Urban News

சங்கரன்கோவில், நவ. 1: சங்கரன்கோவில் நகராட்சி சார்பில் உள்ளாட்சி தினவிழா ஞாயிற்றுக்கிழமை நடைபெற்றது. இதையொட்டி பேரணியும் நடைபெற்றது.

நகராட்சிப் பள்ளி மாணவ, மாணவிகள் பங்கேற்ற பேரணியை நகராட்சித் தலைவர் பார்வதிசங்கர் துவக்கி வைத்தார்.

பயணியர் விடுதி முன்பு தொடங்கிய பேரணி நகரின் முக்கிய வீதிகள் வழியாக சென்று பாரதியார் தெருவில் உள்ள நகராட்சி நடுநிலைப் பள்ளியை அடைந்தது.

அங்கு உள்ளாட்சி தினவிழாவையொட்டி பேச்சுப் போட்டி நடைபெற்றது.

இதில் கிருஷ்ணசாமிநகர் நகராட்சி நடுநிலைப் பள்ளி மாணவி க. மகாலட்சுமி முதல் பரிசும், வடக்கு ரதவீதி (கிழக்கு) நகராட்சி நடுநிலைப் பள்ளி மாணவி ஜோதிலட்சுமி 2-வது பரிசும், கலைஞர் சாலை நகராட்சி நடுநிலைப் பள்ளி மாணவி மு. இன்பரசி 3வது பரிசும் பெற்றனர்.

வெற்றிபெற்ற மாணவிகளுக்குப் நகராட்சித் தலைவர் பார்வதிசங்கர் பரிசுகளை வழங்கிப் பேசினார்.

நிகழ்ச்சியில் நகராட்சித் துணைத் தலைவர் சு. சங்கரன், நகராட்சி மேலாளர் அ. மாணிக்கஅரசி, நகராட்சி உறுப்பினர் நடராஜன், கே.எஸ்.கே. சங்கர சுப்பிரமணியன், வனமூர்த்தி, ராஜேந்திரன் உள்ளிட்டோர் பங்கேற்றுப் பேசினர்.

நகரமைப்பு ஆய்வாளர் பே. முத்துச்சாமி நன்றி கூறினார்.

ஊராட்சி ஒன்றியம்:

இதைத்தொடர்ந்து சங்கரன்கோவில் ஊராட்சி ஒன்றியத்தில் உள்ளாட்சி தினவிழா அதன் தலைவர் க .அன்புமணி தலைமையில் நடைபெற்றது.

வட்டார வளர்ச்சி அலுவலர் வே. செல்வராஜன் முன்னிலை வகித்தார்.

துணை வட்டார வளர்ச்சி அலுவலர்கள் ஆறுமுகநயினார், ஆசைத்தம்பி, உள்ளாட்சி தணிக்கை ஆய்வாளர் முருகையா உள்ளிட்டோர் பேசினர்.

முன்னதாக கூடுதல் வட்டார வளர்ச்சி அலுவலர் சரோஜா வரவேற்றார். அலுவலக உதவியாளர் கணேசன் நன்றி கூறினார்.

கோவை, நவ. 1: கோவை மாநகரில் ரயில்வே மேம்பாலங்கள் கட்ட 7 சாலைகளை நெடுஞ்சாலைத் துறையிடம் மாநகராட்சி ஒப்படைக்க முடிவு செய்துள்ளது.

இத்துடன், மேலும் 3 ரயில்வே மேம்பாலப் பணிகளையும் சேர்த்து ஒப்படைக்க வேண்டும் என ராக் வலியுறுத்தி உள்ளது.

இது குறித்து ராக் துணைத் தலைவர் பாலசுந்தரம் சனிக்கிழமை வெளியிட்ட அறிக்கை:

கோவை நகரில் ரயில்வே மேம்பாலங்கள் கட்ட 7 சாலைகளை மாநகராட்சி நிர்வாகம், நெடுஞ்சாலைத் துறையிடம் வழங்க எடுத்துள்ள முடிவை ராக் வரவேற்கிறது.

ஆனால், முக்கியமான 3 ரயில்வே மேம்பாலங்கள் இப் பட்டியலில் இடம் பெறவில்லை. கணபதி - ஆவாரம்பாளையம் லெவல் கிராசிங், பீளமேடு ரயில் நிலையம் அருகே உள்ள லெவல கிராசிங் ஆகிய பணிகள் இடம்பெறவில்லை.

மேலும் மூன்றாவதாக, மாநகரின் கிழக்குப் பகுதியில் இருந்து மேற்கு பகுதிக்கு செல்ல அவிநாசி சாலை மேம்பாலம் மற்றும் வடகோவை மேம்பாலம் மட்டுமே உபயோகிக்கப்படுகிறது.

இதனால், இந்த 2 பகுதிகளிலும் போக்குவரத்து நெரிசல் ஏற்படுகிறது. இதைத்தவிர்க்க, கிக்கானி மேல்நிலைப் பள்ளிக்கு அருகே ரயில்வே மேம்பாலம் அமைக்கப்பட வேண்டும். மேற்படி, 3 பணிகளும் மாநாகராட்சி பட்டியலில் இடம்பெறவில்லை.

ஜவாஹர்லால் நேரு தேசிய புனரமைப்புத் திட்டத்தில் உள்ள லட்சமி மில்ஸ் சந்திப்பு, காந்திபுரம் சந்திப்பு, நூறடி சாலை சந்திப்பு, சிவானந்தா காலனி - மேட்டுப்பாளையம் சாலை சந்திப்புகளில் மேம்பாலங்களும், பொள்ளாச்சி சாலையில் உள்ள ஈச்சனாரி லெவல் கிராசிங்கில் ரயில்வே மேம்பாலமும் அமைக்க வேண்டும்.