Urban News

கோவை;கோவை மாநகராட்சியில் செயல்படுத்தப்பட உள்ள பாதாள சாக்கடை திட்டத்திற்கு சேவை கட்டணம் நிர்ணயம் செய்யப்பட்டுள்ளது. வீடுகளுக்கு 4 ஆயிரம் ரூபாயும், நட்சத்திர ஓட்டல்களுக்கு 26 ஆயிரம் ரூபாயும் வைப்புத்தொகையாக நிர்ணயிக்கப்பட்டுள்ளது. கோவை மாநகராட்சியில் ஜவஹர்லால் நேரு தேசிய நகர புனரமைப்பு திட்டத்தின் கீழ் 377.13 கோடி செலவில் பாதாள சாக்கடை திட்டப்பணிகள் நடக்கிறது. ஒவ்வொரு இணைப்புக்கும் சேவை கட்டணமும், வைப்பு நிதியும் வசூலிக்க மாநகராட்சி நிர்வாகம் முடிவு செய்துள்ளது. இதற்கான தீர்மானம் மாநகராட்சி மன்றத்தில் நிறைவேற்றப்பட்டது. தீர்மானத்தின் படி நிறைவேற்றப்பட்டுள்ள சேவை கட்டணம் வருமாறு:

வீட்டு இணைப்பு ஒன்றிற்கு நான்காயிரம் ரூபாய் செலுத்த வேண்டும். (வைப்புத்தொகை 3 ஆயிரம், மேற்பார்வை கட்டணம் ஆயிரம் ரூபாய் சேர்த்து கட்டவேண்டும்), இணைப்பு ஒன்றிற்கு வைப்புத்தொகையாக 3 ஆயிரம் ரூபாய் அல்லது பாதாள சாக்கடை இணைப்பு பெற வேண்டிய கட்டடம் முழுமைக்குமான அரையாண்டு சொத்துவரித்தொகை, இதில் எது அதிகமோ அந்த தொகை செலுத்தப்பட வேண்டும், இத்துடன் மேற்பார்வை கட்டணம் ஆயிரம் ரூபாய் வசூலிக்கப்படும்.வீட்டு உபயோகம் அல்லாத தொழிற்சாலைகள், வணிக நிறுவனங்கள், சிறு ஓட்டல்கள் மருத்துவமனைகளுக்கு 21 ஆயிரம் ரூபாயும், நட்சத்திர ஓட்டல்களுக்கு 26 ஆயிரம் ரூபாயும் வைப்பு நிதியாக நிர்ணயிக்கப்பட்டுள்ளது.

500 சதுர அடிக்கு மேல் ஆயிரத்து 200 சதுர அடி வரை ரூ.50ம், ஆயிரத்து 200 சதுர அடிக்கு மேல் 2 ஆயிரத்து 400 சதுர அடி வரை ரூ.75ம், 2 ஆயிரத்து 400 சதுர அடிக்கு மேல் 4 ஆயிரம் சதுர அடி வரை 150 ரூபாயும், 4 ஆயிரம் சதுர அடிக்கு மேல் 200 ரூபாயும் கட்டணமாக நிர்ணயிக்கப்பட்டுள்ளது.வணிக வளாகங்கள்: 500 சதுர அடிக்கு குறைவான கட்டடத்திற்கு ரூ.75 ம், 500 சதுரஅடியிலிருந்து ஆயிரத்து 200 சதுர அடி வரை 150ம், ஆயிரத்து 200 சதுர அடியிலிருந்து 2 ஆயிரத்து 400 சதுர அடி வரை 200 ரூபாயும், 2 ஆயிரத்து 400 சதுர அடியிலிருந்து 7 ஆயிரத்து 500 சதுர அடிவரை உள்ள கட்டடத்திற்கு 350 ரூபாயும், 7 ஆயிரத்து 500 சதுர அடியிலிருந்து 10 ஆயிரம் சதுர அடி வரை 700 ரூபாயும், 10 ஆயிரம் சதுர அடியிலிருந்து 25 ஆயிரம் சதுர அடி வரை ஆயிரம் ரூபாயும், 25 ஆயிரம் சதுர அடியிலிருந்து ஒவ்வொரு 5 ஆயிரம் சதுர அடிக்கும் ஆயிரத்து 100 ரூபாயும் கட்டணமாக பெறப்படும்.

