Urban News

ஆரணி, அக்.26: ஆரணி நகராட்சிக்கு செலுத்த வேண்டிய சொத்து, குடிநீர் வரி மற்றும் வாடகை பாக்கிகளை உடனடியாக செலுத்தாவிட்டால் ஜப்தி நடவடிக்கை மேற்கொள்ளப்படும் என ஆணையாளர் எச்சரித்துள்ளார்.

இதுகுறித்து ஆரணி நகராட்சி ஆணையாளர் சசிகலா நேற்று அளித்த பேட்டி:

ஆரணி நகராட்சிக்கு பொதுமக்கள் செலுத்தவேண்டிய சொத்து வரி, குடிநீர் வரி, தொழில் வரி, நகராட்சி கடை வியாபாரிகள் வாடகை நிலுவை, குத்தகை இனங்கள் உள்ளிட்ட வரி பாக்கிகளை உடனடியாக செலுத்தி நகர வளர்ச்சித் திட்டப்பணி களுக்கு ஒத்துழைப்பு தரவேண்டும்.

வரி, வாடகை பாக்கி செலுத்தாதவர்களின் சொத்துகள் ஜப்தி செய்யப்படும். கடைகளுக்கு சீல் வைக்கப்படும். குடிநீர் இணைப்பை துண்டிக்கவும் நடவடிக்கை எடுக்கப்படும்.

ஆரணி நகராட்சி அலுவலக வளாகத்தில் உள்ள அண்ணா சிலையை சுற்றி நகராட்சி அலுவலர்கள், ஊழியர்களின் சொந்த செலவில் நவீன பூங்கா அமைக்கப்பட உள்ளது.

இதற்கு விருப்பம் உள்ளவர்கள் உதவி செய்யலாம். மேலும் நகராட்சி அலுவலகம் எதிரே உள்ளே வெங்கட்ராமன் பூங்கா உள்ளிட்ட பூங்காக்கள் பராமரிப்பு பணிகள் மேற்கொள்ளப்படும்.

நகராட்சியை சேர்ந்த சுந்தரம் தெரு, வடியராஜா தெரு மற்றும் அதை சுற்றியுள்ள பகுதிகளில் குடிநீருடன் கழிவுநீர் கலந்து வருவதாக புகார்கள் வந்துள்ளன. அதை சீரமைக்கும் பணி மேற்கொள்ளப்பட்டுள்ளது. இவ்வாறு அவர் தெரிவித்தார்.

புதுடெல்லி, அக். 26: நிதி நெருக்கடியை சமாளிக்க கிராமப்புறங்களிலும், நகர்ப்புறமாகும் கிராமங்களிலும் சொத்து வரியை விதிக்க மாநகராட்சி முடிவு செய்தது. ஆனால் அதற்கு கிராமப்புறங்களில் இருந்து தேர்ந்தெடுக்கப்பட்ட காங்கிரஸ் உறுப்பினர்கள் மட்டுமின்றி, மாநகராட்சியை ஆளும் பா.ஜ.க.வைச் சேர்ந்த கவுன்சிலர்களும் கடும் எதிரப்பு தெரிவித்தனர்.

இதுதொடர்பான திட்டம் பற்றி விவாதிப்பதற்காக நிலைக்குழு கூட்டம் நடந்தது. "கிராமப்புறங்களில் வசிப்பவர்கள் ஆடு, மாடு போன்ற விலங்களை நம்பி வாழ்கிறார்கள். விலங்குகளை கட்டவும், அவைகளுக்கான தீனிகளை வைக்கவும் பெரிய அளவில் இடம் தேவைப்படுகிறது. அதனால் அவர்களுக்கு சொத்து வரியிலிருந்து விலக்கு அளிக்க வேண்டும். அவ்வாறு விலக்கு அளிக்கப்படவில்லையென்றால் குறைந்த வருமானத்தில் வாழ்க்கை நடத்தும் கிராமப்புற வாசிகளுக்கு இழைத்த அநீதியாகி விடும்" என்று கவுன்சிலர்கள் கூறினர்.

பாஜவைச் சேர்ந்த துணை நிலைக்குழு தலைவர் சரிதா சவுத்ரி, எதிர்க்கட்சித் தலைவர் ஜெய்கிஷன் சர்மா ஆகியோர் கடும் எதிர்ப்பு தெரிவித்தனர். இந்த திட்டத்தை நிறைவேற்றக் கூடாது, அதை திருப்பி அனுப்ப வேண்டும் என்று நிலைக்குழு தலைவர் யோகேந்தர் சந்தோலியாவை வலியுறுத்தினர். இதனால் கிராமப்புறம் மற்றும் வளர்ந்து வரும் கிராமப்புறங்களில் சொத்து வரியை விதிக்க வகை செய்யும் திட்டம் கைவிடப்பட்டது.