Urban News

கோவை, ஜூலை 21: மூன்று ஆண்டுகளுக்குப் பின் ஒருவழியாக மாநகராட்சி பள்ளிகளில் 1,204 பெஞ்ச், டெஸ்குகள் புதன்கிழமை ஒப்படைக்கப்பட்டன.

கோவை மாநகராட்சியில் மொத்தமுள்ள 87 பள்ளிகளுக்கு ரூ. 87.5 லட்சத்தில் பெஞ்ச், டெஸ்க் வாங்க 2007 டிசம்பரில் ஒப்பந்தப்புள்ளி கோரப்பட்டது. கிழக்கு மண்டலத்துக்கு ரூ. 21 லட்சத்திலும், மேற்கு மண்டலத்தில் ரூ. 24 லட்சத்திலும், வடக்கு மண்டலத்தில் ரூ. 22.75 லட்சத்திலும், தெற்கு மண்டலத்தில் ரூ. 19.75 லட்சத்திலும் பெஞ்ச், டெஸ்க் வாங்க முடிவு செய்யப்பட்டது.

ஒப்பந்தப் புள்ளி திறனாய்வுக் குழுவின் ஆலோசனைப்படி, சிவகங்கை மாவட்டம், காரைக்குடியில் உள்ள தனியார் நிறுவனத்துக்கு இந்த ஒப்பந்தப் புள்ளி 2008 மார்ச்சில் வழங்கப்பட்டது.

÷இதையடுத்து கல்விக்குழுத் தலைவர் ஆர்.கல்யாணசுந்தரம் தலைமையில் குழு உறுப்பினர்கள் மற்றும் அதிகாரிகள், காரைக்குடியில் உள்ள சம்பந்தப்பட்ட நிறுவனத்தில் அதிரடி ஆய்வு செய்தனர்.

÷அரசு நிறுவனமான காதிகிராப்ட் அல்லது டான்சி நிறுவனத்தில் பெஞ்ச், டெஸ்குகளை ஆர்டர் செய்யலாம் என இக்குழு பரிந்துரை செய்தது. இதன்படி, டெஸ்க், பெஞ்சுகளை டான்சி நிறுவனத்தில் கொள்முதல் செய்ய ஒப்புதல் அளிக்கலாம் என்று, மாமன்றக் கூட்டத்தில் தீர்மானம் நிறைவேற்றப்பட்டது.

÷மண்டல வாரியாக உள்ள பள்ளிகளுக்கு இப் புதிய பெஞ்ச், டெஸ்குகள் ஒப்படைக்கப்பட்டு வருகின்றன. சித்தாபுதூர் மாநகராட்சி மேல்நிலைப் பள்ளியில் புதிய பெஞ்ச், டெஸ்குகள் ஒப்படைக்கும் நிகழ்ச்சி செவ்வாய்க்கிழமை நடைபெற்றது. இவற்றை கல்விக்குழுத் தலைவர் கல்யாணசுந்தரம் ஒப்படைத்தார்.

மாநகராட்சியில் பெரும்பாலான துவக்கப் பள்ளிகளில் குழந்தைகள் தரையில் அமர்ந்து படிக்கும் நிலை இருந்தது. புது பெஞ்ச், டெஸ்குகள் கிடைத்துள்ளதால், குழந்தைகள் தரையில் அமர்ந்து படிக்க வேண்டிய அவலநிலை மாறியுள்ளது.

பள்ளிச் சிறுவர்களுக்கு கண்ணொளி காப்போம் திட்டத்தில் தலைமைச் செயலகத்தில் புதன்கிழமை மாணவிக்கு இலவச கண் கண்ணாடி வழங்குகிறார் முதல்வர் கருணாநிதி. உடன் மேயர்.

சென்னை, ஜூலை 21: சென்னை மாநகராட்சியின் திட்டங்களின் கீழ், நல உதவிகளை முதல்வர் கருணாநிதி புதன்கிழமை வழங்கினார். இதற்கான நிகழ்ச்சி தலைமைச் செயலகத்தில் நடைபெற்றது.

மாநகராட்சியின் பள்ளிச் சிறார் கண்ணொளி காப்போம் திட்டத்தின் கீழ் 5 ஆயிரத்து 186 மாணவ மாணவியருக்கு ரூ.20 லட்சம் செலவில் இலவச கண் கண்ணாடிகள் வழங்கப்படுகின்றன. இதற்கான தொடக்க நிகழ்ச்சியில், 20 குழந்தைகளுக்கு இலவசக் கண்ணாடிகளை வழங்கினார் முதல்வர் கருணாநிதி.

இதேபோன்று, சென்னை மாநகராட்சி சார்பில் ஆயிரம் விளக்குப் பகுதியில் தசைத்திறன் குறைபாடு உள்ளவர்களுக்கான சிறப்புப் பள்ளி நடத்தப்பட்டு வருகிறது.

இந்தப் பள்ளிக்கு மாணவர்களை பெற்றோருடன் அழைத்து வருவதற்காக தாய் நவநீதம் குப்புசாமி அறக்கட்டளை மற்றும் ஸ்ரீஜெயா கல்வி அறக்கட்டளை சார்பில் ரூ.17 லட்சம் மதிப்பிலான தனித்தன்மையுடன் கூடிய பஸ் அளிக்கப்பட்டுள்ளது. இதற்கான சாவியை, மாநகராட்சி மேயர் மா.சுப்பிரமணியத்திடம் முதல்வர் அளித்தார்.

நிகழ்ச்சியில், நகராட்சி நிர்வாகம் மற்றும் குடிநீர் வழங்கல் துறையின் முதன்மைச் செயலாளர் அஷோக் வரதன் ஷெட்டி, சென்னை மாநகராட்சி இணை ஆணையர் ஆஷிஷ் சட்டர்ஜி, துணை ஆணையர்கள் ஜோதி நிர்மலா, பாலாஜி ஆகியோர் பங்கேற்றனர்.