Nagara Seithigal - Slum Development / Housing

ரூ.1.58 கோடி பெற்று ஊழியர் குடியிருப்பை "தத்தெடுத்த' மாநகராட்சி

Wednesday, 24 July 2013 08:16 administrator நாளிதழ்௧ள் - குடிசைப்பகுதி மேம்பாடு / வீட்டு வசதி

தினமலர் 24.07.2013

ரூ.1.58 கோடி பெற்று ஊழியர் குடியிருப்பை "தத்தெடுத்த' மாநகராட்சி

மதுரை:வீட்டுவசதிவாரியம் ரூ. 1.58 கோடி செலுத்தியதால், ரேஸ்கோர்ஸ், டி.ஆர்.ஓ., காலனி, டீன்ஸ் குடியிருப்பு பகுதிகளை, மதுரை மாநகராட்சி பராமரிக்க எடுத்துக் கொண்டது.

இப்பகுதிகளில் அடுக்குமாடி கட்டடங்களில் ஆயிரக்கணக்கான வீடுகள் உள்ளன. இதில், பெரும்பாலும் அரசு ஊழியர்கள் வசிக்கின்றனர். வீட்டுவசதி வாரியம் பராமரிப்பில் இருந்த இவ்வீடுகள், மோசமான நிலையில் இருப்பதுடன், ரோடு, தெருவிளக்கு, சாக்கடை, குப்பை, குடிநீர், பாதுகாப்பு என அடிப்படை வசதிகள் எதுவும் இல்லை.

அடிப்படை வசதியை சரிசெய்யும்படி மனுகொடுத்தால், வீட்டுவசதி வாரியமும், மாநகராட்சியும், "இது எங்கள் பொறுப்பில் இல்லை' எனக்கூறி, தட்டிக் கழித்துவிடுகின்றன. இதனால் மேம்பாட்டுப் பணிகள் நடக்கவில்லை. இந்நிலையில், வீட்டுவசதி வாரியத்திடம் இருந்து, மாநகராட்சிக்கு இந்தப் பகுதிகளை ஒப்படைக்க முடிவு செய்யப்பட்டது.

கட்டடங்கள் அளவு அடிப்படையில் ரூ. ஒரு கோடியே 58 லட்சத்து 71 ஆயிரத்து 200ஐ, வீட்டுவசதி வாரிய செயற்பொறியாளர் சாலமன்ஜெயகுமார், மாநகராட்சிக்கு வழங்கினார். இதையடுத்து, இப் பகுதிகள் மாநகராட்சியின் கட்டுப்பாட்டில் வந்தன. இனி இப்பகுதிகளின் அடிப்படை வசதிகளை மாநகராட்சியே பராமரிக்கும்.

குறைந்த வருவாய் பிரிவினருக்கு 900 வீடுகள் ஒதுக்கீடு வீட்டுவசதி வாரியம் முடிவு

Thursday, 18 July 2013 07:05 administrator நாளிதழ்௧ள் - குடிசைப்பகுதி மேம்பாடு / வீட்டு வசதி

தினமலர் 18.07.2013

குறைந்த வருவாய் பிரிவினருக்கு 900 வீடுகள் ஒதுக்கீடு வீட்டுவசதி வாரியம் முடிவு

சென்னை சோழிங்கல்லுாரில், பிரிபேப் தொழில் நுட்பத்தை பயன்படுத்தி, 1,500 வீடுகள் கட்டும் திட்டத்தில், 900 வீடுகளை, குறைந்த வருவாய் பிரிவினருக்கு ஒதுக்க, வீட்டுவசதி வாரியம் முடிவு செய்துள்ளது.

ஆட்சேபம் சோழிங்கல்லுாரில், பிரி பேப்எனப்படும், முன் தயாரிப்பு கட்டுமான தொழில்நுட்பத்தை பயன்படுத்தி, 1,500 வீடுகள் கொண்ட புதிய அடுக்குமாடி குடியிருப்பு கட்டப்படும் என, முதல்வர் ஜெயலலிதா, சட்டசபையில் அறிவித்தார்.

இதற்காக தேர்வு செய்யப்பட்ட நிலங்கள், தனியார் வீட்டு மனைகளாக இருந்தவை. இதை புதிய திட்டத்துக்கு பயன்படுத்த ஆட்சேபம் தெரிவித்து, நிலத்தை இழந்தோர் இழப்பீட்டுத் தொகை பெறாமல் உள்ளனர்.

இருப்பினும், இந்த திட்டத்துக்கான நிர்வாக ஒப்புதல், கடந்த மாதம் நடந்த வாரிய நிர்வாக குழு கூட்டத்தில்
வழங்கப்பட்டது.

இதை அடுத்து, ‘பிரி பேப்’ முறையில், அடுக்குமாடி குடியிருப்பு திட்டத்தை மேற்கொள்வதற்கான ஒப்பந்த புள்ளிகள் கோரப்பட்டு உள்ளன.

