Urban News

புதுடெல்லி,நவ. 22: 70 பேரை பலிவாங்கிய கட்டிடத்தின் இடிபாடுகளை அகற்றும் பணி முடிவடைந்தது. லட்சுமி நகரில் உள்ள லலிதா பார்க்கில் 5 மாடி கட்டிடம் கடந்த திங்களன்று இரவு 8 மணிக்கு இடிந்து விழுந்தது. மொத்த கட்டிடமுமே ஒருசில நொடிகளில் நொறுங்கி தரைமட்டமானது.

கட்டிடம் இடிந்து விழுந்ததுமே பேரிடர் மேலாண்மை ஆணையம், தீயணைப்புத் துறையினர், போலீஸ், மாநகராட்சி என பல்வேறு துறைகளைச் சேர்ந்தவர்களும் மீட்புப் பணியில் ஈடுபட்டனர். தோண்டத் தோண்ட சடலங்கள் வந்து கொண்டேயிருந்தன. மொத்தம் 70 பேர் பலியானார்கள்.

இந்தக் கட்டிடத்தில் 2 மாடிகள் அனுமதியின்றி கட்டப்பட்டுள்ளது அம்பலத்துக்கு வந்தது. அனுமதியின்றி கட்டிய தளங்களுக்காக மாதம்தோறும் மாநகராட்சி அதிகாரிகள், போலீசாருக்கு கட்டிட உரிமையாளர் அம்ரித்பால் சிங் லஞ்சம் கொடுத்ததும் தெரியவந்தது. கட்டிட உரிமையாளர் அம்ரித் சிங் பால் கைது செய்யப்பட்டார்.

கட்டிடத்தின் இடிபாடுகளை அகற்றுவதில் தொடர்ந்து தீயணைப்புத்துறையினர் ஈடுபட்டனர். 100 மணிநேரத்துக்கும் மேலாக தொடர்ச்சியாக நடந்த இடிபாடு அகற்றும் பணி நேற்று முன்தினம் மாலை நிறைவடைந்தது. எல்லா இடிபாடுகளும் அகற்றப்பட்டுவிட்டதாக தீயணைப்புத் துறை அதிகாரி தெரிவித்தார்.

கடைசியாக 48 மணிநேரத்தில் இடிபாடுகளை அகற்றியபோது ஒரு உடல்கூட கண்டெடுக்கப்படவில்லை எனவும் அவர் தெரிவித்தார். கட்டிடம் இடிந்ததில் படுகாயமடைந்த 81 பேர் வெவ்வேறு மருத்துவமனைகளில் தீவிர சிகிச்சை பெற்று வருகின்றனர். அவர்களில் ஒரு சிலரது நிலை தொடர்ந்து கவலைக்கிடமாக உள்ளது.

இந்த விபத்தை தொடர் ந்து சட்ட விரோதமாக விதி முறைகளை மீறி கட்டப் பட்ட கட்டிடங்கள் மீது தீவிர நடவடிக்கை எடுக்க அரசு முடிவு எடுத்துள்ளது.

வேலூர், நவ. 19: வேலூரில் மாதம் ஒருமுறை மட்டுமே கொசு மருந்து தெளிக்கப்படுகிறது என்று மாநகர்மன்றக் கூட்டத்தில் கவுன்சிலர் புகார் தெரிவித்தார்.

வேலூர் மாநகர்மன்றத்தின் சாதாரணக் கூட்டம் மேயர் ப.கார்த்திகேயன் தலைமையில் வெள்ளிக்கிழமை நடைபெற்றது.

கூட்டத்தில் காங்கிரஸ் உறுப்பினர் சீனுவாசகாந்தி பேசுகையில், வேலூரில் நாய்த் தொல்லையை கட்டுப்படுத்த வேண்டும். சாலைகளில் திரியும் கால்நடைகளைப் பிடித்து உரிமையாளர்களுக்கு அபராதம் விதிக்க வேண்டும் என்றார்.

இதற்கு பதிலளித்து ஆணையர் செல்வராஜ் பேசுகையில், பிராணிகள் வதை தடுப்புச் சட்டம் உள்ளதால் நாய்களுக்கு ஆன்ட்டி ரேபிஸ் தடுப்பூசி போடப்பட்டு வருகிறது என்றார்.

காங்கிரஸ் உறுப்பினர் ஜெயப்பிரகாஷ் பேசுகையில், வேலூரில் கொசுத்தொல்லை அதிகம் உள்ளதால், தெருக்களில் மக்கள் நடந்து செல்ல முடியவில்லை. மாதம் ஒரு முறை மட்டுமே கொசு மருந்து தெளிக்கப்படுகிறது.

"வாரம் ஒரு முறை கொசுமருந்து தெளிக்கப்படும். தெளிக்காத ஊழியர்கள் மீது கடும் நடவடிக்கை எடுக்கப்படும்' என்று மேயர் பதிலளித்தார்.

மதிமுக உறுப்பினர் அருணாசலம் பேசுகையில், மின்வாரியத்துக்கு மாநகராட்சி எவ்வளவு கட்டண நிலுவை வைத்துள்ளது என்றார். இதற்கு பதிலளித்த மேயர், ரூ.8 கோடி செலுத்த வேண்டும் என்றார்.

புதை சாக்கடை குறித்து அதிகாரிகள் சரிவர விளக்கம் அளிப்பதில்லை என்று திமுக உறுப்பினர் முன்னா ஷெரீப் புகார் கூறினார்.

அதிமுக மாரிமுத்து பேசுகையில், எனது வார்டில் 20-க்கும் மேற்பட்ட குழல் விளக்குகள் எரியாததால், இருண்டு கிடக்கிறது என்றார்.

தேமுதிக உறுப்பினர் பாலசுந்தரம் பேசுகையில், புதை சாக்கடைக்கு சிறிய டேப் அடித்து விட்டு பள்ளத்தை தோண்டி விடுகின்றனர்.

இதனால் விபத்துகள் நேரிடுகின்றன. தடுப்புக் கட்டைகள் அமைக்க வேண்டும். ஓட்டேரியில் ஆக்கிரமிப்புகள் அகற்றப்பட வேண்டும். தண்ணீர் வரத்தே இல்லாமல் உள்ளது. மழை பெய்தால் தெருக்களில் நடந்து செல்லவே முடியவில்லை என்றார்.

இதையடுத்து, வேலூருக்கு இம்மாதம் 27-ம் தேதி முதல்வர் கருணாநிதி பங்கேற்கும் நிகழ்ச்சிகளில் மாநகர்மன்ற உறுப்பினர்கள் கலந்து கொள்ளுமாறு மேயர் அழைப்பு விடுத்தார். மாநகர்மன்ற துணைத் தலைவர் தி.அ.முகமது சாதிக், ஆணையர் செல்வராஜ் உள்ளிட்டோர் கலந்துகொண்டனர்.