அதிரடிஆக்கிரமிப்புகள் அகற்றும் பணி தீவிரம்:தாம்பரம் மேம்பாலப் பணியில் வேகம்

தாம்பரம்:தாம்பரம் ரயில்வே மேம்பால திட்டத்தில், தாம்பரம்–வேளச்சேரி சாலையில் பணிகளை தொடர்வதற்கு இடையூறாக இருந்த ஆக்கிரமிப்புக்கள் நேற்று அதிரடியாக அகற்றப்பட்டன. இதையடுத்து, அங்கு 2.5 கோடி ரூபாய் மதிப்பில் சாலையை அகலப்படுத்தவும், மேம்பால பணிகளை துவங்கவும் முடிவு செய்யப்பட்டுள்ளது.தாம்பரம் ஜி.எஸ்.டி., சாலை, முடிச்சூர் சாலை, தாம்பரம்–வேளச்சேரி சாலை ஆகியவற்றை இணைக்கும் வகையில், ஒரு மேம்பாலம் கட்டும் திட்டம் 36 கோடி ரூபாய் மதிப்பில் கடந்த ஆண்டு துவங்கப் பட்டது.ஜி.எஸ்.டி., சாலையில் நான்கு பகுதிகளிலும், முடிச்சூர் சாலையிலும் பணிகள் துரிதமாக நடந்தன. ரயில்வே பகுதியிலும் பிரம்மாண்டமான “கான்கிரீட் டெக்‘ அமைக்கப்பட்டுள்ளது. ரோட்டரி அமைக்கும் பணியும் நடந்தது.கிழக்கு தாம்பரம், வேளச்சேரி சாலையில், நெடுஞ்சாலைத் துறை இடத்தில் ஏராளமான ஆக்கிரமிப்புக்கள் செய்யப்பட்டிருந்ததால், அப்பகுதியில் பில்லர்கள் மட்டுமே அமைக்கப்பட்டன. அடுத்த கட்ட பணிகளுக்காக ஆக்கிரமிப்புக்களை அகற்ற முயன்ற போது, சிலர் கோர்ட்டில் தடை உத்தரவு வாங்கினர். இதனால், தொடர்ந்து பணிகளை மேற்கொள்ள முடியவில்லை.தாம்பரம்–வேளச்சேரி சாலையில் ரயில்வே கேட் முதல் பழைய கோர்ட் வளாகம் வரை மொத்தம் 150 ஆக்கிரமிப்பு கட்டடங்கள் இருப்பதாக கணக்கிடப்பட்டது. இவற்றில், கோர்ட் தடை இல்லாத 110 கட்டடங்களை இடிக்க, நோட்டீஸ் வழங்கப்பட்டு, நேற்று காலை பொக்லைன் இயந்திரம் மூலம் இடிக்கும் பணிகள் துவங்கப்பட்டன. தாம்பரம், சேலையூர் போலீசார் பாதுகாப்பு பணியில் ஈடுபடுத்தப்பட்டனர்.இதுகுறித்து, நெடுஞ்சாலைத் துறை அதிகாரிகள் கூறுகையில், “இந்த மேம்பாலத்தில் கிழக்கு தாம்பரம் பகுதியில் மட்டுமே பணிகள் மந்தமாக இருந்தது.பாலப்பணிகளுக்கு தேவையான நிலம், ஆக்கிரமிப்பாளர்களிடம் இருந்து மீட்கப்பட்டு வருவதால், இங்கும் மிக விரைவில் பணிகள் துவங்கி, துரிதமாக முடிக்கப்படும்.