தினமணி 11.08.2010
மாநகராட்சி பள்ளி மாணவர்களுக்கு இலவச கான்வாஸ் ஷூ வழங்க திட்டம்
கோவை, ஆக. 10: கோவை மாநகராட்சியில் துவக்கப் பள்ளி மாணவ மாணவிகளுக்கு இலவச கான்வாஸ் ஷூ வழங்கத் திட்டமிடப்பட்டுள்ளது. இதற்கான மாதிரிகளை கல்விக் குழுவினர் செவ்வாய்க்கிழமை ஆய்வு செய்தனர்.
இக் குழுவின் கூட்டம், குழுத் தலைவர் ஆர்.கல்யாணசுந்தரம் தலைமையில் செவ்வாய்க்கிழமை நடைபெற்றது. கல்விஅலுவலர் (பொ) சோமசுந்தரி முன்னிலை வகித்தார். இக் கூட்டத்தில் எடுக்கப்பட்ட முடிவுகள்:
மாநகராட்சி ஆரம்பப் பள்ளி மற்றும் நடுநிலைப் பள்ளிகளில் செயல்வழிக் கற்றல் வகுப்புகள் நடக்கும்போது மாணவ மாணவிகள் அமர்ந்து படிக்கும் வகையில் 1,170 வட்ட மேஜைகள், 7 ,322 பிளாஸ்டிக் இருக்கைகள் வாங்க வேண்டும்.
1 முதல் 5 வகுப்பு வரை பயிலும் 9,628 மாணவ மாணவிகளுக்கு ஒரு ஜோடி கான்வாஸ் ஷூ | 19 லட்சத்து 25 ஆயிரம் மதிப்பில் வாங்க, அனுமதி வழங்கப்பட்டது. இதற்கான மாதிரியை கல்விக்குழுவினர் ஆய்வு செய்தனர்.
மாநகராட்சி பகுதியில் அமைக்கப்பட்ட அனைத்து பூங்காக்களிலும் அதிக எண்ணிக்கையில் மூலிகை செடிகள் நட வேண்டும். மாநகராட்சி மைதானங்களை வர்த்தக நோக்கில் பயன்படுத்தக் கூடாது என்று இக் கூட்டத்தில் முடிவு செய்யப்பட்டது. கூட்டத்தில் உதவி நிர்வாகப் பொறியாளர் கருப்பசாமி, வ.உ.சி. பூங்கா இயக்குநர் பெருமாள்சாமி ஆகியோர் பங்கேற்றனர்.
