தினமணி 24.07.2013
ரூ.4,300 கோடியில் பெங்களூரைச் சுற்றி வெளி வட்டச் சாலை
பெங்களூர் வளர்ச்சி ஆணையத்தின் மூலம், பெங்களூரைச் சுற்றி ரூ. 4,300 கோடியில் வெளி வட்டச் சாலை அமைக்கப்படும் என்று, கர்நாடக முதல்வர் சித்தராமையா தெரிவித்தார்.
பெங்களூர் சட்டபேரவையில் செவ்வாய்க்கிழமை பாஜக உறுப்பினர் எஸ்.ஆர்.விஸ்வநாத்தின் கேள்விக்குப் பதிலளித்து அவர் பேசியது:
பெங்களூர் வளர்ச்சி ஆணையத்தின் மூலம், பெங்களூரில் உள்ள தும்கூர் சாலையிலிருந்து ஓசூர் சாலை வரை ரூ.4,300 கோடியில், 65 கி.மீ. சுற்றளவு கொண்ட வெளி வட்டச் சாலை அமைக்க முடிவு செய்யப்பட்டுள்ளது.
பெங்களூர் வளர்ச்சி ஆணையத்தின் மூலம், தேவையான நிலங்களைக் கையகப்படுத்தும் பணிகள் தொடங்கப்படும். நிலங்கள் கையகப்படுத்தும் பணிகள் முடிந்த பிறகு,
வெளி வட்டச் சாலை அமைக்கும் பணி விரைவில் தொடங்கும்.
2005-ஆம் ஆண்டு, வெளி வட்டச் சாலை அமைக்க நிலங்களைக் கையகப்படுத்த அரசு உத்தரவிட்டது. இதனை எதிர்த்து தாக்கல் செய்யப்பட்ட வழக்கில், 2011-ஆம் ஆண்டு, அரசின் உத்தரவை நீதிமன்றம் ரத்து செய்தது.
இதற்கு எதிராக அரசு தொடர்ந்த வழக்கில், சாலை அமைப்பதற்காக நீதிமன்றம் அளித்த ரத்து ஆணை ஜூலை 15-ஆம் தேதி திரும்பப் பெறப்பட்டது. இதையடுத்து வெளி வட்டச் சாலை அமைக்க தேவைப்படும் 1,810 ஏக்கர் நிலங்களை கையகப்படுத்தும் பணிகள் தொடங்க திட்டமிடப்பட்டுள்ளது.
நிலங்களை இழக்கும் விவசாயிகளுக்கு பெங்களூர் வளர்ச்சி ஆணையத்தின் மூலம், வீட்டு மனைகள் அல்லது பணம் வழங்கப்படும். இந்த வெளி வட்டச் சாலை, தும்கூர் சாலை, தொட்டபள்ளாபூர் சாலை, பழைய மதராஸ் சாலை, சர்ஜாபுரா சாலை வழியாக ஓசூர் சாலை வரை அமைக்கப்படும் என்றார் சித்தராமையா.