Urban News

தினகரன்               14.08.2013

பேரூராட்சி அலுவலக கட்டடம் திறப்பு விழா ஆலோசனை கூட்டம்

இளம்பிள்ளை:  இளம்பிள்ளை பேரூராட்சிக்கு புதிய அலுவலக கட்டிடம் ரூ 24.50 லட்சத் தில் கட்டப்பட்டது. இதன் திறப்பு விழா கடந்த ஜூலை மாதம் 27ம் தேதி நடைபெறுவதாக இருந்தது. பேரூராட்சியில் தீர்மானம் நிறைவேற்றாமல், பேரூராட்சி தலைவரை அழைக்காமல் விழா நடத்துவதை எதிர்த்து ஐகோர்ட்டில் மனு தாக்கல் செய்யப்பட்டது. இதை தொடர்ந்து விழா ரத்து செய்யப்பட்டது.

இதன் பின்னர் பேரூராட்சி அவசர கூட்டம் நடத்தி, கடந்த 9ம் தேதியன்று திறப்பு விழா நடத்த ஏற்பாடு செய்யப்பட்டது. அமைச்சரை அழைக்காமல் விழாவை நடத்தக்கூடாது என்று செயல் அலுவலர் கலைராணி, ஐகோர்ட்டில் மற்றொரு மனு தாக்கல் செய்தார். இதை தொடர்ந்து இந்த விழாவும் ரத்து செய்யப்பட்டது. இந்நிலையில் பேரூராட்சி அலுவலகத்தை திறப்பது தொடர்பான ஆலோசனை கூட்டம் சேலம் கலெக்டர் அலுவலகத்தில் இன்று நடைபெற உள்ளது.

இதுகுறித்து பேரூராட்சிகளின் உதவி இயக்குனர் பழனியம்மாள் வெளியிட்டுள்ள அறிக்கையில், இளம்பிள்ளை பேரூராட்சி அலுவலக கட்டிடம் திறப்பு விழா தொடர்பாக சேலம் கலெக்டர் அலுவலகத்தில் 14ம் தேதி (இன்று) மாலை 4.30 மணியளவில் நடைபெறவுள்ளது. இந்த கூட்டத்தில் பேரூராட்சி தலைவர், துணை தலைவர், கவுன்சிலர்கள் மற்றும் செயல் அலுவலர் ஆகியோர் தவறாது கலந்து கொள்ள வேண்டும் என்று கூறியுள்ளார்.