தினகரன் 22.06.2010
அடுத்த ஆண்டு விரிவாக்கம் சென்னை மாநகராட்சியுடன் இணையும் பகுதிகள் விவரம்
சென்னை, ஜூன் 22: அடுத்த ஆண்டு முதல் சென்னை மாநகராட்சி விரிவாக்கம் செய்யப்படுகிறது. அதன்படி புறநகர் பகுதிகளில் உள்ள நகராட்சி, பேரூராட்சி மற்றும் ஊராட்சி பகுதிகள் மாநகராட்சியுடன் இணைக்கப்பட உள்ளது.
இதில் கத்திவாக்கம், திருவொற்றியூர், மணலி, மாதவரம், அம்பத்தூர், மதுரவாயல், வளசரவாக்கம், ஆலந்தூர், உள்ளகரம், புழுதிவாக்கம் நகராட்சிகளும், சின்னசேக்காடு, புழல், போரூர், நந்தம்பாக்கம், மீனம்பாக்கம், பெருங்குடி, பள்ளிக்கரணை, சோழிங்கநல்லூர் ஆகிய பேரூராட்சிகளும், இடையன்சாவடி, சடையன்குப்பம், காட்டுப்பாக்கம், தீயம்பாக்கம், மாத்தூர், வடபெரும்பாக்கம், சூரப்பட்டு, கதிர்வேடு, புத்தகரம், நொளம்பூர், காரம்பாக்கம், நெற்குன்றம், ராமாபுரம், முகலிவாக்கம், மணப்பாக்கம், கொட்டிவாக்கம், பாலவாக்கம், நீலாங்கரை ஈஞ்சம்பாக்கம், காரப்பாக்கம், ஒக்கியம் துரைப்பாக்கம், மடிப்பாக்கம், ஜல்லடியம்பேட்டை, செம்மஞ்சேரி, உத்தண்டி ஆகிய ஊராட்சிகளும் மாநகராட்சியுடன் இணைக்கப்பட உள்ளன.
மாநகராட்சியுடன் புதிதாக இணைக்கப்பட உள்ள பகுதிகளை மாநகராட்சியின் பழைய வரைபடத்துடன் இணைத்து டிஜிட்டல் வரைபடத்தை தயாரிக்க திட்டக்கமிஷன் முடிவு செய்துள்ளது. சிறந்த மேலாண்மை, திட்டமிடுதல், நிர்வகித்தல், முடிவு எடுத்தல், சொத்து வரிகள் மூலம் வருவாயை பெருக்குதல் ஆகியவற்றுக்காக புதிதாக இணைக்கப்படவுள்ள பகுதிகளின் புள்ளிவிவரங்களை மாநகராட்சி அதிகாரிகள் சேகரிக்கின்றனர்.
இது குறித்து மாநகராட்சி உயர் அதிகாரி ஒருவர் கூறும்போது, "மாநகராட்சியில் புதிதாக சேர்க்கப்படவுள்ள பகுதிகளில் குடிநீர், மின்சாரம், கழிவுநீர், போலீஸ் நிலையம், தீயணைப்பு நிலையம் போன்றவற்றின் புள்ளிவிவரங்களை பல அடுக்குகளாக டிஜிட்டல் வரைபடத்தில் பார்த்து தெரிந்து கொள்ளலாம்’’ என்றார். சம்பந்தப்பட்ட துறையினரின் உதவியுடன் புள்ளிவிவரங்களை மாநகராட்சி அதிகாரிகள் சேகரித்து வருகின்றனர்.
