Urban News

திருச்சி, அக். 24: திருச்சி மாநகராட்சிக்குள்பட்ட திருச்சி மேற்கு மற்றும் திருச்சி கிழக்கு சட்டப்பேரவைத் தொகுதிகளில் வாக்காளர் பட்டியலில் பெயர் சேர்த்தல் மற்றும் நீக்கல் தொடர்பான விண்ணப்பங்களை அளித்து, நிரப்பிப் பெற்று, கள ஆய்வு மேற்கொள்ளும் பணிகள் தொடர்பான விளக்கக் கூட்டம் சனிக்கிழமை நடைபெற்றது.

இந்தக் கூட்டத்துக்கு, மாநகராட்சி ஆணையரும், தேர்தல் நடத்தும் அலுவலருமான த.தி. பால்சாமி தலைமை வகித்தார். உதவி ஆணையர்கள் வி. நடராஜன் (கோ-அபிஷேகபுரம்), முத்துக்கிருஷ்ணன் (அரியமங்கலம்), பாஸ்கர் (ஸ்ரீரங்கம்), தேர்தல் தனித் துணை வட்டாட்சியர் கமலக்கண்ணன் உள்ளிட்டோர் கலந்து கொண்டனர். மனுதாரரால் நிரப்பப்பட வேண்டிய படிவங்கள் 6,7,8,8ஏ ஆகியவை குறித்து தேர்தல் பிரிவு அலுவலர்கள், வருவாய் உதவியாளர்கள் ஆகியோருக்கு விளக்கம் அளிக்கப்பட்டது.

திருச்சி: திருச்சி மாநகராட்சி மாற்றுத்திறன் பணியாளருக்கு ஊர்திப்படியை உயர்த்துவதுக்கு தீர்மானம் நிறைவேற்றப்பட்டது.

அரசு நிதித் துறை சார்பில், மாற்றுத்திறனாளிகளுக்கு ஊர்திப்படியை உயர்த்துவது தொடர்பாக கடந்த ஏழாம் தேதி அரசாணை வெளியிடப்பட்டது. அதில், "அரசு மற்றும் உள்ளாட்சி அமைப்புகளில் பணிபுரியும் அலுவலர்கள், ஆசிரியர்கள் மற்றும் ஆசிரியரல்லாத அலுவலர், அரசு நிதியுதவி பெறும் கல்வி நிறுவனங்களில் பணிபுரியும் மாற்றுத்திறன் பணியாளர், அலுவலர்களுக்கு தற்போது மாதந்தோறும் வழங்கப்படும் ஊர்திப்படியை 300 ரூபாயில் இருந்து 1,000 ரூபாயாக அக்டோபர் முதல் தேதியிலிருந்து உயர்த்தி வழங்க உத்தரவிடப்பட்டுள்ளது' என குறிப்பிடப்பட்டுள்ளது. இந்த அரசாணை அமல்படுத்துவதுக்கு ஒப்புதல் அளித்து, திருச்சி மாநகராட்சி கூட்டத்தில் தீர்மானம் நிறைவேற்றப்பட்டது.