தினகரன் 03.02.2010
வீட்டு வசதி வாரிய அடுக்குமாடி வீடுகளுக்கு அதிரடி விலை குறைப்பு
புதுச்சேரி : புதுவை வீட்டுவசதி வாரியம், சாரம் வருவாய் கிராமம், சுதந்திர பொன்விழா நகர் திட்டப்பகுதியில் கட்டப்பட்டுள்ள 64 (எல்ஐஜி) ஒரு படுக்கை அறை கொண்ட அடுக்குமாடி வீடுகளுக்கான தோராய விலை ரூ.15 லட்சத்து 25 ஆயிரம் என அறிவிக்கப்பட்டது. விற்பனைக்கான விண்ணப்ப படிவங்களை பொது மக்களிடம் இருந்து வரவேற்கப்பட்டு, 25.11.2009 அன்று குலுக்கல் முறையில் பலருக்கு ஒதுக்கீடும் செய்யப்பட்டது. இந்த நிலையில் ஒதுக்கீடு பெற்றவர்கள் வீட்டின் விலை அதிகமாக இருக்கிறது என்றும், அதை மறுபரிசீலனை செய்து விலையை குறைத்து கொடுக்க புதுவை வீட்டுவசதி வாரிய தலைவரை கேட்டுக்கொண்டதன் பேரில், அவரது ஆணைப்படி ஒரு படுக்கை அறை கொண்ட அடுக்கு மாடி வீட்டுக்கான தோராய விலை ரூ.15 லட்சத்து 25 ஆயிரத்தில் இருந்து ரூ.10 லட்சத்து 34 ஆயிரத்து 700க்கு அதிரடி விலை குறைப்பு செய்யப்பட்டு உள்ளது.
இந்த அரிய வாய்ப்பை பயன்படுத்தி அடுக்குமாடி வீடு வாங்க விருப்பம் உள்ளவர்கள் வீட்டுவசதி வாரியத்தை அணுகி விண்ணப்ப படிவங்களை பெற்றுக் கொள்ளுமாறு கேட்டுக் கொள்ளப்படுகிறார்கள்.இத்தகவலை புதுவை வீட்டு வசதி வாரிய செயலர் குப்புசாமி தெரிவித்துள்ளார்.