தினமலர் 20.04.2010
இனாம் கரூர் நகராட்சியில் சாலை சீரமைக்க ரூ.42 லட்சம் ஒதுக்கீடு
கரூர்: இனாம் கரூர் நகராட்சி சாதாரண கூட்டம் தலைவர் கவிதா தலைமையில் நடந்தது. கமிஷனர் ராமச்சந்திரன் முன்னிலை வகித்தார். நகராட்சி பகுதியில் மண் சாலையை தார்சாலையாக மாற்றும் பணியில் 42 லட்சம் ரூபாய் மதிப்பீட்டில் நிதி ஒதுக்கீடு செய்யப்பட்டு ஒன்பதாவது வார்டு கொங்கு திருமண மண்டப சாலை, ஆறாவது வார்டு ராமகிருஷ்ணபுரம் குறுக்கு தெரு, 21வது வார்டில் பொன்நகரில் சிமென்ட் சாலை, எட்டாவது வார்டு பாரதி நகரில் தார் சாலை உள்ளிட்ட ஒன்பது பணிகள் மொத்தம் இரண்டாயிரத்து 305 மீட்டர் தூரத்துக்கு செய்யப்படவுள்ளது. மேலும், இரண்டு முதல் 21வது வார்டுகளுக்கு ஏற்கனவே அமைக்கப்பட்டுள்ள ஆழ்துறை கிணற்றில் மின்மோட்டார் பொருத்தி, சின்டெக்ஸ் டேங்க் வைத்து மக்களுக்கு தண்ணீர் வசதி ஏற்படுத்த 27.20 லட்சம் ரூபாய் ஒதுக்கீடு செய்யப்பட்டது. கவுன்சிலர்கள் காமராஜ், சவுந்தர்ராஜன், கோபாலகிருஷ்ணன், கிரிவாசன் உள்ளிட்ட அனைவரும் கூட்டத்தில் கலந்து கொண்டனர்.