Urban News

கோவை: தமிழகத்தில் இலவசத்திற்கு பஞ்சம் இருக்காது என்பதை நிரூபிக்கும் வகையில் இந்தியாவிலேயே முன்னோடி திட்டமாக கோவை மாநகராட்சிக்கு உட்பட்ட பள்ளிகளில் ஏழை மாணவ, மாணவிகளுக்கு காலை சிற்றுண்டி வழங்கிட முடிவு செய்யப்பட்டுள்ளது. தமிழகத்தில் காமராஜர் காலத்தில் மதிய உணவு திட்டம் கொண்டு வரப்பட்டு எம்.ஜி.ஆர்., கருணாநிதி, ஜெ., ஆகியோர் ஆட்சி காலத்தில் போஷாக்கான உணவுடன் கவர்ச்சியும் இணைந்த முட்டை கீரை என பல வடிவங்கள் பெற்றது. சத்துணவு திட்டத்தின் கீழ் தமிழகத்தில் கோடிக்கணக்கான மாணவ , மாணவிகள் மதிய உணவு உட்கொண்டு தங்களது படிப்பை தொடர்ந்து வருகின்றனர்.

இந்த தருணத்தில் புதுமையான திட்டத்தை கோவை மாநகராட்சி அறிவித்துள்ளது. இன்றைய பட்ஜெட்டில் மாநகராட்சி நிர்வாகத்தின் கீழ் செயல்படும் பள்ளிகளில் பயிலும் மாணவ, மாணவிகளுக்கு காலை சிற்றுண்டி வழங்கும் திட்டம் அறிவிக்கப்பட்டுள்ளது. இந்த திட்டத்திற்கு ரூ. கோடி ஒதுக்கப்பட்டுள்ளது. இன்று மேயர் வெங்கடாசலம் தலைமையில் நடந்த கூட்டத்தில் தாக்கலான பட்ஜெட்டில் இந்த அறிவிப்பு வெளியானதும் ஆளும் தி.மு.க., மற்றும் காங்கிரஸ் கவுன்சிலர்கள் கரவொலி எழுப்பி வரவேற்றனர்.

கமிஷன் ஆய்வுக்கு பின்னர் முடிவு : கோவை மாநகராட்சி கல்விக்குழுவால் பரிந்துரை செய்யப்பட்டு பின்னர் ஆய்வு நடத்த ஓரு குழு அமைக்க கமிஷனர் அன்சுல் மிஸ்ரா உத்தரவிட்டார். இந்த ஆய்வு குழு படி தாக்கல் செய்த அறிக்கையில் ; கோவையில் ஏழை மாணவர்கள் தான் மாநகராட்சி பள்ளியில் படிக்கின்றனர். இவர்கள் வறுமை காரணமாக காலை உணவு கிடைக்காத போது பள்ளிக்கு செல்ல வேண்டுமா என்று எண்ணத்தோன்றும். எனவே அவர்களுக்கு இந்த பிரச்னை இருக்கக்கூடாது என்றும் , இதற்கு காலை சிற்றுண்டி வழங்கினால் நலம் என தெரிவித்தது. இதன்படி மாணவ, மாணவிகளின் உடல் நலன் மற்றும் கல்வி அறிவை கருத்தில் கொண்டும் இந்த திட்டம் உருவாக்கப்பட்டுள்ளது என்றார் மாநகராட்சி அதிகாரி ஒருவர்.

கோவை மாநகராட்சிக்குட்பட்ட 85 பள்ளிகளில் முதற்கட்டமாக ரூ. 2 கோடி ஒதுக்கப்பட்டுள்ளது. எந்த வகையான உணவுகள் வழங்கலாம் என்பது குறித்து அதிகாரிகள் ஆலோசித்து முடிவு செய்வர். இந்த திட்டத்தில் 33 ஆயிரம் பேர் பயன்பெறுவர். இந்த காலை சிற்றுண்டி திட்டம் இந்தியாவிலேயே இல்லாத திட்டம் என்பதால் பிற மாநிலங்களிலும், தமிழகத்தில் பிற மாநகராட்சிகளும் இந்த புதிய திட்டத்தை பின் பற்றும் என எதிர்பார்க்கப்படுகிறது.

அரக்கோணம்:வேலூர் மாவட்டத்தில் பாழடைந்த நிலையில் உள்ள சத்துணவு கூடங் களை புதுப்பிக்க நிதி ஒதுக்கீடு செய்யப்பட்டுள்ளது.வேலூர் மாவட்டத்தில் ஒன்றியம் மற்றும் நகராட்சிக்கு உட்பட்ட தொடக்க மற்றும் நடுநிலைப்பள்ளிகளில் உள்ள சத்துணவு கூடங்களில் சில பாழடைந்த நிலையிலும், சுகாதாரம் இல்லாமலும் நிலை யிலும் உள்ளன. இதனால் பள்ளி மாணவர்களுக்கு சத்துணவு சமைக்கும் போது, எதிர்பாராத விதமாக சாம்பாரில் பல்லி, சாதத்தில் புழு, பூச்சிகள் விழுந்து விடுகின்ற. இந்த உணவுகளை மாணவர்களுக்கு பரிமாறும் போது வாந்தி, மயக்கம் ஏற்படுகிறது.

இதுபோன்ற பிரச்னைகளை தவிர்க்கும் விதமாக வேலூர் மாவட்டத்தில் முதல் கட்டமாக 60 பள்ளிகளில் உள்ள சத்துணவு கூடங்களை புதுப்பிக்க தலா 10 ஆயிரம் வீதம் 6 லட்சம் ரூபாய் நிதியை அரசு ஒதுக்கீடு செய்துள்ளது. வேலூர் மாவட்டத்தில் உள்ள 20 ஒன்றியங்களில் தலா 2 பள்ளிகள் வீதமும், மீதமுள்ள 20 பள்ளிகள், நகராட்சி பள்ளிகளுக்கும் நிதி ஒதுக்கீடு செய்யப்படுகிறது.

இந்த நிதியை பெற, அந்தந்த பி.டி.ஓ., அலுவலக சத்துணவு பிரிவு அதிகாரிகள், சம்பந்தப் பட்ட சத்துணவு கூடத்துக்கு நேரடியாக சென்று ஆய்வு செய்து, அறிக்கையை மாவட்ட திட்ட அலுவலருக்கு அனுப்பி வைக்க வேண்டும்.இந்த நிதி ஒதுக்கீடு, முதலில் முந்துபவர்களுக்கே அதாவது முதலில் அறிக்கை அனுப்புவர்களுக்கே கிடைக்கும் என அதிகாரிகள் தெரிவித்தனர்.மாணவர்கள் நலனில் அக்கறை கொண்ட அதிகாரிகள், பாழடைந்த சத்துணவு கூடங்களுக்கு 'விசிட்' செய்யும் பணியில் இறங்கியுள்ளனர்.