Urban News

மதுரை, நவ. 30: மதுரையில் மழையினால் சேதம் அடைந்துள்ள 114 கிலோ மீட்டர் சாலைகள் சீரமைக்கப்பட உள்ளன. இதற்காக ரூ.33.50 கோடி அனுமதி அளித்து டெண்டர் விடப்பட்டுள் ளன. டிசம்பர் முதல் வாரம் இந்த சாலை அமைக்கும் பணி துவங்கும் என்று மாநகராட்சி ஆணையாளர் அறிவித்துள்ளார்.

மதுரை மாநகரா£ட்சி ஆணையாளர் செபாஸ்டின் கூறியதாவது: பாதாள சாக்கடை தொட்டி மற்றும் வீடுகளில் உள்ள செப்டிக் டேங்குகளில் ஆட்கள் இறங்கி சுத்தம் செய்வதற்கு உச்சநீதிமன்ற உத்தரவின்படி தடைவிதித்து அரசு உத்தரவு பிறப்பித்து உள்ளது. மாநகராட்சி எல்லைக்குள் பாதாள சாக்கடை தொட்டி மற்றும் வீடுகளில் உள்ள செப்டிக் டேங்குகளில் மாநகராட்சி பணியாளர்கள் உள்பட யாரும் இறங்க கூடாது.

வீடுகளின் உரிமையாளர்களும் வெளியாட்களை இறங்க செய்ய கூடாது. இதனை மீறினால் பணியாளர், வீட்டின் உரிமையாளர் மீது நடவடிக்கை எடுக்கப்படும். பாதாள சாக்கடை இணைப்பும் துண்டிக்கப்படும். அடைப்புகளை சுத்தம் செய்ய மாநகராட்சியில் இயந்திரங்கள் மூலம் மட்டுமே சுத்தம் செய்ய வேண்டும்.

ஓட்டல்கள், லாட்ஜ்கள், திருமண மண்டபங்கள், மருத்துவமனைகள் போன்றவற்றில் இருந்து கழிவுநீரை பாதாள சாக்கடையுடன் விடுவதற்கு ‘பில்டர்‘ செய்யும் அமைப்பை அந்தந்த நிறுவனங்களே ஏற்படுத்த வேண்டும். நேரடியாக பாதாள சாக்கடைக்குள் கழிவுநீரை விடக்கூடாது. பிளாஸ்டிக் கழிவுகள் பாதாள சாக்கடையை அடைத்து விடும் என்பதால் இந்த நடவடிக்கை எடுக்கப்பட்டுள்ளது.

மாட்டுத்தாவணி பஸ் நிலையத்துக்கும் பூ மார்க்கெட்டுக்கும் இடையில் உள்ள 27 ஏக்கர் நிலத்தில் மல்டி லெவல் சிட்டி மார்க்கெட் உருவாக்க திட்டமிடப்பட்டு உள்ளது. சிங்கப்பூர் நிறுவனம் இதற்கான அனுமதியை கேட்டுள்ளது. இதில் ஸ்டார் ஓட்டல், தியேட்டர்கள் மற்றும் வர்த்தக மையங்கள் இருக்கும். இதன் அருகிலுள்ள வண்டியூர் கண்மாயில் நூறு ஏக்கரில் தீம் பார்க் அமைக்கவும் திட்டம் உருவாக்கப்பட்டு உள்ளது. இதற்கான திட்ட அறிக்கை தயாரிக்கப்பட்டு உள்ளது. விரைவில் அரக்கு அனுப்பி வைக்கப்படும்.

மழையினால் நகரில் உள்ள ரோடுகள் அதிகளவில் சேதம் அடைந்துள்ளன. ரோடுகளை சீரமைக்க ரூ.33.50 கோடி அனுமதி அளித்து டெண்டர் விடப்பட்டுள்ளது. டிசம்பர் முதல் வாரத்தில் சாலை அமைக்கும் பணி துவங்கும். 114 கிலோ மீட்டரில் சாலைகள் சீரமைக்கப்படும். முன்னதாக ரோடுகளில் உள்ள பள்ளங்கள் தற்காலிகமாக சீரமைக்கப்பட்டு வருகின்றன.

