Nagara Seithigal - Road Development

திருப்புவனம் பேரூராட்சியில் சிமென்ட் சாலை பணிகளுக்கு ரூ.54 லட்சம் ஒதுக்கீடு

Monday, 22 November 2010 05:54 administrator நாளிதழ்௧ள் - சாலை௧ள் மேம்பாடு

தினகரன் 22.11.2010

திருப்புவனம் பேரூராட்சியில் சிமென்ட் சாலை பணிகளுக்கு ரூ.54 லட்சம் ஒதுக்கீடு

திருப்புவனம், நவ. 22: திருப்புவனம் பேரூராட்சி கூட்டம் தலைவர் பிச்சைமுத்து வைரவன் தலைமையில் நடந்தது. துணை தலைவர் கனகு முன்னிலை வகித்தார். நிர்வாக அதிகாரி சஞ்சீவி மற்றும் 16 கவுன்சிலர்கள் கலந்து கொண்டனர். கூட்டத்தில் தலைவர் பேசுகையில், ``சிறப்பு சாலை திட்டத்தில் 1, 2, 6, 7, 12, 17 ஆகிய வார்டுகளில் சிமென்ட் சாலை அமைக்க ரூ.54 லட்சத்து 80 ஆயிரமும், மானாமதுரை எம்.எல்.ஏ., தொகுதி மேம்பாட்டு நிதியில் புதூரில் அங்கன்வாடி மையம் கட்ட ரூ.2 லட்சத்து 80 ஆயிரம் நிதிஒதுக்கீடு செய்யப்பட்டுள்ளது.

திருப்புவனம் புதூர் மயானம் ரூ.5 லட்சம் மதிப்பில் மேம்படுத்தப்படும். பொது நிதி மூலம் தேரடியில் பொதுக்கழிப்பிடத்திற்கு தண்ணீர் வசதி, 2, 5, 6, 8, 11, 15 ஆகிய வார்டுகளில் வடிகால் சீரமைப்பு, பசும்பொன் நகரில் சிறிய பாலம், புதூரில் நீர்மாலை தொட்டி அமைத்தல் ஆகிய பணிகளை ரூ.6 லட்சம் மதிப்பில் செயல்படுத்த டெண்டர் விடப்பட்டுள்ளது.’’ என்று தெரிவித்தார். கூட்டத்தில் 16வது வார்டு கவுன்சிலர் ஈஸ்வரன் தனது வார்டில் குடிநீர் வசதி போன்ற அடிப்படை வசதி பணிகள் மறுக்கப்படுவதாக கூறி வெளிநடப்பு செய்தார்.

Last Updated on Monday, 22 November 2010 05:55

ரூ.3.95 கோடியில் சாலைகள் மேம்பாடு

Saturday, 20 November 2010 10:17 administrator நாளிதழ்௧ள் - சாலை௧ள் மேம்பாடு

தினமணி 20.11.2010
ரூ.3.95 கோடியில் சாலைகள் மேம்பாடு

கோவில்பட்டி, நவ. 19: சிறப்பு சாலை மேம்பாட்டுத் திட்டம் 2010-11-ன் கீழ் கோவில்பட்டி நகராட்சி பகுதியில் ரூ.3 கோடியே 95 லட்சம் மதிப்பில் சாலைகள் அமைக்கும் பணிக்கு நகர்மன்றக் கூட்டத்தில் அனுமதி அளிக்கப்பட்டது.

கோவில்பட்டி நகர்மன்றத்தின் அவசரக் கூட்டம் வெள்ளிக்கிழமை நடைபெற்றது. நகர்மன்றத் தலைவி மல்லிகா தலைமை வகித்தார். நகராட்சி ஆணையர் விஜயராகவன், துணைத் தலைவர் சந்திரமெüலி முன்னிலை வகித்தனர். கூட்டத்தில் நடைபெற்ற விவாதங்கள்:

கவுன்சிலர் மதி (காங்.): வேலாயுதபுரம் பஸ் நிறுத்த பணிகள் நடைபெறுமா?

