Urban News

  • Increase font size
  • Default font size
  • Decrease font size
Nagara Seithigal - News Papers

ஆக்கிரமிப்பில் உள்ள திறந்தவெளி ஒதுக்கீட்டு நிலங்களை... கண்டுபிடி! கள ஆய்வுக்கு கிளம்புகின்றனர் மாநகராட்சி அதிகாரிகள்

Print PDF

தினமலர்          27.04.2017

ஆக்கிரமிப்பில் உள்ள திறந்தவெளி ஒதுக்கீட்டு நிலங்களை... கண்டுபிடி! கள ஆய்வுக்கு கிளம்புகின்றனர் மாநகராட்சி அதிகாரிகள்


சென்னை மாநகராட்சி விரிவாக்கப் பகுதிகளில், பூங்கா அமைப்பதற்காக ஒதுக்கப்பட்ட பல திறந்தவெளி ஒதுக்கீட்டு நிலங்கள் மாயமாகி இருப்பது தெரிய வந்துள்ளது. ஆக்கிரமிப்பின் பிடியில் சிக்கியுள்ள இந்த நிலங்களை, கள ஆய்வு செய்து கண்டுபிடிக்க, மாநகராட்சி கமிஷனர் உத்தரவிட்டு உள்ளார்.

சென்னை மாநகராட்சி, 2011ல், ஒன்பது நகராட்சிகள், எட்டு பேரூராட்சிகள், 25 ஊராட்சிகளை சேர்த்து, 426 சதுர கிலோ மீட்டராக விரிவாக்கம் செய்யப்பட்டது. இதன் மூலம் மாநகராட்சி, 15

மண்டலங்களாக பிரிக்கப்பட்டது.

கபளீகரம்

விரிவாக்கப் பகுதிகளை மட்டும் உள்ளடக்கி, திருவொற்றியூர், மணலி, மாதவரம், அம்பத்துார், வளசரவாக்கம், ஆலந்துார், பெருங்குடி, சோழிங்கநல்லுார் ஆகிய எட்டு மண்டலங்கள் உருவாக்கப்பட்டன. மாநகராட்சியுடன் இந்த பகுதிகள் இணைக்கப்பட்ட போது, அடிப்படை பணியாளர்கள், அரசுக்கு சொந்தமான ஆவணங்கள், பிறப்பு, இறப்பு பதிவுகள் என, அனைத்து ஆவணங்களும், மாநகராட்சி வசம் ஒப்படைக்க உத்தரவிடப்பட்டன.

ஆனால், முக்கிய ஆவணங்களில், பல வகைகள் இன்னும் மாநகராட்சி வசம், அந்தந்த மாவட்ட நிர்வாகங்கள் ஒப்படைக்காமல் உள்ளன. இவற்றில், அரசியல்வாதி களால் கபளீகரம் செய்யப்பட்டு வரும் திறந்தவெளி ஒதுக்கீட்டு நிலங்களும் ஒன்று. விரிவாக்கப் பகுதிகளில், பல புதிய மனைப்பிரிவுகளுக்கான திறந்தவெளி ஒதுக்கீட்டு நிலங்கள், இன்னும் மாநகராட்சி வசம் ஒப்படைக்கப்படாமல் உள்ளன.

மெத்தனம்

பழைய மனைப்பிரிவுகளுக்கு கூட, திறந்தவெளி ஒதுக்கீட்டு நிலங்களுக்கான உரிய ஆவணங்கள், மாநகராட்சி வசம் ஒப்படைக்கப்படவில்லை. பொதுநல சங்கங்களிடம் இருந்து, 'எங்கள் பகுதி திறந்தவெளி ஒதுக்கீட்டு நிலம், தனியார் ஆக்கிரமிப்பில் உள்ளது' என, தொடர்ந்து புகார்கள் வந்த வண்ணம் உள்ளன. இந்நிலையில், தற்போதைய மாநகராட்சி சிறப்பு அதிகாரியும், கமிஷனருமான கார்த்திகேயன், விரிவாக்கப் பகுதி திறந்தவெளி ஒதுக்கீட்டு நிலங்களை, கள ஆய்வு செய்து கண்டுபிடிக்க, மண்டல அளவில் ஊழியர்களுக்கு உத்தரவிட்டு உள்ளார்.

