Urban News

திருச்சி, செப். 26: திருச்சி மாநகராட்சியில் ரூ.10 லட்சத்துக்கு மேற்பட்ட பணிகளுக்கான ஒப்பந்தப்புள்ளிகளை அளிக்க மாநகராட்சி அலுவலகத்துக்கு நேரில் வரத் தேவையில்லை என மாநகராட்சி ஆணையர் த.தி. பால்சாமி அறிவுறுத்தியுள்ளார். இதுதொடர்பாக அவர் வெளியிட்ட செய்திக் குறிப்பு:

மாநகராட்சியில் மதிப்பீட்டுத் தொகை ரூ.10 லட்சத்துக்கும் அதிகமாக உள்ள பணிகளை மேற்கொள்ள ஒப்பந்தப்புள்ளிகளில் கலந்துகொள்ள முன்வரும் ஒப்பந்தக்காரர்கள் ஒப்பந்தப்புள்ளி படிவங்களை இதற்கென பிரத்யேகமாக உருவாக்கப்பட்டுள்ள

ஜ்ஜ்ஜ்.ற்ய்ற்ங்ய்க்ங்ழ்ள்.ஞ்ர்ஸ்.ண்ய் என்ற இணையதளத்தில் மின்னணு முறையில் மட்டுமே அளிக்க வேண்டும்.

அதன்படி, திருச்சி மாநகராட்சியில் கடந்த 2009 ஆக. 26-ம் தேதி முதல் இணையதளத்தில் மின்னணு முறையில் ஒப்பந்தப்புள்ளிகளை ஏற்றம் செய்யும் முறை நடைமுறைப்படுத்தப்பட்டு வருகிறது.

தற்போது மேலரண் சாலை மேம்படுத்துதல், அண்ணா நகர் இணைப்புச் சாலை அமைத்தல் மற்றும் இணைப்புச் சாலைக்கான பாலம் கட்டுதல் ஆகிய பணிகளுக்கு ஒப்பந்தப்புள்ளிகள் கோரப்பட்டுள்ளன. மேலும், சிறப்புச் சாலைகள் திட்டம் 2010-11-ன் கீழ் மொத்தம் ரூ.25 கோடியில் மேற்கொள்ளவிருக்கும் சாலை மேம்படுத்தும் பணிகளுக்கு ஒப்பந்தப்புள்ளிகள் கோரப்படவுள்ளன.

இந்தப் பணிகளுக்கான மதிப்பீடுகள் அனைத்தும் ரூ.10 லட்சத்துக்கும் கூடுதலாக உள்ளதால், ஒப்பந்தப்புள்ளிகளில் கலந்து கொள்ள விரும்பும் ஒப்பந்தக்காரர்கள் இணையதளத்தில் மின்னணு முறையில் ஏற்றம் செய்த பிறகு தொழில்நுட்பத் தகுதிக்காக ஆவணங்களை ஸ்கேன் செய்து இணையதளத்திலேயே ஏற்றம் செய்யலாம். அசல் ஆவணங்களை அஞ்சல் மூலம் உரிய காலக்கெடுவுக்குள் மாநகராட்சி அலுவலகத்துக்கு அனுப்பி வைக்க வேண்டும். இதற்காக நேரில் வர வேண்டிய அவசியமில்லை.

மேலும், மாநகராட்சி வளாகத்தில் ஒப்பந்தக்காரர்கள் நேரில் வந்து சட்டத்துக்குப் புறம்பாக நடந்து கொண்டு மாநகராட்சிக்கு அவப்பெயரை ஏற்படுத்தினால் சம்பந்தப்பட்டவர்கள் மீது கடுமையான நடவடிக்கை எடுக்கப்படும்.

புதுடெல்லி, செப். 21: காமன்வெல்த் விளையாட்டு போட்டிக்காக செங்கோட்டையில் ‘தொடு திரை தகவல் மையம்’ அமைக்கப்பட்டுள்ளது. அதை மேயர் பிருத்விராஜ் சகானி நேற்று திறந்து வைத்தார்.

காமன்வெல்த் விளையாட்டு போட்டியை காண வெளிநாட்டில் இருந்து ஆயிரக்கணக்கான ரசிகர்கள் டெல்லியில் கூடுவார்கள் என்று எதிர்பார்க்கப்படுகிறது. அவர்களுக்கு தேவையான அனைத்து தகவல்களையும் எளிதில் கிடைக்க மாநகராட்சி தீர்மானித்தது. அதற்காக செங்கோட்டையில் சிறப்பு ‘தொடு திரை தகவல் மையம்’ அமைக்கப்பட்டுள்ளது. இதை மேயர் பிருத்விராஜ் சகானி நேற்று திறந்து வைத்தார்.

தொடு திரையில், டெல்லியில் காமன்வெல்த் விளையாட்டு போட்டிகள் நடக்கும் மைதானங்கள், அவை இருக்கும் இடம், அவற்றுக்கு செல்லும் வழிகள், போக்குவரத்து விவரம், இதற்கான கட்டண விவரம், ஓட்டல்கள் & கட்டண விவரங்கள், உணவு வகைகள், இரவு விடுதிகள், அங்கு இருக்கும் வசதிகள், காவல் நிலையங்கள், காப்பகங்கள், டெல்லியில் பார்க்க வேண்டிய முக்கிய இடங்கள், சுற்றுலா மையங்கள், நகரைச் சுற்றியுள்ள ஆக்ரா, ஜெய்ப்பூர் போன்ற முக்கிய நகரங்களின் வரலாறுகள், நகரில் இருக்கும் உடனடி பணம் வழங்கும் இயந்திரங்கள் (ஏடிஎம்) இருக்கும் இடம் போன்ற பல்வேறு தகவல்கள் இருக்கும்.

கம்ப்யூட்டரில் பதிவு செய்து வைக்கப்பட்டுள்ள இதில் எந்த தகவலை தெரிந்து கொள்ள விரும்பினாலும், கம்ப்யூட்டரின் திரையை தொட்டால் போதும்; அனைத்து தகவல்களும் வரிசையில் வந்து நிற்கும்.

அதுமட்டுமின்றி, வெளிநாட்டு சுற்றுலா பயணிகள் தங்களுக்கு தேவையான மொழியில் இந்த தகவல்களை தெரிந்து கொள்ளவும் வசதி செய்யப்பட்டுள்ளது. மொத்தம் 8 மொழிகளில் இந்த தகவல்களை பெறலாம். இதுபோன்று மொத்தம் 40 தகவல் மையங்கள் முக்கிய இடங்களில் அமைக்கப்படுகின்றன.