Urban News

திண்டுக்கல், செப். 29:திண்டுக்கல் நகராட்சி பகுதியில் புதிய சாலை அமைக்க ரூ,10 கோடி நிதி ஒதுக்கீடு செய்யப்பட்டுள்ளது. திண்டுக்கல் நகரில் பாதாள சாக்கடை திட்டபணிக்காக நகரின் பல இடங்களில் குழிகள் தோண்டப்பட்டது. குழிகள் தோண்டப்பட்ட இடங்களில் பெருமளவில் திட்டபணிகள் முடிவடைந்தது. இப்பணிகள் முடிந்த நகரின் முக்கிய பகுதிகளான ஸ்கீம்ரோடு, ரவுண்ரோடு, மெயின்ரோடு, பெல்பார்க்ரோடு உள்ளிட்ட 8 கி.மீ. து£ரத்திற்கான சாலைகள் சிமென்ட் சாலைகளாக மாற்றப்படுகிறது. மேலும் 10 கி.மீ. து£ரத்திற்கான சாலைகள் பேவர்ரோடுகளாக அமைக்கப்படுகிறது. ரூ.2.6 கோடி மதிப்பில் ராணி மங்கம்மாள் சாலை நடுவில் விளக்குகள் அமைத்து அவற்றை இரு வழிச்சாலைகளாக தனியாக பிரித்து தரம் உயர்த்தப்படுகிறது. இதேபோல் ரூ.1.8 கோடி மதிப்பில் ரவுண்ட்ரோடு சாலையும் அதில் நடைப்பயிற்சி மேற்கொள்ளவதற்காக தனிப்பாதைகள் மற்றும் ஓய்வு இருக்கைகளும் அமைக்கப் படுகிறது. இது தவிர முக்கிய சாலைகளை இணைக்கும் துணை சாலைகளும் புதியதாக அமைக்கப்பட இருக்கிறது.

இந்நிலையில் நேற்று தமிழக அரசு நிதி ஒதுக்கீடு செய்த ரூ.10 கோடிக்கான நிர்வாக அனுமதி உத்தரவை வருவாய்துறை அமைச்சர் ஐ.பெரியசாமி, கமிஷனர் லெட்சுமியிடம் வழங்கினார். நிகழ்ச்சியில் நகர்மன்ற தலைவர் நடராஜன், தலைமை பொறியாளர் ராமசாமி, நகர்நல அலுவலர் வரதராஜன் உள்பட பலர் கலந்துகொண்டனர்.

பெரியகுளம், செப்.29: தாமரைக்குளம் பேரூராட்சியில் ரூ.59 லட்சம் மதிப்பீட்டில் சிமெண்ட் சாலைகள் அமைக்க பேரூராட்சி கூட்டத்தில் ஒப்புதல் அளிக்கப்பட்டது.

தாமரைக்குளம் பேரூராட்சி மன்ற கூட்டம், தலைவர் அன்பழகன் தலைமையில் நடந் தது.துணைத்தலைவர் தவமணி ஆறுமுகம், செயல் அலுவலர் காமாட்சி முன்னிலை வகித்தனர். கவுன்சிலர்கள் சிங்கன், துரைராஜ், பழனியம்மாள், முருகேசன், வனிதா, அக்கிம்ராஜா, மைதிலி அன்பழகன், முருகன், பாலையா, முத்து, ராமதண்டபாணி, முருகேசன், டெய்சி ஆகியோர் தங்கள் வார்டுகளில் மேற்கொள்ளவேண்டிய பணிகள் குறித்து பேசினர்.

கூட்டத்தில் சிறப்பு சாலை திட்டத்தின் கீழ் 1, 2, 3, 4, 5, 7 ஆகிய வார்டு பகுதிகளில் ரூ.19 லட்சத்து 70 ஆயிரமும், வார்டு 8, 13, 14, 15 ஆகிய பகுதிகளில் ரூ.19 லட்சத்து 30 ஆயிரமும், வார்டு 7, 8 ஆகிய பகுதிகளில் ரூ.19 லட்சத்து 50 ஆயிரம் மதிப்பீட்டில் சிமெண்ட் சாலைகள் அமைக்க கூட்டத்தில் ஒப்புதல் அளிக்கப்பட்டது. இதனை தொடர்ந்து ஒப்பந்தப்புள்ளி கோரப்பட்டு பணிகள் நடைபெற நடவடிக்கை மேற்கொள்ளப்பட உள்ளது.

பேரூராட்சி பகுதியில் ரூ.7 லட்சம் மதிப்பீட்டில் சமுதாயக்கூடம் கட்டும் பணிக்கு பெரியகுளம் சட்டமன்ற உறுப்பினர் தொகுதி மேம்பாட்டு திட்டத்தின் கீழ் பணிகள் மேற்கொள்வது சம்பந்தமாக மாவட்ட ஊரக வளர்ச்சி முகமையில் இருந்து பெறப்பட்ட கடிதத்திற்கும் ஒப்புதல் அளிப்பது உள்பட 7 தீர்மானங்கள் நிறைவேற்றப்பட்டன.