Urban News

ஆவடி, செப். 30: ஆவடியில் பாதாள சாக்கடை திட்டத்தால் பாழடைந்த சாலைகளை சீரமைப்பது உள்ளிட்ட பல்வேறு நலப்பணிகளுக்கு ரூ2 கோடி நிதி ஒதுக்கீடு செய்யப்பட்டுள்ளதாக நகராட்சி தலைவர் விக்டரி மோகன் தெரிவித்தார்.

ஆவடி நகராட்சி உறுப்பினர்கள் கூட்டம் தலைவர் விக்டரி மோகன் தலைமையில் நேற்று நடந்தது. துணைத் தலைவர் எஸ்.அப்துல் ரகீம் மற்றும் அதிகாரிகள் முன்னிலை வகித்தனர். கவுன்சிலர்கள் நடத்திய விவாதம்:

சவுந்தரராஜன் (பகுஜன் சமாஜ்):

திருமுல்லைவாயல் தென்றல் நகர் பகுதியில் பாதாள சாக்கடை, குடிநீர் திட்ட பணிகளை விரைவில் தொடங்க வேண்டும். சரஸ்வதி நகர் முதல் திருமுல்லைவாயல் காலனி வரை சோடியம் விளக்குகள் அமைக்க வேண்டும்.

ராஜேந்திரன் (திமுக):

நகராட்சி பகுதிகளில் குப்பை அகற்றும் தனியார் நிறுவனம் குப்பை தொட்டிகளையும், ஊழியர்களின் எண்ணிக்கையையும் அதிகப்படுத்த வேண்டும்.

துரைராஜ் (திமுக):

நகராட்சியில் உள்ள அனைத்து வார்டுகளிலும் பொது கழிப்பிடம் கட்ட வேண்டும். சேக்காடு பகுதியில் சாலையோரம் இடையூறாக உள்ள மின்கம்பங்களை அகற்றி பஸ் வசதி செய்து தர வேண்டும்.

பழனி (பாமக):

மக்கள் பிரச்னைக்காக போராடிய கவுன்சிலர் பசுபதியை போலீசார் கைது செய்ததற்கு கண்டனம் தெரிவிக்கிறோம். இவ்வாறு விவாதம் நடந்தது.

கூட்டத்தில், கவுன்சிலர்கள் பசுபதி, வசந்தராஜ், தீனதயாளன், அமீத்பாபு, ரேவதி கலா, ஜான், சேகர், செல்வராஜ், முல்லைராமன், சுப்பிரமணியன் உட்பட பலர் கலந்து கொண்டனர்.

நகராட்சி தலைவர் விக்டரி மோகன் பேசியதாவது:

நகராட்சியில் பாதாள சாக்கடை திட்டத்தால் பழுதடைந்த சாலைகளை சீரமைக்க ரூ60 லட்சமும், சேக்காடு பகுதியில் தார்சாலையை சீரமைக்க ரூ25 லட்சமும், புதிய குப்பை தொட்டி வாங்க ரூ9.5 லட்சமும் ஒதுக்கப்படுகிறது.

அண்ணனூரில் நகராட்சி பள்ளியில் புதிய கட்டிடம் கட்ட ரூ25 லட்சமும், மழைநீர் கால்வாய் மற்றும் சிறுபாலம் கட்ட ரூ37 லட்சமும், ஆவடி பேருந்து நிலையத்தில் புதிய கழிவறை கட்ட ரூ5 லட்சமும், பருத்திப்பட்டு சுகாதார மையத்தை சீரமைக்க ரூ5 லட்சமும், திருமுல்லைவாயலில் புதிய சுய உதவிக்குழு கூடம் அமைக்க ரூ5 லட்சமும், 36வது வார்டில் உள்ள சமுதாய கூடத்தில் அடிப்படை வசதிகள் செய்ய ரூ13 லட்சமும் உட்பட ரூ2 கோடிக்கு நிதி ஒதுக்கப்பட்டுள்ளது. இவ்வாறு அவர் கூறினார்.

கோபிசெட்டிபாளையம்: கோபியில் ரோடுகளை மேம்படுத்த 4.56 கோடி ரூபாயை தமிழக அரசு ஒதுக்கியுள்ளது.தமிழகத்தில் ரோடு மேம்படுத்த ஊரக மற்றும் உள்ளாட்சி துறை சார்பில் சிறப்பு சாலைகள் திட்டம் 2010-11ல் 1,000 கோடி ரூபாயில் அறிவிக்கப்பட்டது. மாநகராட்சி, நகராட்சி, டவுன் பஞ்சாயத்து மற்றும் கிராம பஞ்சாயத்துகளில் ரோடு சீரமைப்பு பணிக்கு ஒதுக்கப்பட்ட நிதிக்கான உத்தரவை, உள்ளாட்சி அமைப்பு பிரதிநிதிகள் மற்றும் அதிகாரிகளிடம் சென்ற வாரம் துணை முதல்வர் ஸ்டாலின் வழங்கினார்.
கோபி நகராட்சியில் ரோடு மேம்படுத்த பல கோடி ரூபாய் மதிப்பில் திட்ட மதிப்பீடு தயார் செய்யப்பட்டு, நகராட்சி கூட்டத்தில் தீர்மானம் நிறைவேற்றப்பட்டு அரசுக்கு ஏற்கனவே அனுப்பப்பட்டது. இதையேற்று, நான்கு கோடியே 56 லட்சத்து 15 ஆயிரம் ரூபாயை தமிழக அரசு ஒதுக்கீடு செய்துள்ளது.

கோபி நகராட்சியை சேர்ந்த ஐந்து கவுன்சிலர்கள், தி.மு.க., வுக்கு தாவியதால் கடந்த ஃபிப்ரவரி மாதம் முதல் தீர்மானங்களை நிறைவேற்றுவதில் பெரும் சிக்கல் ஏற்பட்டது. பின்னர் தி.மு.க., காங்., கவுன்சிலர்கள் இடையே ஏற்பட்ட கருத்து வேறுபாட்டால் தீர்மானங்கள் நிறைவேற்றப்பட்டன.தற்போது, ஒதுக்கப்பட்ட நிதியை 18 வார்டுகளில் மட்டும் ரோடு பணி மேற்கொள்ள இன்று காலை நடக்கும் சிறப்பு கூட்டத்தில் தீர்மானம் முன் வைக்கப்பட்டுள்ளது. சிறப்பு சாலைகள் திட்டத்தின் கீழ் நிதி ஒதுக்கீடு பெறாத தி.மு.க.,வை சேர்ந்த பெருமாள், செந்தில் வடிவு, ராக்கியண்ணன், சண்முகம், அ.தி.மு.க., வை சேர்ந்த மாருச்சாமி, தேன்மொழி, மரகதம், காங்., கட்சியை சேர்ந்த கோபிநாத், மாரிமுத்து, கனகராஜ், மார்க்சிஸ்ட் கட்சியை சேர்ந்த துரைசாமி, ம.தி.மு.க.,வை சேர்ந்த சாமிநாதன் ஆகியோர், இன்றைய நகராட்சி கூட்டத்தில் நிதி கேட்பர் அல்லது தீர்மானங்களை ஒத்திவைக்க கோருவர்.எட்டு மாதங்களாக தீர்மானங்களை நிறைவேற்றுவதில் பெரும் புயல் வீசி வரும் கோபி நகராட்சியில், இன்று நடக்கும் கூட்டத்திலும் பரபரப்புக்கு பஞ்சம் இருக்காது என எதிர்பார்க்கப்படுகிறது.