளுக்கு சரியான விலையும், நுகர்வோருக்கு சரியான விலையில் தரமான பொருள்களும் கிடைக்க வாய்ப்பு ஏற்படும் என்றார் அவர்.