Urban News

குலசேகரம், மார்ச் 28: திருவட்டார் சட்டப்பேரவைத் தொகுதிக்கு உள்பட்ட பெருவழிக்கடவு உள்ளிட்ட பல்வேறு சாலைகளைச் சீரமைக்க ரூ. 1.19 கோடி ஒதுக்கீடு செய்யப்பட்டுள்ளதாக, திருவட்டார் சட்டப் பேரவைத் தொகுதி உறுப்பினர் ஆர். லீமாரோஸ் தெரிவித்தார்.

இதுகுறித்து அவர் ஞாயிற்றுக்கிழமை வெளியிட்ட அறிக்கை:

திருவட்டார் பேரவைத் தொகுதிக்கு உள்பட்ட பல சாலைகள் சேதமடைந்து போக்குவரத்துக்கு பயனற்றதாகக் காணப்பட்டன. அவற்றைச் சீரமைக்கக் கோரி கடந்த ஆகஸ்ட் மாதம் குலசேகரத்தில் காலவரையற்ற உண்ணாவிரதம் நடைபெற்றது.

இதுதொடர்பாக சட்டப்பேரவையிலும் வலியுறுத்தப்பட்டது. இதனடிப்படையில் முதற்கட்டமாக ஆலுவிளை-சிதறால் சாலை, அருமனை-ஆற்றூர் சாலை, சுருளகோடு-தெரிசனம்கோப்பு சாலை, அருமனை-பனச்சமூடு சாலை, தேனாம்பாறை-கைதகம் சாலை, ஆற்றூர்-மூவாற்றுமுகம் சாலை, மேக்காமண்டபம்-வெள்ளியோடு சாலை, ரவிபுதூர் கடை-கல்லுப்பாலம் சாலை ஆகியவை ரூ. 1.67 கோடி மதிப்பில் செப்பனிடப்பட்டுள்ளன.

அடுத்தகட்டமாக பொன்மனை அருகேயுள்ள பெருவழிக்கடவு பகுதியில் பாலம் கட்ட ரூ. 10 லட்சமும், மேக்கோடு-குலசேகரம் சாலையில் வடிகால் கட்ட ரூ. 90 லட்சமும், கல்லடிமாமூடு-அண்டூர் சாலை செப்பனிட ரூ. 9 லட்சமும், பொன்மனை-பொன்னுமங்கலம் சாலையைச் செப்பனிட ரூ. 10 லட்சமும் நிதி ஒதுக்கீடு செய்யப்பட்டு, ஒப்பந்தமும் முடிக்கப்பட்டுள்ளது. இச் சாலைப் பணிகள் விரைவில் தொடங்கப்படவுள்ளது என்றார் அவர்.