இம்மாத இறுதிக்குள், மண்டல வாரியாக, திறந்தவெளி ஒதுக்கீட்டு நிலங்களின் பட்டியல், சி.எம்.டி.ஏ., அளித்த நிலம், மாநகராட்சியிடம் உள்ள நிலம், நிலத்தின் தற்போதைய நிலை ஆகிய விபரங்களை அளிக்க உத்தரவிட்டு உள்ளார்.மொத்தம், 388 திறந்தவெளி ஒதுக்கீட்டு நிலங்கள், இதுவரை அடையாளம் காணப்பட்டு உள்ளதாகவும், இதில் இரு மண்டலங்களில் இருந்து மட்டும், முழு தகவல்கள், மாநகராட்சி கொடுக்கப்பட்டு இருப்பதாகவும் தெரிய வந்துள்ளது. மற்ற மண்டலங்களில், இது குறித்த விபரங்களை சேகரிப்பதில், ஊழியர்கள் மெத்தனம் காட்டி வருவதாக தெரிகிறது.

ஒத்துழைப்பு இல்லை

குறிப்பாக, பூங்கா துறை ஊழியர்கள், வார்டு பொறியாளர்களுடன் இணைந்து, திறந்தவெளி ஒதுக்கீட்டு நிலங்களை கள ஆய்வு செய்ய, கமிஷனர் அறிவுறுத்தினார். வார்டு பொறியாளர்கள் ஒத்துழைப்பு இல்லாததால், பூங்கா துறை ஊழியர்கள், நிலங்களை சென்று பார்க்க முடியாமல் தவிக்கின்றனர்.இந்நிலையில், முழுமையான பட்டியல் சேகரித்த பின், ஆக்கிரமிப்புகளை அகற்ற, மாநகராட்சி நடவடிக்கை எடுக்கும் என்றும், ஆக்கிரமிப்பு இல்லாத இடங்களை, சுற்றுச்சுவர் அமைத்து பாதுகாக்கவும், புதிய பூங்காக்கள் நிதி ஆதாரங்களை பொறுத்து அமைக்கவும் முடிவு செய்யப்பட்டு உள்ளதாகவும் அதிகாரிகள் தரப்பில் தெரிவிக்கப்பட்டது.

ஆவணங்களை காக்க புதிய வியூகம்!

சென்னை மாநகராட்சிக்கு சொந்தமான நிலங்களும், திறந்தவெளி ஒதுக்கீட்டு நிலங்களும் சர்ச்சைக்குள்ளாவதற்கு காரணமே, அது குறித்த ஆவணங்களை பாதுகாக்காமல், மாநகராட்சி தொலைத்துவிடுவதே ஆகும். பழைய சொத்துகளுக்கான பல ஆவணங்கள், நிலம் மற்றும் உடமை துறையில் இல்லை.இதனால், தற்போது புதிய நடைமுறை அறிமுகம் செய்யப்பட்டு உள்ளது. இதன்படி, புதிதாக பெறப்படும் திறந்தவெளி ஒதுக்கீட்டு நிலங்களுக்கான ஆவணம், மண்டல அலுவலகம், நிலம் மற்றும் உடமை துறை, பூங்கா துறை உட்பட, நான்கு இடங்களில் பராமரிக்கப்படும்.

 

குழாயில் ஒரு சொட்டு நீர் கூட கசியக்கூடாது; பொதுமக்களுக்கு சென்னை குடிநீர் வாரியம் அறிவுரை

Print PDF

தினமலர்       20.04.2017

குழாயில் ஒரு சொட்டு நீர் கூட கசியக்கூடாது; பொதுமக்களுக்கு சென்னை குடிநீர் வாரியம் அறிவுரை

சென்னை : சென்னையில் தற்போது ஏற்பட்டுள்ள கடுமையான வறட்சியை சமாளிக்க, பொதுமக்களும் ஒத்துழைப்பு தர வேண்டும் என கேட்டுக் கொண்டுள்ள குடிநீர் வாரியம், நிலத்தடி நீரை மோட்டார் மூலம் உறிஞ்ச, ஒன்பது மணிநேரம் இடைவெளி தர வேண்டும் என அறிவுறுத்தி உள்ளது.

இது குறித்து, சென்னை குடிநீர் வாரியம் வெளியிட்டுள்ள செய்திக்குறிப்பு: பருவமழை பொய்த்ததால், சென்னையில் ஏரிகள் வறண்டன. நிலத்தடி நீர்மட்டம் குறைந்தது. இருப்பினும் பொதுமக்களுக்கு குடிநீர் கிடைத்திட, சென்னை குடிநீர் வாரியம் பல்வேறு மாற்று ஏற்பாடுகளை செய்து வருகிறது.பொதுமக்களும் குடிநீரை சிக்கனமாக பயன்படுத்தி, குடிநீர் ஆதாரங்களை பாதுகாக்க வேண்டும். ஆழ்துளை கிணறுகளை முறையாக பயன்படுத்துவதுடன் வீடுகளில் உள்ள மழைநீர் கட்டமைப்புகளை சீரமைக்க வேண்டும். மேலும், குடிநீர் தட்டுப்பாட்டை

சமாளிக்க குடிநீர் வாரியத்திற்கு ஒத்துழைக்க வேண்டும்.

