தினகரன் 11.11.2010
ஜனவரியில் பணி முடியும் வைத்தியநாதன் மேம்பாலம் ரூ80 லட்சத்தில் புதுப்பிப்பு
தண்டையார்பேட்டை, நவ. 11: தண்டையார்பேட்டையில் உள்ள வைத்தியநாதன் மேம்பாலம் ரூ80 லட்சம் செலவில் புதுப்பிக்கப்பட்டு வருகிறது. இந்த பணிகளை மேயர் மா.சுப்பிரமணியன் நேற்று பார்வையிட்டு ஆய்வு செய்தார். பாலத்தின் பக்கவாட்டு சுவர், பாலத்தின் கீழ் அமைக்கப்பட்டு வரும் சர்வீஸ் சாலை பணிகளை அவர் பார்வையிட்டார். பின்னர் அவர் நிருபர்களிடம் கூறியது:
கடந்த 1983ல் கட்டப்பட்ட இந்த பாலம் மோசமான நிலையில் இருந்தது. பாலத்தை பலப்படுத்தவும், அழகுபடுத்தவும்
ரூ80 லட்சம் நிதி ஒதுக்கப்பட்டு மாநகராட்சி சார்பில் பணிகள் மேற்கொள்ளப்பட்டு வருகின்றன. பாலத்தின் கீழ் உள்ள ஆக்கிரமிப்புகள் அகற்றப்பட்டு தடுப்புச் சுவர் கட்டப்படும். மேலும், மழைநீர் வடிகால்வாயுடன் சர்வீஸ் சாலையும் அமைக்கப்பட உள்ளது. இந்த பணி வரும் ஜனவரிக்குள் முடிவடையும்.
பல ஆண்டுகளாக சீரமைக்கப்படாமல் உள்ள தண்டையார்பேட்டை இளைய முதலி தெரு சாலை ரூ2 கோடியே 20 லட்சம் செலவில் சிமென்ட் சாலையாக அமைக்கப்பட உள்ளது. இதற்கான பணிகள் வரும் வெள்ளிக்கிழமை தொடங்கும். இவ்வாறு மேயர் சுப்பிரமணியன் கூறினார்.