இலவச வீட்டுமனைத் திட்டம்: ஆட்சியர் வேண்டுகோள்

நாகப்பட்டினம், பிப். 7: நாகை மாவட்டத்தில் ஆதிதிராவிடர் இன மக்களுக்கு இலவச வீட்டுமனைப் பட்டா வழங்கும் திட்டத்தின் கீழ் அரசுக்கு நிலம் வழங்க முன்வருமாறு நில உரிமையாளர்களுக்கு நாகை ஆட்சியர் ச. முனியநாதன் வேண்டுகோள் விடுத்துள்ளார்.

நாகை மாவட்டத்தில் ஆதிதிராவிடர் மற்றும் பழங்குடியினர் நலத் துறை மூலம் நிகழ் நிதியாண்டில் இலவச வீட்டுமனைப் பட்டா வழங்கும் திட்டத்தில் ரூ. 35 லட்சம் நிதி ஒதுக்கீடு செய்யப்பட்டுள்ளது. இதன் மூலம், நாகை வட்டம், பனங்குடி கிராமத்தில் ரூ. 5.9 லட்சம் மதிப்பில் சுமார் 30 பேருக்கும், 80. வடுகச்சேரி கிராமத்தில் 5.4 லட்சம் மதிப்பில் 30 பேருக்கும் இலவச வீட்டுமனைப் பட்டா வழங்கப்பட்டுள்ளது.

ஆதிதிராவிடர்களுக்கு இலவச வீட்டுமனைப் பட்டா வழங்குவதற்கு நிலம் கையகப்படுத்தும் பணிக்கு ஒத்துழைப்பு அளிக்கும் வகையில், நில உரிமையாளர்கள் அரசுக்கு நிலம் அளிக்க முன்வர வேண்டும் என அவர் தனது செய்திக் குறிப்பில் கேட்டுக் கொண்டுள்ளார்.