மாட்டுத்தாவணி பஸ்நிலையம் அருகே ஆம்னி பஸ்நிலையம் அமைக்கவும், லாரி நிலையம் அமைக்கவும் 10 ஏக்கர் நிலம் ஒதுக்கப்பட்டுள்ளது. இவ்வாறு அவர் கூறினார். தலைமை பொறியாளர் சக்திவேல், துணை ஆணையர் தர்பகராஜ் உடனிருந்தனர்.

ஸ்ரீவைகுண்டம்,நவ.25: நாசரேத்தில் ரூ.70 லட்சத்தில் கான்கிரீட் சாலைகள், தார் சாலைகள் அமைப்பதென பேரூராட்சிக் கூட்டத்தில் தீர்மானம் நிறைவேற்றப்பட்டது.

நாசரேத் பேரூராட்சி மன்ற சாதாரணக் கூட்டம் தலைவர் சா.மாமல்லன் தலைமையில் நிர்வாக அதிகாரி தேவராஜ், துணைத் தலைவர் ஜமீன் சாலமோன் முன்னிலையில் நடைபெற்றது. கூட்டத்தில் நிறைவேற்றப்பட்ட தீர்மானங்கள்:

நாசரேத் பேரூராட்சி 2-வது வார்டு பிரகாசபுரம் மறுகால்துறையில் இருந்து கடம்பாகுளம்வரை செல்லும் ஓடையை தூர்வாரி கழிவுநீர் ஓடையை சீரமைப்பது, சுகாதார கேடு, தொற்று நோய் பரவும் அபாயநிலை உள்ளதால் கொசுவை ஒழிக்க கொசு மருந்து அடிக்கும் இயந்திரம் வாங்குவது, நாசரேத் பேரூராட்சி சிறப்பு சாலைகள் திட்டம் 2010-2011 ஆம் ஆண்டின் கீழ் ரூ.70 லட்சத்தில் பெத்தானியாநகர் முதல் கந்தசாமிபுரம், திருவள்ளுவர் காலனிவரையிலும், திருமறையூர் பஸ்நிறுத்தம் முதல் ஐ.எம்.எஸ். கட்டடம் வரையிலும், ஆசீர்வாதபுரம் சன்னதி தெரு முதல் வகுத்தான்குப்பம் ரோடு வரையிலும், பிரதர்டன் தெரு முதல் பேருந்து நிலையம் சாலை வரையிலும், பிரகாசபுரம் கூட்டுறவு நகர வங்கி முதல் ஏ.டி.ஸ்ரீதரன் வீடு வரையிலும், வகுத்தான்குப்பம் மற்றும் கீழத்தெரு வரையிலும் சிமெண்ட் சாலைகள் அமைக்கவும்,

என்.டி.என்.தெரு, ஜெயபாண்டியன் தெரு முதல் வெள்ளரிக்காயூரணி தேவர் சிலை வரை தார் சாலை அமைக்கவும், 2010-2011 இயக்கம் மற்றும் பராமரிப்பு நிதியில் இருந்து ஆழ்வார்திருநகரி நீரேற்று நிலையம் கிணறு பழுது பார்த்து குழாய் விஸ்தரிப்பு பணியை ரூ.11 லட்சத்தில் மேற்கொள்ளவும் தீர்மானங்கள் நிறைவேற்றப்பட்டன.

கூட்டத்தில் வார்டு உறுப்பினர்கள் கொம்பையா, கனியம்மாள், ராமபுஷ்பம், உத்திரக்குமார், ஜான் ஞான தாஸ், மோகன், மீனா ராஜகுமாரி, ஜெசி ஜேம்ஸ், அன்பு, கஸ்தி ஜெயபால், ஜெயராஜ், செல்வின், சந்திரன், சாராள், மத்தேயு ஜெபசிங் ஆகியோர் கலந்து கொண்டனர்.