900 வீடுகள்

இதுகுறித்து வீட்டுவசதி வாரிய உயரதிகாரி ஒருவர் கூறியதாவது:

குறிப்பிட்ட சில மாற்றங்களுடன், 379 கோடி ரூபாயில், 10 மாடிகளுடன், 1,500 வீடுகள் கொண்ட இத்திட்டத்தில், ஒவ்வொன்றும், 1,076 சதுர அடி பரப்பளவில் மூன்று படுக்கையறை கொண்ட, 160 வீடுகள், உயர் வருவாய் பிரிவினருக்கு ஒதுக்கப்படும்.

இரண்டு படுக்கை அறையுடன், 700 சதுர அடி பரப்பளவில், 440 வீடுகள் நடுத்தர வருவாய் பிரிவினருக்கு ஒதுக்கப்படும்.

இதற்கு அடுத்தபடியாக, ஒற்றை படுக்கையறையுடன், ஒவ்வொன்றும், 484 சதுர அடி பரப்பளவில், 900 வீடுகள், குறைந்த வருவாய் பிரிவினருக்கு ஒதுக்கப்படும். மற்ற திட்டங்களை காட்டிலும், குறைந்த வருவாய் பிரிவினருக்கு அதிக வீடுகள் கிடைக்கும் வகையில் இந்த திட்டம் வடிவமைக்கப்பட்டு உள்ளது.

வசதிகள்

குறைந்த வருவாய் பிரிவினருக்கான வீடுகளில் ஒவ்வொரு படுக்கை அறையும் ‘பால்கனி’ வசதியுடன் வடிவமைக்கப்படுவது, இதன் இன்னொரு சிறப்பு அம்சம். மேலும், தரைதளத்துடன் முதல் தளம் கொண்டதாக, 2,000 சதுர மீட்டரில் பொது பயன்பாட்டு வளாகம் இக்குடியிருப்பில் அமைக்கப்படும்.

இத்திட்டத்துக்கான வடிவமைப்புகளை உருவாக்குவது மற்றும் கட்டுமான பணிகளை மேற்கொள்வதற்கான ஒப்பந்த புள்ளிகள் கோரப்பட்டுள்ளன. அடுத்த ஒரு மாதத்துக்குள், ஒப்பந்ததாரரை தேர்வு செய்யும் பணிகள் முடிக்கப்படும். இவ்வாறு அவர் கூறினார்.

குடிசைகளை கான்கிரீட் வீடாக்க வாய்ப்பு

Thursday, 11 July 2013 11:43 administrator நாளிதழ்௧ள் - குடிசைப்பகுதி மேம்பாடு / வீட்டு வசதி

தினமணி 11.07.2013

கோவை மாநகராட்சிப் பகுதியில் குடிசை மற்றும் ஓட்டு வீடுகளை கான்கிரீட் வீடுகளாக மாற்ற விண்ணப்பம் பெறுவதற்கான சிறப்பு முகாம் வரும் 15-ஆம் தேதி நடைபெறுகிறது.

இது தொடர்பாக மாநகராட்சி ஆணையர் க.லதா புதன்கிழமை வெளியிட்ட செய்தி:

கோவை மாநகராட்சியால் செயல்படுத்தப்படும் ஜவஹர்லால் நேரு தேசிய நகர்ப்புற புனரமைப்புத் திட்டத்தின் கீழ் மாநகராட்சி எல்லைக்கு உள்பட்ட பகுதிகளில் குடிசைகள் மற்றும் ஓட்டு வீடுகளை கான்கிரீட் வீடுகளாக மாற்றுவதற்குத் திட்டமிடப்பட்டுள்ளது.

இதுவரை இத்திட்டத்தின் கீழ் பயனடையாதவர்கள் இந்த வாய்ப்பைப் பயன்படுத்திக் கொள்ளலாம்.

நிலத்தின் பட்டா மற்றும் பத்திர நகல், குடும்ப அட்டை நகல், வாக்காளர் அடையாள அட்டை நகல், பட்டாதாரர் இறந்திருந்தால் அவரது வாரிசுகளுக்கான சான்றிதழ்கள் ஆகியவற்றைக் கொண்டுவர வேண்டும்.

கிழக்கு மண்டல அலுவலகத்தில் வரும் 15-ஆம் தேதி, வடக்கில் 16, தெற்கில் 17, மேற்கில் 18, மத்திய மண்டல அலுவலகத்தில் வரும் 19-ஆம் தேதிகளில் முகாம் நடைபெற உள்ளது.

மேற்கண்ட முகாம்களில் மக்கள் பங்கேற்று விண்ணப்பத்தைப் பூர்த்தி செய்து மத்திய, மாநில அரசின் மானியங்களைப் பெற்று குடிசைகள் மற்றும் ஓட்டு வீடுகளை கான்கிரீட் வீடுகளாக மாற்றிக் கொள்ளலாம்.

More Articles...