தினமணி 24.02.2010
நகராட்சி இணையதள தகவல்களை புதுப்பிக்கும் பணி தீவிரம்
கடையநல்லூர், பிப். 23: தினமணி செய்தி எதிரொலியாக நகராட்சிகளில் இணையத்தில் தகவல்களைப் புதுப்பிக்கும் பணி மும்முரமாக நடைபெற்று வருகிறது.
கடையநல்லூர் நகராட்சியின் இணையதளத்தில் 2006- 07 ஆம் ஆண்டிற்கான தகவல்கள் மட்டுமே பதிவு செய்யப்பட்டு இருந்தன. இந்நிலையில், இது குறித்த செய்தி அண்மையில் தினமணியில் வெளியானது.
இதனையடுத்து, உடனடியாக கடையநல்லூர் நகராட்சியின் இணையதளத்தை புதுப்பிக்கும் படி நகராட்சி மண்டல இயக்குநர் மோகன் உத்தரவிட்டார். இதன்படி கடையநல்லூர் நகராட்சி இணையதளத்தில் தகவல்கள் துரிதமாக புதுப்பிக்கப்பட்டு வருகின்றன. இதற்கிடையே, நகராட்சி மற்றும் குடிநீர் வழங்கல் துறையானது அனைத்து நகராட்சிகளும் இணைய தளத்தை முறையாக புதுப்பிக்க வேண்டும் என அறிவுறுத்தியுள்ளதாக நகராட்சி வட்டாரங்கள் தெரிவித்தன. இதனைத் தொடர்ந்து அனைத்து நகராட்சிகளும் இணையதள தகவல்களைப் புதுப்பிக்கும் பணியில் மும்முரமாக ஈடுபட்டுள்ளன.
