காமன்வெல்த் கட்டுமானப் பணியில் தாமதம் நம்பகத்தன்மையை மாநகராட்சி இழக்கும் பணிகள் குழு தலைவர் எச்சரிக்கை

தினகரன் 02.09.2010

புதுடெல்லி, செப். 2: “காமன்வெல்த் தொடர்பான கட்டுமானப் பணிகளை திட்டமிட்ட காலத்துக்குள் முடிக்க முடியாமல் மாநகராட்சி தோல்வி அடைந்திருப்பது, அதிருப்தியை ஏற்படுத்துகிறது. இது மாநகராட்சியின் நம்பகத்தன்மையை இழக்கச் செய்துவிடும்” என்று மாநகராட்சி பணிகள் குழு தலைவர் ஜகதீஷ் மாம்கெயின் கூறியுள்ளார்.

இதுகுறித்து அவர் வெளியிட்டுள்ள அறிக்கையில் கூறியிருப்பதாவது:

காமன்வெல்த் கட்டுமானப் பணிகளை முடிப்பது தொடர்பாக மாநகராட்சி இதுவரை 6 முறை கெடு தேதியை நிர்ணயித்து செயல்பட்டும் பணிகள் முடியவில்லை. இதன் மூலம் மாநகராட்சி தனது நம்பகத்தன்மையை இழந்துவிடும் நிலை ஏற்பட்டுள்ளது.

கரோல் பாக், பஹர்கஞ்ச், டெல்லி பல்கலைக்கழக பகுதி ஆகியவற்றில் நடைபெறும் பணிகள் மிக மெதுவாக நடைபெறுகின்றன. டெல்லி பல்கலைக்கழக பகுதி, சத்திரசால் மைதானப்பகுதி, ரக்பி மைதானப் பகுதி ஆகியவற்றில் 12 சாலைகள் மேம்படுத்தப்படுகிறது. இதில் 4 சாலைகளில் பணிகள் முடிந்துவிட் டது. மற்றவை வரும் 11ம் தேதிக்குள் முடிக்கப்படும் என்று தெரிவிக்கப்பட்டுள்ளது.

நகர்ப்பகுதியில் மாநகராட்சியால் மேற்கொள்ளப்பட்டுள்ள 10 பணிகளில் ஒன்றுதான் முடிந்துள்ளது. 6 பணிகள் 7ம் தேதிக்குள் முடிக்கப்படும் என்றும், டிடியூ மார்க், மின்டோ சாலை ஆகியவற்றில் மேற்கொள்ளப்படும் பணிகள் 15ம் தேதிக்குள் முடிக்கப்படும் என்று கூறப்பட்டுள்ளது.இம்முறையாவது பணிகளை திட்டமிட்டபடி முடிக்க வேண்டும். இவ்வாறு அவர் கூறியுள்ளார்.