தினமணி 18.05.2010
சிமெண்ட் சாலை அமைக்க பூமி பூஜை
பழனி, மே 17:பழனியில் ரூ. 33 லட்சம் மதிப்பிலான சிமெண்ட் சாலை அமைக்கும் பணிக்கு திங்கள்கிழமை பூமி பூஜை நடைபெற்றது. பழனியின் நான்கு ரத வீதிகளில் உள்ள சாலைகளுக்கு சுமார் ரூ.1.5 கோடி மதிப்பில் சிமெண்ட் சாலை அமைக்க அடிக்கல் நாட்டப்பட்டது.
இந் நிலையில், முதல் கட்டமாக பழனி 16-வது வார்டில் உள்ள கிழக்கு ரத வீதியில் ரூ. 33 லட்சம் மதிப்பில் கான்கிரீட் தளம் அமைக்க பூமி பூஜை நிகழ்ச்சி திங்கள்கிழமை நடைபெற்றது.
நிகழ்ச்சிக்கு பழனி நகர்மன்றத் தலைவர் ராஜமாணிக்கம் தலைமை வகித்தார். 16-வது வார்டு நகர்மன்ற உறுப்பினர் இந்திரா திருநாவுக்கரசு வரவேற்றார். நகரச் செயலாளர் வேலுமணி முன்னிலை வகித்தார்.
நகராட்சி ஆணையர் மூர்த்தி, தி.மு.க. தலைமைப் பொதுக்குழு உறுப்பினர் சுப்ரமணி, கவுன்சிலர்கள் மகேஸ்வரி சக்திவேல், வழக்கறிஞர் பழனிச்சாமி, காணியாளர் நரேந்திரன், இளைஞரணி துணை அமைப்பாளர் சக்திவேல் உள்ளிட்ட பலர் வாழ்த்துரை வழங்கினார். பழனி சட்டமன்ற உறுப்பினர் அன்பழகன் பூமி பூஜை நிகழ்ச்சியைத் துவக்கி வைத்தார்.
தொடர்ந்து சட்டமன்ற உறுப்பினர் நிதி மூலம் மினி மோட்டார் சின்டெக்ஸ் திறப்பு விழா மற்றும் முதியோர் தொகை வழங்கும் நிகழ்ச்சிகள் நடைபெற்றன.
