Urban News

சென்னை : சென்னை மாநகராட்சியில் 155 வார்டு அலுவலகங்களிலும் சொத்து வரி வசூலிப்பதற்கான மையங்கள் அமைக்கப்பட்டுள்ளன.சென்னை மாநகராட்சியின் முக்கிய வருவாய் சொத்து வரி வசூலிப்பது தான்.கடந்த 2009-2010ம் ஆண்டு 362 கோடி ரூபாய் அளவிற்கு சொத்துவரி வசூலிக்கப்பட்டுள்ளது. மாநாராட்சியின் தலைமை அலுவலகமான ரிப்பன் கட்டடத்திலும், 10 மண்டல அலுவலகங்களிலும் சொத்துவரி வசூலிக்கப்படுகிறது.மேலும், சொத்துவரி வசூலிப்பவர்கள் கையடக்க கருவிகள் மூலம் வீடு வீடாக சென்று சொத்துவரி வசூலிக்கின்றனர்.இந்நிலையில் சொத்து வரி வசூலிப்பை மேலும் எளிமைப்படுத்த சென்னை மாநகராட்சி அனைத்து வார்டு அலுவலகங்களிலும் சொத்து வரி வசூலிக்க திட்டமிட்டு அதற்கான பணிகளை மேயர் சுப்ரமணியன் நேற்று தி.நகர் 126 வார்டு அலுவலகத்தில் தொடங்கி வைத்து கூறியதாவது:மாநகராட்சியில் சொத்து வரி வசூலிப்பை மேலும் எளிமைப்படுத்த 155 வார்டு அலுவலகங்களிலும் கம்ப்யூட்டர் வசதியுடன் கூடிய கவுன்டர்கள் அமைக்கப்பட்டுள்ளது.அந்தந்த வார்டுகளில் உள்ள பொதுமக்கள், வார்டு அலுவலகங்களில் உள்ள சிறப்பு கவுன்டரில் சொத்துவரி செலுத்தலாம். சொத்து வரி செலுத்த பொதுமக்கள் இனி மண்டல அலுவலகங்களை தேடிச் செல்ல வேண்டிய அவசியம் இல்லை.வார்டு அலுவலகங்களில் திறக்கப்பட்டுள்ள சிறப்பு கவுன்டர்கள் விடுமுறை நாட்களான சனி மற்றும் ஞாயிற்றுக்கிழமைகளிலும் செயல்படும்.காலை 8 மணி முதல் இரவு 8 மணி வரை வார்டு அலுவலக சிறப்பு கவுன்டரில் சொத்துவரி செலுத்தலாம்.வாரம்தோறும் திங்கட்கிழமை சிறப்பு கவுன்டருக்கு விடுமுறை அறிவிக்கப்பட்டுள்ளது. வார்டு அலுவலகங்களில் சொத்து வரி வசூலிப்பதால் சொத்து வரி வசூலிப்பு தொகை மேலும் கூடுதலாக வாய்ப்புள்ளது.இவ்வாறு மேயர் கூறினார்.

திருநெல்வேலி, செப். 13: திருநெல்வேலி மாநகராட்சி சார்பில் கட்டடங்களுக்கான உடனடி வரி விதிப்பு சேவை திங்கள்கிழமை தொடங்கி வைக்கப்பட்டது. இது குறித்து திருநெல்வேலி மாநகராட்சி மேயர் அ.லெ. சுப்பிரமணியன் நிருபர்களிடம் திங்கள்கிழமை கூறியதாவது: திருநெல்வேலி மாநகராட்சி ஒளிவுமறைவற்ற வெளிப்படையான நிர்வாகத்தை செயல்படுத்துவதற்கு பல்வேறு நடவடிக்கைகளை எடுத்து வருகிறது. இதன் ஒரு பகுதியாக கட்டடங்களுக்கான உடனடி வரி விதிப்பு சேவை தொடங்கப்பட்டுள்ளது.

இதில் ஒரு கட்டடத்தின் உரிமையாளரே, தாம் கட்டியுள்ள கட்டடத்தின் வெளிப்புற அளவு, கட்டட பயன்பாடு, கூரையின் தன்மை, கட்டுமானம் முடிவுற்ற காலம், கட்டுமானம் அமைந்துள்ள வார்டு எண், இடம் ஆகிய விவரங்களை மாநகராட்சி இணையதளத்தில் இருந்து பதிவிறக்கம் செய்யப்பட்ட விண்ணப்பத்தில் பூர்த்தி செய்ய வேண்டும். அத்துடன் கட்டடம் உள்ள நிலத்தின் பத்திரம் நகல், கட்டட அனுமதி பெற்ற வரைபட ஆவணம் (தலா 2 பிரதிகள்) ஆகியவற்றுடன் விண்ணப்பத்தை மாநகராட்சி அலுவலகத்தில் சமர்ப்பிக்க வேண்டும்.

இந்த விண்ணப்பத்தை பெறும் மாநகராட்சி அதிகாரிகள் மற்றும் சம்பந்தப்பட்ட உதவி ஆணையர் ஆகியோர், அந்த கட்டடத்தை உடனே ஆய்வுசெய்து, அன்றைய தினமே வரி செலுத்துவதற்கான சிறப்பு அறிவிப்பு ஆணையை வெளியிடுவார்கள். அதே வேளையில் ஆவணங்களில் குறைபாடும், தகவல்கள் தவறாக இருந்தால் மாநகராட்சி கொடுத்த ஆணை ரத்து செய்யப்பட்டு, அபராதம் விதிக்கப்பட்டு, புதிய வரி விதிக்கப்படும்.

இதன் மூலம் மாநகராட்சி நிர்வாகத்தின் ஒளிவுமறைவற்ற, வெளிப்படையான தன்மை உறுதி செய்யப்படும். மாநகராட்சியின் வருமானம் அதிகரிக்கும், மக்கள் எளிதாக வரி செலுத்த முடியும், கால விரயம் தவிர்க்கப்படும் என்றார் மேயர். முன்னதாக ஏற்கெனவே விண்ணப்பித்த 3 பேருக்கு வரி செலுத்துவதற்கான சிறப்பு ஆணையை மேயர் அ.லெ. சுப்பிரமணியன் வழங்கி, திட்டத்தை தொடங்கிவைத்தார்.

இந் நிகழ்ச்சியில் துணை மேயர் கா. முத்துராமலிங்கம், ஆணையர் என். சுப்பையன், செயற்பொறியாளர் நாராயணன் நாயர், மண்டலத் தலைவர்கள் எஸ்.விஸ்வநாதன், பூ. சுப்பிரமணியன், எஸ்.எஸ். முகம்மது மைதீன் உள்ளிட்ட பலர் கலந்து கொண்டனர்.