சென்னை: தமிழகத்தில், நகரமயமாதல் மிக வேகமாக நடந்து வருவது, 2011 மக்கள் தொகை கணக்கெடுப்பில் தெரியவந்துள்ளது. கடந்த 10 ஆண்டுகளில், 4.45 சதவீத வளர்ச்சியில் நகரமயமாதல் இருந்துள்ளது என்றும் புள்ளி விவரங்கள் கூறுகின்றன. தற்போது, நகர்ப் பகுதிகளில் வசிப்போரின் சதவீதத்தில், தமிழகம் முதல் இடத்தில் உள்ளது. இங்கு நகர்ப் பகுதிகளில், 48.45 சதவீதம் மக்கள் வசிக்கின்றனர். 2001 மக்கள் கணக்கெடுப்பில், 44.04 சதவீதம் மக்கள் நகர்ப் பகுதிகளில் வசித்தனர். சென்னை, கோவை, திருச்சி, மதுரை நகரங்களைச் சுற்றிய பகுதிகளில் நகரமயமாதல் இருந்து வந்த நிலையில், கடந்த 10 ஆண்டுகளில் நகரமயமாதல் தமிழகம் முழுவதும் பரவலாக அதிகரித்துள்ளது. திருவள்ளூர், காஞ்சிபுரம், திருப்பூர், தூத்துக்குடி, விருதுநகர், கரூர், வேலூர் நகரங்களைச் சுற்றியுள்ள பகுதிகளிலும் நகரமயமாதல் வேகமாக நடந்து வருகிறது. தமிழகத்தில், கடலோர மாவட்டங்கள் நகரமயமாதலில் பின்தங்கி உள்ளன. ஆனால், சிவகங்கை, ராமநாதபுரம் ஆகிய கடலோர மாவட்டங்கள், இதற்கு விதிவிலக்காக உள்ளன. அப்பகுதிகளில் உள்ள சிறிய துறைமுகங்களும், சுற்றுலாவும் நகரமயமாதலுக்கு காரணங்களாக உள்ளன என, மக்கள் தொகை கணக்கெடுப்பில் கூறப்பட்டுள்ளது.
சட்டமும் ஒரு காரணம் : தமிழகத்தில், நகரமயமாதல் பரவலாக இருப்பதற்கு, 1991 மற்றும் 96ல் செய்யப்பட்ட, அரசியல் அமைப்பு சட்டத்தின் 74வது சட்டத் திருத்தமே காரணமாக உள்ளது. இந்த சட்டத் திருத்தம் மூலம், கிராமப்புறப் பகுதிகள் மறு சீரமைக்கப்பட்டு, நகர்ப் பகுதிகளாக மாற்றப்பட்டு உள்ளன. இதன்மூலம், படிப்பறிவு குறைவாக இருந்தாலும், ஒரு பகுதியைச் சேர்ந்த 5,000 பேர் வேளாண்மை அல்லாத தொழிலை செய்பவர்களாக இருந்தால், அப்பகுதி நகர்ப்பகுதியாக வரையறுக்கப்படுகிறது. மாநகராட்சி, நகராட்சி, பேரூராட்சிகளுக்கு அடுத்த நகர்ப் பகுதிகளாக இவை அறியப்படுகின்றன. இப்பகுதிகளில், சதுர கி.மீ.,க்கு 400 பேர் வசிப்பதாகவும் மக்கள் தொகை கணக்கெடுப்பில் கூறப்படுகிறது.
வேளாண் தொழில் வீழ்ச்சி : தண்ணீர் பற்றாக்குறை போன்ற காரணங்களால், வேளாண் தொழில் குறைந்து வருகிறது. அதே நேரம், தொழிற்சாலைகளின் வளர்ச்சியால், விவசாய தொழிலாளர்கள் நகரங்களை நோக்கி இடம்பெயர்வதால், நகரமயமாதல் வேகமாக உள்ளது. கடந்த 10 ஆண்டுகளில், 74 லட்சம் பேர் நகர்ப் பகுதிகளில் அதிகரித்ததற்கு இவர்களே காரணம் என, மக்கள் தொகை கணக்கெடுப்பில் தெரியவந்துள்ளது.
சேவை துறை மற்றும் தகவல் தொழில்நுட்பத் துறையின் வளர்ச்சி, நகரங்களை நோக்கி மக்களை ஈர்க்கிறது என்றும் குறிப்பிடப்பட்டு உள்ளது. இத்துறைகளுக்கு, படித்த இளைஞர்கள் அதிகம் வந்து கொண்டிருக்கும் வேளையில், அத்துறைகளைச் சார்ந்து இருக்கும் தொழில்களில் படிக்காதவர்களுக்கும் வேலைவாய்ப்பு கிடைத்து வருவது நகரமயமாக்கலுக்கு காரணமாகத் தெரிவிக்கப்பட்டு உள்ளது. மொத்த மக்கள் தொகையில், 48.45 சதவீத மக்கள் நகர்ப்பகுதிகளில் இருப்பதற்கு, இதுவும் காரணமாகச் சொல்லப்படுகிறது. 2001 மக்கள் தொகை கணக்கெடுப்பின்போது, கேரளா, மகாராஷ்டிரா, குஜராத் மாநிலங்களில் நகரமயமாதல் அதிகம் இருப்பதாக கண்டறியப்பட்டது. 2011 மக்கள் தொகை கணக்கெடுப்பில், அம்மாநிலங்களுடன் தமிழகமும் சேர்ந்துள்ளது. மொத்த மக்கள் தொகையில், 50 சதவீத மக்கள் நகர்ப்புறங்களில் இருக்கும் நிலையில், அதன் உள் கட்டமைப்பு சீராக இருக்க வேண்டும். அதற்கு உள்ளாட்சி அமைப்புகளின் நிர்வாகம், செம்மையாக இருக்க வேண்டும் எனவும் சுட்டிக் காட்டப்படுகிறது.
