Urban News

சென்னை, செப். 8: ""கொடுங்கையூர் குப்பை கொட்டும் வளாகத்தில் கொட்டப்பட்டிருக்கும் பல லட்சம் டன் குப்பைகளிலிருந்து மின்சாரம், உரம் தயாரிக்கும் பணி விரைவில் தொடங்கப்படும்'' என மேயர் மா. சுப்பிரமணியன் தெரிவித்தார்.

சென்னை கொடுங்கையூர் ராஜரத்தினம் நகரில் அமைந்துள்ள மாநகராட்சி தொடக்கப் பள்ளியில், ஆதரவற்ற சிறுவர்களுக்கான இரவுக் காப்பகம் செவ்வாய்க்கிழமை தொடங்கி வைக்கப்பட்டது. இதில் மேயர் மா. சுப்பிரமணியன் பேசியது:

இந்தியாவிலேயே முதன் முறையாக சென்னையில் ஆதரவற்ற குழந்தைகளுக்கான இரவுக் காப்பகம் தொடங்கப்பட்டுள்ளது. ரூ. 10.45 லட்சம் செலவில் இந்த மாநகராட்சி தொடக்கப்பள்ளி மேம்படுத்தப்பட்டு, அதன் மேல்புறம் நான்கு அறைகள் கொண்ட இரவுக் காப்பகம் கட்டப்பட்டுள்ளது.

குறிப்பாக கொடுங்கையூர் குப்பை வளாகத்தில் குப்பை பொறுக்கும் சிறுவர்கள், நடைபாதைகளில் உறங்கும் ஆதரவற்ற சிறுவர்களுக்கு ஆதரவு அளிப்பதற்காக இந்த காப்பகம் அமைக்கப்பட்டுள்ளது. யார் வேண்டுமானாலும் ஆதரவற்ற சிறுவர்களை இந்த காப்பகத்தில் சேர்த்துவிடலாம்.

இங்கு சேர்க்கப்படும் சிறார்களுக்கு மருத்துவ உதவிகள், விழிப்புணர்வு அளிக்கப்பட்டு, மெல்ல அவர்களை பள்ளியில் சேர்ப்பதற்கான நடவடிக்கைகள் எடுக்கப்படும்.

இந்த காப்பகத்தை பராமரிக்கும் பணிக்கான ஒப்பந்தம் "சமூக சேவைக்கான மெட்ராஸ் கிறிஸ்தவ கவுன்சில் (எம்.சி.சி.எஸ்.எஸ்.)' என்ற தனியார் தொண்டு நிறுவனத்துக்கு அளிக்கப்பட்டுள்ளது. இரண்டு ஆண்டுகள் இந்த நிறுவனம் காப்பகத்தை பராமரிக்கும். இதற்காக ரூ. 2 லட்சம் அந்த நிறுவனத்தக்கு அளிக்கப்பட்டுள்ளது.

கொடுங்கையூர் குப்பை கொட்டும் வளாகத்தில் தினமும் 3500 டன் குப்பைகள் கொட்டப்படுகின்றன. இதனால் தற்போது பல லட்சம் டன் குப்பைகள் அங்கு சேர்க்கப்பட்டுள்ளன.

இந்த குப்பைகளிலிருந்து மின்சாரம் மற்றும் உரம் தயாரிக்கும் பணிக்கான ரூ. 125 கோடி மதிப்பிலான ஒப்பந்தம் "டெரா ஃபார்மா பயோ டெக்னாலஜி' என்ற நிறுவனத்துக்கு விடப்பட்டுள்ளது. மாசு கட்டுப்பாட்டு வாரியத்தில் தடையில்லா சான்றிதழ் கிடைத்ததும், இந்தப் பணிகள் தொடங்கப்படும்.

போக்குவரத்து நெரிசலை குறைக்கும் வகையில் கொடுங்கையூரில் ரூ. 6.28 கோடி மதிப்பிலும், தங்கசாலை மணிக்கூண்டு அருகே ரூ. 23 கோடி மதிப்பிலும், கணேசபுரத்தில் ரூ. 61.70 கோடி மதிப்பிலும் மேம்பாலங்கள் அமைக்கப்பட உள்ளன என்றார்.

கோவை, ஆக.30: திடக்கழிவு மேலாண்மைக்கு புதிய தொழில்நுட்பங்கள் அதிகளவில் வரவேண்டும் என்று சர்வதேச கருத்தரங்கில் வலியுறுத்தப்பட்டது.

கோவை அண்ணா பல்கலைக்கழகத்தில் திடக்கழிவு மேலாண்மை குறித்த சர்வதேச கருத்தரங்கம் அண்மையில் நடைபெற்றது. துணைவேந்தர் ஆர்.ராதாகிருஷ்ணன் கருத்தரங்கைத் துவக்கி வைத்து ஆய்வுக் கட்டுரைகளை அடங்கிய சிடி-ஐ வெளியிட்டார்.

மும்பையில் உள்ள இந்திய திடக்கழிவு மேலாண்மை சங்கத்துடன் இணைந்து நடத்தப்பட்ட இக் கருத்தரங்கில் 102 ஆய்வுக் கட்டுரைகள் சமர்ப்பிக்கப்பட்டன.

மூன்று நாள்கள் நடந்த கருத்தரங்கின் நிறைவில் பல்வேறு பரிந்துரைகள் வழங்கப்பட்டன.

பூமி வெப்பமயமாவதற்கான பசுமைக் குடில் வாயுக்களை திடக்கழிவுகள் வெளியேற்றுகின்றன. மேலும் மண், நீர்நிலைகளை மாசுபடுத்தி பல்வேறு நோய்கள் வருவதற்கு காரணமாக அமைகின்றன. திடக்கழிவுகளை அப்புறப்படுத்துவதற்கு ஒருங்கிணைந்த மேலாண்மைத் திட்டம் உடனடி தேவையாக உள்ளது.

குப்பைகள் சேகரிப்பு, அவற்றைத் தரம்பிரிப்பது, சூழல் பாதிப்பு இல்லாமல் அப்புறப்படுத்துவது ஆகியவற்றில் விஞ்ஞான ரீதியான நடைமுறைகளைப் பின்பற்ற வேண்டும். திடக்கழிவுகளை முறையாக அப்புறப்படுத்தாததால் ஏற்படக் கூடிய சூழல் பாதிப்புகள் குறித்தும் மக்களுக்கு விழிப்புணர்வு ஏற்படுத்த வேண்டும். உள்ளாட்சி அமைப்புகள், அரசியல் தலைவர்களுக்கு இதில் முக்கியப் பங்கு உண்டு.

திடக்கழிவுகளை அப்புறப்படுத்த புதுமையான தொழில்நுட்பங்கள் அதிகளவில் வரவேண்டும். ஆனால், இத்துறையில் ஆராய்ச்சிகள் தற்போது போதுமானதாக இல்லை. மேலும் திடக்கழிவு மேலாண்மைக்கான பொது தகவல் மையம் அமைக்கப்பட வேண்டும். மருத்துவக் கழிவுகள், எலெக்ட்ரானிக் கழிவுகள் ஆகியவற்றை அப்புறப்படுத்த சிறப்புக் கவனம் எடுத்துக் கொள்வது அவசியம் என்பன உள்ளிட்ட பரிந்துரைகள் அளிக்கப்பட்டன.