கேபிள் வயர் கட்டணம்: மாநகராட்சி உத்தரவை திரும்பப் பெற கோரிக்கை

கேபிள் வயருக்கு மாநகராட்சி கட்டணம் விதிப்பதைத் திரும்பப் பெற வேண்டும் என கேபிள் ஆபரேட்டர்கள் சங்கம் வலியுறுத்தியுள்ளது.

 இது தொடர்பான கோரிக்கை மனுவை மாவட்ட ஆட்சியர் எல்.சுப்பிரமணியனிடம் கேபிள் ஆபரேட்டர்கள் செவ்வாய்க்கிழமை அளித்தனர்.

 மதுரை மாநகராட்சிப் பகுதியில் கேபிள் வயர்களுக்கு ஒரு கிலோ மீட்டருக்கு ரூ.21,749 செலுத்த வேண்டும் என மாநகராட்சி ஆணையரால் கேபிள் ஆபரேட்டர்களுக்கு அறிவுறுத்தப்பட்டுள்ளது. கேபிள் வயர்களுக்கான கட்டணத்தை இதுவரை எம்.எஸ்.ஓ-க்கள் தான் செலுத்தி வந்தன. அதுவும் கிலோ மீட்டருக்கு ரூ.6500 மட்டுமே வசூலிக்கப்பட்டது.

 அரசு கேபிள் டிவி நிறுவனம் தான் இப்போது எம்எஸ்ஓ-வாக இருக்கிறது. இந்நிலையில், கேபிள் ஆபரேட்டர்கள் கட்டணம் செலுத்த அறிவுறுத்தப்பட்டுள்ளது. ஆகவே, இந்த உத்தரவை திரும்பப் பெற வேண்டும் என்றனர்.