தினமலர் 26.04.2010
மலைவாழ் மக்களுக்கு உள்ளாட்சி தேர்தலில் ஓட்டுரிமை : பேரூராட்சி, ஊராட்சியிடம் கருத்து கேட்பு
உடுமலை : மலைவாழ் மக்களுக்கு உள்ளாட்சி தேர்தலில் ஓட்டுரிமை அளிக்க வேண்டும் என எம்.எல்.ஏ., கவன ஈர்ப்பு தீர்மானம் குறித்து சம்பந்தப்பட்ட ஊராட்சி மற்றும் பேரூராட்சியிடம் மாவட்ட நிர்வாகம் கருத்து கேட்டு சுற்றறிக்கை அனுப்பியுள்ளது.உடுமலை பகுதியில், ஆண்டியகவுண்டனூர், ராவணாபுரம், மானுப்பட்டி ஊராட்சிகள் மற்றும் தளி பேரூராட்சிக்குட்பட்ட பகுதிகளில், 18 செட்டில்மெண்ட் பகுதிகள் உள்ளது. இப்பகுதியிலுள்ள மலைவாழ் மக்களுக்கு உள்ளாட்சி தேர்தலில், ஓட்டு அளிக்கும் உரிமை இல்லை. உடுமலை எம்.எல்.ஏ., சட்டமன்றத்தில் ‘சட்டமன்றம் மற்றும் லோக்சபா தேர்தல் போன்று, உள்ளாட்சி தேர்தலிலும் மலைவாழ் மக்களுக்கு ஓட்டுரிமை அளிக்க வேண்டும்,’ என கவன ஈர்ப்பு தீர்மானத்தை முன்மொழிந்தார்.இதனையடுத்து,மலைவாழ் மக்களுக்கு உள்ளாட்சி தேர்தலில் ஓட்டுரிமை வழங்க வேண்டியதன் அவசியம் குறித்து சம்பந்தப்பட்ட ஊராட்சி மற்றும் பேரூராட்சியிடம் மாவட்ட நிர்வாகம் கருத்து கேட்டு சுற்றறிக்கை அனுப்பியுள்ளது. அதில்,’ உடுமலை பகுதியிலுள்ள 18 செட்டில்மெண்ட் பகுதி மக்களுக்கு உள்ளாட்சி தேர்தலில் ஒட்டுரிமை வழங்க வேண்டியதன் அவசியம் குறித்து விவாதிக்கப்பட வேண்டும் என்றும், தமிழ்நாடு ஊராட்சிகள் (தேர்தல்கள்) விதிகள் 1995ன்படி வாக்காளர் பட்டியல் அப்பகுதிக்கு தொடர்புடைய தமிழ்நாடு சட்டமன்ற தொகுதிக்கான நடப்பு வாக்காளர் பட்டியலுடன் ஒத்திருக்க வேண்டும் என தெரிவிக்கப்பட்டுள்ளது. 2006ம் ஆண்டு உடுமலை சட்டமன்ற வாக்காளர் பட்டியலுடன் மானுப்பட்டி, ஆண்டிய கவுண்டனூர், ராவணாபுரம் ஆகிய மூன்று ஊராட்சிகள், தளி பேரூராட்சி வாக்காளர் பட்டியல் ஒப்பீடு செய்து விடுபட்ட வாக்காளர் விவரங்களை கண்டறிய வேண்டும்.
வாக்காளர் பெயர் பட்டியலை மேற்குறிப்பிட்ட குடியிருப்பு வாரியாக மாவட்ட தேர்தல் அலுவலர் மற்றும் மாவட்ட நிர்வாகம் கடிதம் பெற்ற 15 நாட்களுக்குள் தொடர்புடையவர்களுக்கு நேரடியாக அனுப்ப வேண்டும். என தெரிவிக்கப்பட்டுள்ளது. இதனையடுத்து தளி பேரூராட்சி கவுன்சிலர்கள் ‘ தளி பேரூராட்சிக்குட்பட்ட ஈசல்திட்டு, சேலையூத்து, தாளமேட்டுக்குடி, பூச்சிகொட்டம்பாறை, குறுமலை, திருமூர்த்தி மலை செட்டில்மெண்ட் பகுதிகள் உள்ளது. உள்ளாட்சி தேர்தலில் ஓட்டுரிமை அளிப்பது குறித்து விவாதித்து சட்டப்படியான நடவடிக்கை மேற்கொள்ளலாம் என்றனர்.
இது குறித்து மாவட்ட நிர்வாகத்திடம் கருத்துக்களை தெரிவிக்கவும் திட்டமிட்டுள்ளனர்.சேர்க்கப்படாதவர் விபரம் : மாவட்ட நிர்வாகம் அனுப்பியுள்ள மனுவில், செட்டில்மெண்ட் பகுதி வாரியாக உள்ளாட்சி வாக்காளர் பட்டியலில் சேர்க்கப்படாத விவரம் அளிக்கப்பட்டுள்ளது. 18 செட்டில்மெண்ட் பகுதியில், 1730 ஆண்கள், 1680 பெண்கள் உட்பட 3410 பேர் உள்ளாட்சி வாக்காளர் பட்டியலில் சேர்க்கப்படாதவர்கள் என பட்டியல் அளித்துள்ளது.