தினகரன் 07.06.2010
சேலம் மாநகராட்சியில் ரூ.27 லட்சத்தில் குப்பை தொட்டிகள்
சேலம், ஜூன் 7: சேலம் மாநகராட்சியில் திடக்கழிவு மேலாண்மை திட்டத்தின் கீழ் ரூ.27 லட்சத்தில் குப்பை வண்டிகள், குப்பை தொட்டிகள் வாங்கப்பட உள்ளது.
சேலம் மாநகராட்சியில் நான்கு மண்டலங்களிலும் 60 வார்டுகள் உள்ளன. இதில் 21 வார்டுகளில் தனியார் நிறுவனமும், மற்ற வார்டுகளில் மாநகராட்சியும் துப்புரவு பணிகளை மேற்கொள்கிறது. இந்நிலையில் துப்புரவு பணிகளை மேற்கொள்ள நவீன குப்பை தொட்டிகள், தள்ளுவண்டிகள் வாங்க முடிவு செய்யப்பட்டுள்ளது.
சேலம் மாநகராட்சியில் ஒருங்கிணைந்த குடிசைப்பகுதி குடியிருப்பு மேம்பாட்டு திட்டத்தின் கீழ் உள்கட்டமைப்பு பணிகள் செயல்படுத்தப்பட்டு வருகிறது. இதன்படி உள்கட்டமைப்பு பணிகளில் ஒரு பகுதியாக திடக்கழிவு மேலாண்மை திட்டத்தின் கீழ் ரூ.27 லட்சத்தில் 125 குப்பை அள்ளும் தள்ளுவண்டிகள், 36 இரும்பு குப்பை தொட்டிகள் வாங்க மாநகராட்சி முடிவு செய்துள்ளது.