Urban News

மயிலாடுதுறை, மே 20: மயிலாடுதுறை கல்வி மாவட்டத்தில் பிளஸ் 2 பொதுத்தேர்வில் அரசு மற்றும் நகராட்சி மேனிலைப்பள்ளிகளில் முதல் நான்கு இடங்களையும் பெற்று கூரைநாடு கிட்டப்பா நகராட்சி மேனிலைப்பள்ளி பெற்று சாதனை படைத்துள்ளது.

மயிலாடுதுறை கல்வி மாவட்டத்தில் உள்ள அனைத்து அரசு மற்றும் நகராட்சி பள்ளிகளில் மயிலாடுதுறை கிட்டப்பா நகராட்சி மேனிலைப்பள்ளி மாணவி தையல்நாயகி 1,124 மதிப்பெண்கள் பெற்று முதல் இடத்தை பிடித்துள்ளார். விஜயராகவன் 1,090 மதிப்பெண்களை பெற்று இரண்டாமிடத்தையும், பிருதிவிகுமார் 1,076 மதிப்பெண்களை பெற்று மூன்றாமிடத்தையும், ரம்ய ரேவதி 1,071 மதிப்பெண்களை பெற்று நான்காம் இடத்தையும் பிடித்து சாதனை படைத்துள்ளனர்.

1,124 மதிப்பெண்கள் பெற்ற தையல்நாயகி நாகை வருவாய் மாவட்டத்தில் அரசு மற்றும் நகராட்சி மேல்நிலைப்பள்ளிகள் அளவில் இரண்டாமிடத்தையும் பெற்றுள்ளார். தையல்நாயகி பத்தாம் வகுப்பு பொதுத்தேர்வில் நகராட்சி மற்றும் மாநகராட்சி பள்ளிகளில் மாநிலத்தில் முதல் இடத்தை பெற்று துணை முதல்வர் ஸ்டாலினால் பாராட்டும் பரிசும் பெற்றவர். சாதனை படைத்த மாணவர்கள் மற்றும் மாணவிகளையும் அவர்களின் வெற்றிக்கு உழைத்த ஆசிரியர்களையும் தலைமை ஆசிரியர் முருகதாஸ், உதவி தலைமை ஆசிரியர் அன்புச்செல்வன், விசாலம், பன்னீர்செல்வம் ஆகியோர் பாராட்டினர்.

திருச்சி, மே 19: திருச்சியில் புதன்கிழமை நடைபெற்ற மாவட்டம்விட்டு மாவட்டம் மாறுதல் கோரும் ஆசிரியர்களுக்கான கலந்தாய்வு நிகழ்ச்சியில் 132 பேருக்கு பணியிட மாறுதல் ஆணை வழங்கப்பட்டது.

திருச்சியில் அரசு, நகராட்சி, மாநகராட்சி உயர்நிலை, மேல்நிலைப் பள்ளிகளில் பணிபுரியும் முதுநிலை ஆசிரியர்கள், பட்டதாரி ஆசிரியர்கள், தமிழாசிரியர்கள், இடைநிலை ஆசிரியர்கள், சிறப்பாசிரியர்கள், உடல் கல்வி ஆசிரியர்கள், ஆசிரியர் பயிற்றுநர்கள் ஆகியோருக்கான பொது மாறுதல் கலந்தாய்வு நிகழ்ச்சி செவ்வாய்க்கிழமை தொடங்கியது.மாவட்டத்துக்குள் மாறுதல் கோரிய ஆசிரியர்களில் 142 பேருக்கு செவ்வாய்க்கிழமை ஆணைகள் வழங்கப்பட்டன.

இதைத்தொடர்ந்து, மாவட்டம்விட்டு மாவட்டம் மாறுதல் கோரிய ஆசிரியர்களுக்கான கலந்தாய்வு நிகழ்ச்சி புதன்கிழமை நடைபெற்றது.

முதன்மைக் கல்வி அலுவலர் கி. சுவாமிநாதன் தலைமையில் நடைபெற்ற இந்த நிகழ்ச்சியில் முதுநிலை ஆசிரியர்கள் 162 பேரும், பட்டதாரி ஆசிரியர்கள் 337 பேரும், இடைநிலை ஆசிரியர்கள் 26 பேரும், உடல் கல்வி ஆசிரியர்கள் 19 பேரும், ஓவிய ஆசிரியர்கள் 7 பேரும், ஆசிரியர் பயிற்றுநர்கள் உள்பட மொத்தம் ஏறத்தாழ 600 பேர் கலந்து கொண்டனர்.இவர்களில் 35 முதுநிலை ஆசிரியர்களுக்கும், 51 பட்டதாரி ஆசிரியர்களுக்கும், 6 இடைநிலை ஆசிரியர்களுக்கும், 14 தமிழாசிரியர்களுக்கும், 3 உடல் கல்வி ஆசிரியர்களுக்கும், 2 ஓவிய ஆசியர்களுக்கும், 21 ஆசிரியர் பயிற்றுநர்களுக்கும் என மொத்தம் 132 பேருக்கு இட மாறுதல் ஆணை வழங்கப்பட்டது.