ஆணையர்: பணி தொடங்கிய பின்பு நிறுத்தப்பட மாட்டாது.

நாகராஜன் (தி.மு.க.): துப்புரவு பணியாளர்கள் போதுமான அளவு இல்லை. நகரிலுள்ள சுமார் 12 பெரிய வாறுகால்களை சுத்தப்படுத்த ஜே.சி.பி. இயந்திரம் வாங்க வேண்டும்.

தவமணி (தி.மு.க.): கோவில்பட்டி நகரில் இரவில் சுற்றித்திரியும் பன்றிகளைக் கட்டுப்படுத்த வேண்டும். நகராட்சிக்கு ஜெனரேட்டர் வாங்க பலமுறை முறையிட்டும் பயனில்லை.

ஆணையர்: நிதி கிடைத்தவுடன் ஜெனரேட்டர் வாங்குவோம். பன்றிகளைக் கட்டுப்படுத்த ஏற்கெனவே நடவடிக்கை எடுத்து வருகிறோம். மேலும் துரிதப்படுத்துவோம்.

செல்வமணி (காங்.): பங்களாத் தெருவில் குடிநீர் சரியாக விநியோகம் செய்யப்படுவதில்லை. இதுகுறித்து, பலமுறை முறையிட்டும் எந்தவித பலனும் கிடைக்கவில்லை. பங்களாத் தெரு பகுதி குடிநீர் விநியோகத்துக்கு 6 இஞ்ச் பைப் அமைக்க வேண்டும் என்று கூறி, கூட்டத்திலிருந்து வெளிநடப்பு செய்த அவர், சிறிது நேரத்துக்கு பின் மீண்டும் கூட்டத்தில் பங்கேற்றார்.

கவுன்சிலர்கள் செல்வப்பெருமாள் (தி.மு.க.), கருணாநிதி (தி.மு.க.), தெய்வேந்திரன் (ம.தி.மு.க.), பவுன்மாரியப்பன் (ம.தி.மு.க.), ராஜேந்திரன் (ம.தி.மு.க.): தினசரி சந்தையிலுள்ள ஆக்கிரமிப்புகளை அகற்ற வேண்டும். அதுபோன்று நகரில் அனுமதியின்றி கட்டடங்கள், சுவர்கள் கட்டுவோர் மீதும், இடிப்பவர்கள் மீதும் நடவடிக்கை எடுக்க வேண்டும். எந்தவித பாரபட்சமும் இன்றி ஆக்கிரமிப்புகளை அகற்ற வேண்டும். நகர்மன்றத் தலைவி மல்லிகா: உறுப்பினர்கள் அனைவரும் ஒருங்கிணைந்து செயல்பட்டால் ஆக்கிரமிப்புகளை அகற்றுவதில் எந்தவித தயக்கமும் ஏற்படாது என்றார். இக்கூட்டத்தில் 15 தீர்மானங்களில் 12 தீர்மானங்கள் நிறைவேற்றப்பட்டன.

