Urban News

மோகனூர்: மோகனூரில் செயல்பட்டு வரும் கலவை உரப்பூங்கா, ஒருங்கிணைந்த குடிசைப்பகுதி மேம்பாட்டு திட்டப்பணிகளை, டவுன் பஞ்சாயத்து இயக்குனர் ராஜேந்திரன் ஆய்வு மேற்கொண்டார். மோகனூர் டவுன் பஞ்சாயத்தில் 2008ல் 22 லட்சம் ரூபாய் மதிப்பில் திடக்கழிவு மேலாண் திட்டம் துவக்கப்பட்டது. அத்திட்டத்தின்படி நகரில் உள்ள 15 வார்டுகளில் சேரும் குப்பைகளை சேகரித்து மக்கும் குப்பைகள், மக்காத குப்பைகள் என தரம்பிரித்து எடுக்கப்பட்டது. மக்கும் குப்பைகளை இயற்கை உரமாக மாற்றி அதை விவசாயிகளுக்கு குறைந்த விலைக்கு விற்பனை செய்யப்பட்டு வருகிறது. அதற்கு விவசாயிகளிடத்தில் நல்ல வரவேற்பு உள்ளது. மேலும், ஒருங்கிணைந்த குடிசைப்பகுதி மேம்பாட்டு திட்டம் 2008ல் செயல்படுத்தப்பட்டது.

அந்த திட்டத்தில் 161 வீடுகளுக்கு தலா 90 ஆயிரம் ரூபாய் வீதம் 1.50 கோடி ரூபாய் மானியம், தார் சாலை அமைத்தல், சமுதாயக்கூடம் கட்டுதல் உள்பட 3.93 கோடி ரூபாய் ஒதுக்கீடு செய்யப்பட்டுள்ளது. அதில், பெரும்பாலான வீடுகள் கட்டி முடிக்கப்பட்டுள்ளன. முடிக்கப்படாத வீடுகள் கட்டும் பணி முழுவீச்சில் நடந்து வருகிறது. மேலும், இரண்டு லேயர் சல்லி போடப்பட்டு சாலைப்பணியும் பாதி முடிந்துள்ளது.

இந்நிலையில், டவுன் பஞ்சாயத்துகளின் இயக்குனர் ராஜேந்திரன் மோகனூர் டவுன் பஞ்சாயத்து பகுதியில் திடீர் ஆய்வு மேற்கொண்டார். திடக்கழிவு மேலாண் திட்டத்தின் கீழ் செயல்பட்டு வரும் இயற்கை உரப்பூங்காவை ஆய்வு செய்தார். "இயற்கை உரம் தயாரிக்கும் முறை, விற்பனை செய்யும் விதம், விவசாயிகளிடம் உள்ள வரவேற்பு, சந்தை படுத்துவது குறித்து' அதிகாரிகளிடம் கேட்டறிந்தார். அதை தொடர்ந்து ஒருங்கிணைந்த குடிசைப்பகுதி மேம்பாட்டு திட்டத்தின் கீழ் கட்டப்பட்டு வரும் வீடுகளை பார்வையிட்டார்.

"வீடுகள் அனைத்தும் தரமானதாக உள்ளதாக, அரசு விதிப்படி முறையாக கட்டப்படுகிறதா என ஆய்வு செய்தார். கட்டப்படாத வீடுகளை விரைவில் கட்ட நடவடிக்கை எடுக்க வேண்டும்' என, அதிகாரிகளுக்கு உத்தரவிட்டார். ஆய்வின் போது சேலம், நாமக்கல் மண்டல டவுன் பஞ்சாயத்து உதவி இயக்குனர் ஞானசேகரன், மாவட்ட உதவி செயற்பொறியாளர் புண்ணியமூர்த்தி, செயல் அலுவலர் வெங்கடேசன், துப்புரவு ஆய்வாளர் முருகானந்தம் உள்ளிட்டோர் பங்கேற்றனர்.

மணப்பாறை, ஜன. 12: ஆளுநர் உரையில் அறிவிக்கப்பட்டுள்ள கலைஞர் வீட்டு வசதித் திட்டத்தினால், தமிழகம் அடுத்த 3 ஆண்டுகளில் கூரை வீடுகள் இல்லாத மாநிலமாக மாறும் என்றார் மாநில போக்குவரத்துத் துறை அமைச்சர் கே.என். நேரு.

மணப்பாறையில் ஞாயிற்றுக்கிழமை நடைபெற்ற முதியோர் உதவித் தொகை வழங்கும் விழாவில் பங்கேற்று, 767 பேருக்கு உதவித் தொகைகளை வழங்கி, அமைச்சர் மேலும் பேசியது:

இந்திரா நினைவுக் குடியிருப்புத் திட்டத்தின் மூலம் அனைவருக்கும் வீடு வழங்க முடியாத நிலை உள்ளது. எனவே, ஒருவருக்கு ரூ. 60,000 வீதம் 21 லட்சம் குடும்பங்களுக்கு ரூ. 1,800 கோடி மதிப்பில் கலைஞர் வீட்டு வசதித் திட்டம் செயல்படுத்தப்படும்.

இந்தத் திட்டம் நிறைவேற்றப்பட்டால் கூரை வீடுகள் இல்லாத தமிழகம் என்ற நிலை உருவாகும். தற்போது, 500 பேர் உள்ள கிராமங்களுக்கும் இணைப்புச் சாலை வழங்கலாம் என்று அறிவிக்கப்பட்டுள்ளது. மக்கள் நலனை கருத்தில்கொண்டு, திமுக அரசு பல்வேறு திட்டங்களை அறிவித்து செயல்படுத்தி வருகிறது. இந்த அரசுக்கு மக்கள் துணை நிற்க வேண்டும் என்றார் அமைச்சர் நேரு.

விழாவுக்கு மாவட்ட ஆட்சியர் தா. சவுண்டையா தலைமை வகித்தார். மாவட்ட வருவாய் அலுவலர் தட்சிணாமூர்த்தி, வட்டாட்சியர் லீலாவதி ஆகியோர் முன்னிலை வகித்தனர்.

இந்த விழாவில் முன்னாள் அமைச்சர் பேராசிரியர் க. பொன்னுசாமி, ஒன்றியக் குழுத் தலைவர்கள் செ. பன்னீர்செல்வம், கலைச்செல்வி நாகராசன், ராஜலட்சுமி வெங்கடேசன், தி.மு.க. மாவட்ட இளைஞரணி துணை அமைப்பாளர் ஆர்.ஏ. ராமசாமி, நகரச் செயலர் கீதா ஆ. மைக்கேல்ராஜ், ஒன்றியச் செயலர்கள் மொண்டிப்பட்டி எஸ். நாகராசன் உள்ளிட்ட பலர் கலந்துகொண்டனர்.