Urban News

வந்தவாசி, ஆக. 9: வந்தவாசி புதிய பஸ் நிலைய கட்டுமானப் பணிகளை விரைவில் முடிக்க நடவடிக்கை எடுக்கப்படும் என்று வந்தவாசி நகராட்சி ஆணையராக புதிதாக பொறுப்பேற்ற என்.உசேன் பாரூக் மன்னர் (படம்) கூறினார்.

திங்கள்கிழமை ஆணையராக பொறுப்பேற்ற அவர் நிருபர்களிடம் கூறியது:

வந்தவாசி நகரில் நிலவும் குடிநீர் பற்றாக்குறையை போக்க செய்யாற்றில் |10 லட்சம் செலவில் புதிய குடிநீர் கிணறு அமைக்கப்பட்டுள்ளது. கிணற்றிலிருந்து அனக்காவூர் நீரேற்று நிலையத்திற்கு குடிநீர் குழாய்கள் புதைக்கப்பட்டவுடன் இக்கிணறு பயன்பாட்டுக்கு வரும்.

வந்தவாசி 5 கண் பாலம் அருகிலிருந்து புதிய பஸ் நிலையத்திற்கு செல்ல அணுகுச் சாலை அமைப்பதற்காக அரசு புறம்போக்கு, இந்து அறநிலையத்துறை மற்றும் தனியாருக்கு சொந்தமான இடங்களை பெற நடவடிக்கை எடுக்கப்பட்டு வருகிறது. இப்பணி முடிந்தவுடன் சாலை அமைக்கும் பணி தொடங்கும் என்றார்.

ஒசூர், ஆக.5: ஒசூரில் கட்டப்பட்ட அப்பாவு பிள்ளை பேருந்து நிலையம் வியாழக்கிழமை முதல் பயன்பாட்டுக்கு வந்தது.

ஜூலை 18-ம் தேதி திறப்பு விழா நடைபெற்றது. இதில் தமிழக துணை முதல்வர் மு.க.ஸ்டாலின் பங்கேற்று பேருந்து நிலையத்தைத் தொடங்கி வைத்தார்.

ஆனால் பேருந்து நிலையம் பயன்பாட்டுக்கு வர காலதாமதமானது. இதனால் ஒசூர் நகர மக்கள் அதிருப்திக்கு உள்ளாயினர். இந்நிலையில் வியாழக்கிழமை முதல் முறைப்படி பேருந்து நிலையம் பயன்பாட்டுக்குத் திறந்து விடப்பட்டது.

தமிழகத்தின் அனைத்துப் பகுதிகளில் இருந்தும் வரும் பேருந்துகள் பேருந்து நிலையத்தின் பின் பகுதியில் நிறுத்தி வைக்கப்படுகின்றன. பெங்களூர் செல்லும் பேருந்துகள் முன்புற வழியாகச் செல்கின்றன. நகரப் பேருந்துகள் பின்னால் சென்று வெளியில் வரும் வழியில் நிறுத்தப்பட்டுள்ளன. இதைத் தொடர்ந்து சென்னத்தூர் ஊராட்சியில் செயல்பட்டு வந்த தாற்காலிக பேருந்து நிலையம் அகற்றப்பட்டது.