மாநகரில் 60 நாட்களில் புதிய சாலை மாநகராட்சி கூட்டத்தில் தகவல்

Saturday, 20 November 2010 05:46 administrator நாளிதழ்௧ள் - சாலை௧ள் மேம்பாடு

தினகரன் 20.11.2010

மாநகரில் 60 நாட்களில் புதிய சாலை மாநகராட்சி கூட்டத்தில் தகவல்

திருப்பூர், நவ.20: தமிழகம் முழுவதும் உள்ள மாநகராட்சி, நகராட்சி மற்றும் பேரூராட்சிகளில் சேதமடைந்த சாலைகளை சீரமைக்கும் வகையில் ஆயிரம் கோடி ரூபாய் ஒதுக்கீடு செய்து தமிழக அரசு அறிவித்தது. அதன்படி திருப்பூர் மாநகரில் ரூ.21.02 கோடி ஒதுக்கீடு செய்யப்பட்டது. 11ஆக பிரிக்கப்பட்டு பணிகள் டெண்டர் விடப்பட்டது. இதில் 4 பகுதிகளுக்கு பல்வேறு காரணங்களால் டெண்டர் கோரப்படவில்லை. மீதமுள்ள 7 பணிகளுக்கு டெண்டர் கோரப்பட்டது. அனைத்து பணிகளுக்கும் மதிப்பீட்டு தொகையை விட 6.62 சதவீதம் முதல் 11.20 சதவீதம் வரை அதிகமாக டெண்டர் கோரப்பட்டிருந்தது. டெண்டர் தொகையை குறைத்து கொடுக்க ஒப்பந்ததாரர்களிடம் மாநகராட்சி நிர்வாகம் கேட்டுக்கொண்டதை, 2, 3 முறை விலை குறைப்பு செய்யப்பட்டது. அதிலும் மதிப்பீட்டு தொகையை விட 1.96 சதவீதம் முதல் 3.87 சதவீதம் வரை கூடுதல் தொகைக்கு டெண்டர் கோரப்பட்டிருந்தது.

கட்டுமான பொருட்கள் விலை உயர்வு மற்றும் தொழிலாளர்கள் கூலி உள்ளிட்ட காரணங்களால் இந்த டெண்டர் தொகைக்கே பணிகளை மேற்கொள்ள மாநகராட்சி நிர்வாகம் முடிவு செய்தது. இது தொடர்பான தீர்மானம் மாநகராட்சி மன்ற அவசர கூட்டத்தில் நேற்று முன்வைக்கப்பட்டது.

மாநகராட்சி மேயர் செல்வராஜ் தலைமையில் நடந்த இந்த கூட்டத்துக்கு, மாநகராட்சி ஆணையாளர் ஜெயலட்சுமி, துணை மேயர் செந்தில்குமார் உள்ளிட்டோர் முன்னிலை வகித்தனர்.

கூட்டத்தில் 7 பகுதிகளாக பிரிக்கப்பட்டு டெண்டர் விடப்பட்ட பணிகளுக்கு ஒப்புதல் வழங்கப்பட்டது. கூட்டத்தில் பேசிய அ.தி.மு.க. கவுன்சிலர் முருகசாமி, ‘’ரூ.40 கோடி மதிப்பீட்டில் மேற்கொள்ளப்பட்ட சாக்கடை பணிகளில் காலதாமதம், தரமின்மை என பல்வேறு பிரச்னைகள் எழுந்தன. அதேபோன்று, இதிலும் பிரச்னைகள் எழாத வகையில் பணிகளை மேற்கொள்ள வேண்டும்.அந்த திட்டத்தை விட இதில் மாநகராட்சி நிர்வாகம் கூடுதல் கவனம் செலுத்த வேண்டும். இந்த திட்டம் எப்போது முடிக்க வேண்டும் என்ற காலக்கெடு விதிக்கப்பட்டுள்ளதா என்பதை மாநகராட்சி நிர்வாகம் தெளிவுபடுத்த வேண்டும்," என்றார்.

இதற்கு பதிலளித்த ஆணையாளர் ஜெயலட்சுமி, "மாநகரில் சிறப்பு சாலைகள் திட்டத்தின் கீழ் மேற்கொள்ளப்படும் பணிகள், பணி உத்தரவு வழங்கப்பட்ட நாளில் இருந்து 60 நாட்களுக்குள் முடிக்க வேண்டும் என அறிவுறுத்தப்பட்டுள்ளது. பணிகள் தரத்துடன் நடக்கிறதா என்பது மிகவும் கவனத்துடன் கண்காணிக்கப்படும்," என்றார். இதையடுத்து தீர்மானங்கள் கவுன்சிலர்கள் ஆதரவுடன் நிறைவேற்றப்பட்டது.

மதிப்பீட்டு தொகையை விட 1.96 சதவீதம் முதல் 3.87 சதவீதம் வரை கூடுதல் தொகைக்கு டெண்டர் விடப்பட்டுள்ள நிலையில், கூடுதல் தொகையை மாநகராட்சி நிதியில் இருந்து செலவிடவும் மாமன்றத்தில் தீர்மானம் கொண்டு வரப்பட்டு நிறைவேற்றப்பட்டது.

More Articles...