சென்னை நகரின் குடிநீர் தேவை, 830 மில்லியன் லிட்டர். கடந்த மாதம் வரை, இந்தளவு குடிநீரை வாரியம் வினியோகித்து வந்தது. தற்போது பற்றாக்குறை ஏற்பட்டிருப்பதால் மீண்டும் பருவமழை பெய்து, குடிநீர் ஆதாரம் கிடைக்கும் வரை குடிநீர் வினியோகத்தின் அளவு, 550 மில்லியன் லிட்டராக குறைக்கப்பட்டு உள்ளது.

இந்த அளவை மேலும் குறைக்காமல் இருக்க, வாரியம் பல்வேறு முயற்சிகளை மேற்கொண்டு வருகிறது. இதற்கு ஒத்துழைப்பு வழங்கும் வகையில், வீடுகளில் பயன்படுத்தும் குழாயிலோ, தெருக்குழாயிலோ ஒரு சொட்டு நீர் கூட கசியாமல் பார்த்துக் கொள்ள வேண்டும்.

ஒரு குழாயில், ஒரு சொட்டு நீர், 10 மணிநேரம் தொடர்ந்து கசிந்தால், 20 லி., தண்ணீர் வீணாகும். ஒரு வீட்டில், 20 லி., தண்ணீர் என, சென்னையில் உள்ள, 10 லட்சம் வீடுகளில் நீர் கசிந்தால், தினமும், 2 கோடி லி., நீர் வீணாகும்.

இதை கருத்தில் கொண்டு, குழாய்களை மூடி வைக்க வேண்டும். மின் மோட்டார் மூலம் நிலத்தடி நீரை பயன்படுத்தும் போது, ஒன்பது மணிநேர இடைவெளி தர வேண்டும். அப்போது தான் நிலத்தடி நீரூற்று சீராக இருக்கும். மின்மோட்டாரை தொடர்ச்சியாக பயன்படுத்தினால் மின்சாரம் வீணாவது மட்டுமல்லாது நிரூற்றிலும் தடை ஏற்படும்.

வானிலை ஆய்வு மையம், இந்த ஆண்டு கோடை மழை பெய்வதற்கு அதிக வாய்ப்புள்ளதாக தெரிவித்துள்ளது. இதனால் பொதுமக்கள் தங்கள் வீடுகளில் உள்ள மழைநீர் கட்டமைப்புகளை சீரமைக்க வேண்டும். அவற்றை நல்ல முறையில் பராமரித்து தயார் நிலையில் வைத்தால், மழை பெய்யும் போது நிலத்தடி நீர்மட்டம் வெகுவாக உயர்வதோடு, நிலத்தடி நீரின்

தன்மையும் மேம்படும்.பொதுமக்களுக்கும் அத்தகைய குடிநீர் ஆதாரங்களை பாதுகாக்கும் பொறுப்புள்ளது என்பதை உணர்ந்து செயல்பட வேண்டும். இவ்வாறு அதில் தெரிவிக்கப்பட்டு உள்ளது.

 

முறைகேடான 1,732 குடிநீர் இணைப்புகள்...துண்டிப்பு!மாவட்டத்தில் 173 மோட்டார்கள் பறிமுதல்

Print PDF

தினமலர்        19.04.2017

முறைகேடான 1,732 குடிநீர் இணைப்புகள்...துண்டிப்பு!மாவட்டத்தில் 173 மோட்டார்கள் பறிமுதல்

காஞ்சிபுரம்;காஞ்சிபுரம் மாவட்டத்தில், ஊராட்சி, பேரூராட்சி, நகராட்சி ஆகிய உள்ளாட்சி அமைப்புகளில், முறைகேடாக பயன்படுத்தி வந்த 1,732 குடிநீர் இணைப்புகளை உள்ளாட்சி அதிகாரிகள் துண்டித்துள்ளனர். மேலும், 173 மின் மோட்டார்களையும் பறிமுதல் செய்துள்ளனர்.காஞ்சிபுரம் மாவட்டத்தில் முன்னெப்போதும் இல்லாத அளவிற்கு வெயில் வாட்டி வதைக்கிறது. வெயிலின் தாக்கம் நாளுக்கு நாள் அதிகரிக்க, அதன் எதிரொலியாக, குடிநீர் பிரச்னையும் அதிகரித்து வருகிறது.

