தினமணி 2.11.2009
மேட்டுப்பாளையம் நகராட்சி சார்பில் இலவச மருத்துவ முகாம்
மேட்டுப்பாளையம், நவ. 1: மேட்டுப்பாளையம் நகராட்சி மற்றும் பொது சுகாதாரம்-நோய் தடுப்பு மருந்து துறை சார்பில் வருமுன் காப்போம் திட்டத்தின்கீழ் இலவச மருத்துவ முகாம் வெள்ளிக்கிழமை நடைபெற்றது.
மேட்டுபாளையம் நகரவை மகளிர் பள்ளி வளாகத்தில் நடைபெற்ற முகாமிற்கு நகராட்சி ஆணையர் சுந்தரம் தலைமை தாங்கினார். துணைத் தலைவர் ஆறுமுகம் முன்னிலை வகிக்க, நகராட்சி மருத்துவ அலுவலர் நஞ்சப்பன் வரவேற்றார். நகர்மன்றத் தலைவர் சத்தியவதி கணேஷ் குத்துவிளக்கேற்றி முகாமை தொடங்கி வைத்தார்.
காரமடை வட்டார மருத்துவ அலுவலர் டாக்டர் சக்திவேல் தலைமையில் டாக்டர்கள் மாரியப்பன், விஜயகுமார், உதயகுமார், அனுராதா, மீனாட்சி உட்பட மருத்துவ குழுவினர் சார்பில் 1200 பேருக்கு பல்வேறு பரிசோதனைகள் செய்யப்பட்டு இலவச மருந்துகளும் வழங்கப்பட்டன.
இதில் நகர திமுக செயலர் கதிரவன், சுகாதார ஆய்வாளர்கள் சரவணன், நல்லுசாமி, செந்தில், அங்குராஜ் உட்பட பலர் கலந்து கொண்டனர்.
நகராட்சி மின் கண்காணிப்பாளர் அன்வர் நன்றி கூறினார்.