தொழிற்சாலைகள்: 500 சதுர அடிக்கும் குறைவானவைக்கு 75 ரூபாயும், 500 சதுர அடியிலிருந்து ஆயிரத்து 200 சதுர அடி வரை 150 ரூபாயும், ஆயிரத்து 200 சதுர அடியிலிருந்து 2 ஆயிரத்து 400 சதுர அடி வரை 200 ரூபாயும், 2 ஆயிரத்து 400 சதுர அடியிலிருந்து 5 ஆயிரம் சதுர அடி வரை 350 ரூபாயும், 5 ஆயிரம் சதுர அடிக்கு மேல் 500 ரூபாயும் கட்டணமாக வசூலிக்கப்படும். மருத்துவமனைகள்: 10 படுக்கை வசதிகள் கொண்ட மருத்துவமனைக்கு 500 ரூபாயும், 11 முதல் 25 படுக்கை வசதி கொண்ட மருத்துவமனைக்கு 750 ரூபாயும், 25 முதல் 100 படுக்கைகள் கொண்ட மருத்துவமனைக்கு ஆயிரம் ரூபாயும், 100 முதல் 250 படுக்கை வசதி கொண்ட மருத்துவமனைக்கு 2 ஆயிரத்து 500 ரூபாயும், 250 படுக்கைகளுக்கு மேல் உள்ள படுக்கைகள் கொண்ட மருத்துவமனைக்கு 5 ஆயிரம் ரூபாயும் கட்டணமாக வசூலிக் கப்படும். தங்கும் விடுதிகள்: 10 படுக்கை வசதி கொண்ட தங்கும் விடுதிக்கு ரூ. 500ம், 11 முதல் 25 படுக்கை கொண்ட தங்கும் விடுதிக்கு ஆயிரம் ரூபாயும், 25 க்கும் மேல் படுக்கை வசதி கொண்ட தங்கும் விடுதிக்கு ஆயிரத்து 500 ம், 3 நட்சத்திர அந்தஸ்து அல்லது அதற்கு மேல் வசதி கொண்ட தங்கும் விடுதிக்கு 2 ஆயிரத்து 500ம் கட்டணமாக நிர்ணயிக்கப்பட்டுள்ளது. தங்கும் இடங்கள்: 500 சதுர அடிக்கு குறைவானவற்றிற்கு 60 ரூபாயும், 500 சதுர அடியிலிருந்து ஆயிரத்து 200 சதுர அடி வரை 100 ரூபாயும், ஆயிரத்து 200 சதுர அடியிலிருந்து 2 ஆயிரத்து 400 சதுர அடி வரை 150 ரூபாயும், 2 ஆயிரத்து 400 சதுர அடியிலிருந்து 4 ஆயிரம் சதுர அடி வரை 300 ரூபாயும், 4 ஆயிரம் சதுர அடிக்கு மேல் 400 ரூபாயும் கட்டணமாக வசூலிக்கப் படும்.

உணவகங்கள் மற்றும் விடுதிகள்: 300 சதுர அடி வரை உள்ள சிறிய உணவு விடுதிகளுக்கு 100 ரூபாயும், 300 சதுர அடியிலிருந்து 750 சதுர அடி வரை உள்ள நடுத்தர உணவு விடுதிகளுக்கு 200 ரூபாயும், 750 சதுர அடியிலிருந்து ஆயிரத்து 500 சதுர அடி வரை உள்ள விடுதிகளுக்கு ஆயிரம் ரூபாயும், ஆயிரத்து 500 அடியிலிருந்து 2 ஆயிரத்து 500 அடி வரை உள்ள விடுதிகளுக்கு ஆயிரத்து 500 ரூபாயும், 3 நட்சத்திர அந்தஸ்த்திற்கு மேற்பட்ட ஓட்டல்கள் மற்றும் அதற்கு நிகரான உணவகங்களுக்கு 2 ஆயிரத்து 500 ரூபாயும், 5 நட்சத்திர அந்தஸ்து உள்ள உணவகங்கள் மற்றும் அதற்கும் மேற்பட்ட உணவகங்களுக்கு 5 ஆயிரம் ரூபாய் கட்டணம் நிர்ணயிக்கப்பட்டுள்ளது.

சினிமா தியேட்டர்கள் : ஆயிரம் இருக்கைகளை கொண்டவற்றிற்கு 350 ரூபாயும், ஆயிரத்திற்கும் அதிகமானவைக்கு ஆயிரம் ரூபாயும், 2 ஆயிரத்து 500 சதுர அடிஉள்ள திருமண மண்டபம் மற்றும் சமுதாயக்கூடத்திற்கு 200 ரூபாயும், 2 ஆயிரத்து 500 சதுர அடியிலிருந்து 4 ஆயிரம் சதுர அடிவரை உள்ளவற்றிற்கு 500 ரூபாயும், 4 ஆயிரம் சதுர அடிக்கு மேல் உள்ள திருமணமண்டபம் மற்றும் சமுதாயக்கூடத்திற்கு ஆயிரம் ரூபாயும், துவக்கப்பள்ளி மற்றும் நடு நிலைப்பள்ளிக்கு 500 ரூபாயும், உயர்நிலைபள்ளி மற்றும் மேல்நிலைபள்ளிக்கு ஆயிரம் ரூபாயும் கல்லூரிக்கு 3 ஆயிரம் ரூபாயும் கட்டணமாக நிர்ணயிக்கப்பட்டுள்ளது.கட்டண கழிப்பிடங்களுக்கு: குடியிருப்பு அல்லாத கட்டடங்களுக்கு ரூ.75 ம், 500 சதுர அடிக்கு மேல் ஆயிரத்து 200 சதுர அடி வரை உள்ள கட்டடங்களுக்கு 150 ரூபாயும், ஆயிரத்து 200 சதுர அடியிலிருந்து 2 ஆயிரத்து 400 சதுர அடிவரை உள்ள கட்டடங்களுக்கு 200 ரூபாயும், 2 ஆயிரத்து 400 சதுர அடிக்கு மேல் 7 ஆயிரத்து 500 சதுர அடி வரை 350 ரூபாயும், 7 ஆயிரத்து 500 சதுர அடியிலிருந்து 10 ஆயிரம் சதுர அடி வரை 700 ரூபாயும், 10 ஆயிரம் சதுர அடிக்கு மேல் 25 ஆயிரம் சதுர அடி வரையுள்ளவற்றிற்கு ஆயிரம் ரூபாயும், அதற்கு மேல் ஒவ்வொரு 5 ஆயிரம் சதுர அடிக்கு 100 ரூபாய் கட்டணமாக நிர்ணயிக்கப்பட்டுள்ளது.

இக்கட்டணம் 5 ஆண்டிற்கு ஒரு முறை மாநகராட்சி மன்ற ஒப்புதலோடு உயர்த்தப்படும்.