நிலத்தடி நீர்மட்டம், 2015ல் பெய்த பெருமழைக்கு பின் ஓரளவு கட்டுக்குள் இருந்தது. ஆனால், கடந்த ஆண்டு, வட கிழக்கு பருவ மழை பொய்த்த பின், குடிநீர் நிலத்தடி நீர்மட்டம் வெகுவாக குறைந்துள்ளது என, நீராதாரத்துறையினர் தெரிவிக்கின்றனர்.காஞ்சிபுரம் மாவட்டத்தில், செய்யாறு, பாலாறு, வேகவதி ஆறு, ஓங்கூர் ஆறு மற்றும் 912 ஏரிகள், நுாற்றுக்கணக்கான குளங்கள் என, மாவட்டம் முழுவதும் ஏராளமான நீர்நிலைகள் இருந்த போதும், குடிநீர் பிரச்னை தீராமல் உள்ளது.

குடிநீர் திருட்டு

குடிநீர் பிரச்னைக்கு மற்றொரு காரணமாக, முறைகேடான குடிநீர் இணைப்புகள், ஊராட்சிகளிலும், நகராட்சி மற்றும் பேரூராட்சிகளிலும் முளைத்து வருகின்றன. மேல்நிலை நீர்த்தேக்க தொட்டியிலிருந்து வீடுகளுக்கு செல்லும் குடிநீர் குழாய்களில், திருட்டுத்தன மாக குழாய் அமைத்து மோட்டார் மூலம் குடிநீர் திருடப்படுகிறது.சில இடங்களில் வணிக நிறுவனங்கள், தொழில் நிறுவனங்களுமே இந்த முறைகேடுகளில் ஈடுபடுவதாக புகார் உள்ளது. அவற்றை முறையாக கண்காணித்து உடனடியாக அந்த குடிநீர் இணைப்புகளை துண்டிக்க சமீபத்தில் நடைபெற்ற மாவட்ட ஆட்சியர் தலைமையிலான கூட்டத்தில் உத்தரவிடப்பட்டிருந்தது.

அதன்படி, ஊராட்சி ஒன்றியங்கள், பேரூராட்சி, நகராட்சிகளில் முறைகேடான குடிநீர் இணைப்புகளை கண்டறிதல், மோட்டார்களை பறிமுதல் செய்தல் போன்ற நடவடிக்கைகளில் அரசு அலுவலர்கள் ஈடுபட்டு வந்தனர்.கோடைகாலம் துவங்கியது முதல் முறைகேடான இணைப்புகள் குறித்து, மாவட்ட ஆட்சியர், பொன்னையாவிடம் நேற்று நடைபெற்ற ஆய்வு கூட்டத்தில் அறிக்கை தாக்கல் செய்யப்பட்டுள்ளது. அவ்வாறு தாக்கல் செய்யப்பட்ட அறிக்கையில், ஊராட்சி ஒன்றியங்களில் 2,036 முறைகேடான இணைப்புகள் கண்டறியப்பட்டிருப்பதாகவும், அதில், 1,627 இணைப்புகள் துண்டிக்கப்பட்டு, 41 மோட்டார்கள் பறிமுதல் செய்யப்பட்டிருப்பதாக தெரிவிக்கப்பட்டுள்ளது.இதே போல், நகராட்சிகளில், 23 முறைகேடான இணைப்புகள் துண்டிக்கப் பட்டு, 109 மோட்டார்கள் பறிமுதல் செய்யப்பட்டுள்ளன.

நடவடிக்கை

பேரூராட்சிகளில், 82 குடிநீர் இணைப்புகள் துண்டிக்கப்பட்டு, 23 மோட்டார்கள் பறிமுதல் செய்யப்பட்டிருப்பதாக தெரிவிக்கப்பட்டுள்ளது.முறையாக வரி செலுத்தாமல், உள்ளாட்சி அமைப்புகள் வழங்கும் குடிநீரை, முறைகேடாக உறிஞ்சும் நபர்கள் மீதும் கடுமையான நடவடிக்கை பாய வேண்டும் என, எதிர்பார்ப்பு எழுந்து உள்ளது. முறைகேடான குடிநீர் இணைப்புகள் அனைத்தும் விரைவில் துண்டிக்கப்படும் என, உள்ளாட்சி அமைப்பின் அதிகாரிகள் தெரிவித்துள்ளனர்.

 


Page 7 of 3982