தினமலர் 20.02.2010
சொத்துவரி செலுத்தாதவர்கள் வீடு,முன்பாக கொட்டு அடிக்க முடிவு :தூத்துக்குடி மாநகராட்சி அதிரடி
தூத்துக்குடி;தூத்துக்குடியில் சொத்துவரி செலுத்தாதவர்கள் வீடு, வர்த்தக நிறுவனங்கள் முன்பாக கொட்டு அடிக்க மாநகராட்சி அதிரடி முடிவு எடுத்துள்ளது. இதற்காக 5 விசேஷ கொட்டுகள் மாநகராட்சிக்கு வாங்கப்படுவதாக கமிஷனர் தெரிவித்தார்.தூத்துக்குடி மாநகராட்சி பகுதியில் சொத்துவரி, குடிநீர் கட்டணம் உள்ளிட்ட பாக்கியுள்ள வரி இனங்களை வசூல் செய்யும் பணியில் மாநகராட்சி தீவிரம் காட்டி வருகிறது.
மார்ச் 31ம் தேதிக்குள் வரிகளை பெரும்பாலும் வசூல் செய்து விட வேண்டும் என்பதில் மாநகராட்சி களம் இறங்கியுள்ளது. இது குறித்து மாநகராட்சி கமிஷனர் குபேந்திரன் கூறியதாவது;தூத்துக்குடி மாநகராட்சிக்குரிய புதிய அலுவலக கட்டடம் 4 கோடியே 75 லட்ச ரூபாய் செலவில் கட்டி முடிக்கும் தருவாயில் உள்ளது. பக்கிள் ஓடை இரண்டாம் கட்ட சீரமைப்பு பணி, பாதாள சாக்கடை திட்டம் உள்ளிட்ட பல்வேறு மக்கள் நலப்பணிகள் செய்யப்பட்டு வருகிறது. இந்த பணிகளுக்கு அரசிடம் இருந்து மானியம் மற்றும் கடன் பெறப்பட்டுள்ளது. இதற்கு மாநகராட்சியின் பங்கு தொகை செலுத்த வேண்டும்.
ஆனால் மாநகராட்சி பகுதியில் சொத்துவரி உள்ளிட்ட வரி இனங்கள் மூலம் சுமார் 8 கோடி ரூபாயிற்கு வரிபாக்கி உள்ளது. இதனை முழுமையாக வசூல் செய்ய வேண்டிய கட்டாய நிலை ஏற்பட்டுள்ளது. கடந்த சில நாட்களாக இதில் கடும் நடவடிக்கை எடுக்கப்பட உள்ளதாக எச்சரிக்கை செய்யப்பட்டவுடன் 80 லட்ச ரூபாய் வரி வசூல் ஆகியிருக்கிறது. ஆனால் மார்ச் 15ம் தேதிக்குள் இதனை முழுமையாக வசூல் செய்ய அதிரடி திட்டம் வகுக்கப்பட்டுள்ளது. சொத்துவரி பாக்கி வைத்துள்ள வணிக நிறுவனங்கள், வீடுகள் முன்பாக மாநகராட்சி பணியாளர்கள் சென்று கொட்டு அடிப்பர். வீடு, கடை முன்பு கொட்டு அடிக்கும் போது அதனை பலர் பார்ப்பர்.
கொட்டு அடிக்கும் நபர் சொத்துவரியை செலுத்துங்கள் என்று கூறி சிறிது நேரம் அங்கு தொடர்ந்து கொட்டடிப்பர். இதுபோன்ற நூதன நடவடிக்கை எடுக்கும் போது தானாக வரியை செலுத்தி விடுவார்கள் என்பதால் இதுபோன்ற புதிய முறையை அமல்படுத்த உள்ளோம். இதற்காக விசேஷமான 5 கொட்டு மாநகராட்சிக்கு வாங்குவதற்கு ஆர்டர் கொடுக்கப்பட்டிருக்கிறது. ஒரிரு நாளில் கொட்டு வந்துவிடும்.
அதன் பிறகு வரி பாக்கியுள்ள வீடு, வணிக நிறுவனங்கள் முன்பாக கொட்டு சத்தம் கேட்கும். மாநகராட்சி ஊழியர்களுக்கு சம்பள உயர்வு, மின் கட்டணம், வளர்ச்சி திட்டம் போன்றவற்றிற்கு அதிக நிதி ஒதுக்கீடு செய்ய வேண்டியிருப்பதால் வரிகள் பாக்கி இருக்கும் போது இதனை நிறைவேற்ற கடுமையான சிரமம் ஏற்படுகிறது. இதனால் மக்கள் பணிகள் தொய்வில்லாமல் நடக்க மாநகராட்சிக்கு செலுத்த வேண்டிய வரிகளை உடனடியாக மக்கள் செலுத்த வேண்டும். மேல் நடவடிக்கைக்கு வழி வகுக்காமல் மாநகராட்சிக்கு மக்கள் ஒத்துழைப்பு தரவேண்டும்.இவ்வாறு குபேந்திரன் தெரிவித்தார்.
மாநகராட்சி பொறியாளர் ராஜகோபாலன் உடனிருந்தார். தூத்துக்குடி மாநகராட்சி வரலாற்றில் சொத்துவரி வசூலுக்காக வீடுகள், கடைகள் முன்பாக கொட்டு அடித்து வசூல் செய்யும் நூதன முறையை மாநகராட்சி கொண்டு வந்துள்ளது புதிய அளவில் பரபரப்பை ஏற்படுத்தும் நிலையை உருவாக்கி இருக்கிறது.
