தினமணி 02.03.2013
உணவு விடுதிகள், வியாபார நிறுவனங்களுக்கு மாநகராட்சியின் திடக்கழிவு சேவைக் கட்டணம் உயர்வு
திருச்சி மாநகராட்சிப் பகுதிகளில் உள்ள உணவு விடுதிகள், ஹோட்டல்கள் மற்றும் வியாபார நிறுவனங்களுக்கு விதிக்கப்படும் திடக்கழிவு சேவைக் கட்டணம் பல மடங்காக உயர்த்தப்பட்டுள்ளது.
அண்மையில் மாநகராட்சி மாமன்றத்தில் நடைபெற்ற விவாதத்துக்குப் பிறகு நாளொன்றுக்கு நிர்ணயம் செய்யப்பட்டுள்ள சில கட்டண விவரம்:
நட்சத்திர அந்தஸ்து பெற்ற தங்கும் விடுதி, உணவு விடுதி, மதுபானம் அருந்தும் வசதியுடன் கூடிய ஹோட்டல்களுக்கு ரூ. 60. குளிர்சாதன வசதி இல்லாத தங்கும் வசதி மட்டும் கொண்ட தங்கும் விடுதிகளுக்கு ரூ. 12. டாஸ்மாக் மதுபானக் கடைகளிலுள்ள பார்களுக்கு ரூ. 30. இரவு நேர டிபன் மற்றும் டீ கடைகளுக்கு ரூ. 6.
500 சதுரஅடிக்கு மேல் உள்ள இறைச்சிக் கடைகளுக்கு ரூ. 24, குறைவாக உள்ள இறைச்சிக் கடைகளுக்கு ரூ. 12.
100 படுக்கைகளுக்கு மேல் இருக்கும் மருத்துவமனைகளுக்கு ரூ. 60; 51 முதல் 75 படுக்கைகளைக் கொண்ட மருத்துவமனைகளுக்கு ரூ. 30; 10 படுக்கைகளைக் கொண்ட கிளினிக்குகளுக்கு ரூ. 6. மொத்த வியாபாரம் செய்யும் காய்கறி, மளிகை மண்டி, பழக்கடைகளுக்கு ரூ. 45; பழமுதிர் நிலையங்களுக்கு ரூ. 36; சிறிய பழக்கடைகளுக்கு ரூ. 18.
100 கடைகளுக்கு மேல் உள்ள வணிக வளாகங்களுக்கு ரூ. 60; 50 கடைகள் வரையுள்ள வணிக வளாகங்களுக்கு ரூ. 45; 10 முதல் 25 கடைகள் வரையுள்ள வணிக வளாகங்களுக்கு ரூ. 15.
2500 சதுரஅடிக்கு மேல் உள்ள அச்சகங்கள், பிளக்ஸ் நிறுவனங்களுக்கு ரூ. 30; 1000 சதுரஅடிக்கு குறைவான நிறுவனங்களுக்கு ரூ. 6.
5000 சதுரஅடிக்கு மேல் உள்ள ஜவுளிக் கடைகள், பிளைவுட் மற்றும் டைல்ஸ், மொசைக் நிறுவனங்களுக்கு ரூ. 60; 1000 சதுரஅடிகளுக்கு குறைவாக உள்ள நிறுவனங்களுக்கு ரூ. 24.
2000 பேர் அமரும் வகையிலான திருமண மண்டபங்கள் மற்றும் கூட்ட அரங்குகளுக்கு (நிகழ்ச்சி ஒன்றுக்கு) ரூ. 510. அதற்குக் குறைவானோர் அமரும் வகையிலான அரங்குகளுக்கு ரூ. 450. ஆயிரம் நபர்களுக்கும் குறைவானோர் அமரும் வகையிலான அரங்குகளுக்கு ரூ. 300.
இதேபோல, ஆட்டோ மொபைல் தொழிற்கூடங்கள், தையற்கூடங்கள், முடிதிருத்துமிடம் போன்ற அனைத்து நிறுவனங்களுக்கும் சேவைக் கட்டணம் விதிக்கப்பட்டுள்ளது.
ஏற்கெனவே இருந்த கட்டணத்தைவிட பொருளில் வைக்கப்பட்ட கட்டணம் 100 மடங்கு அதிகமாக இருப்பதாக திமுகவினர் தெரிவித்தனர்.
தொடர்ச்சியாக நடைபெற்ற விவாதத்துக்குப் பிறகு, முன்மொழிவாக வைக்கப்பட்ட கட்டணத்தை குறைத்து 60 சதவிகிதமாக மாற்றியமைக்க அதிமுக சார்பில் கருத்து தெரிவிக்கப்பட்டு முடிவு செய்யப்பட்ட கட்டணமே இது.
