Urban News

மதுரை, நவ. 23: மாட்டுத்தாவணி பஸ் நிலையம் அருகில் ரூ.85 கோடியில் சென்ட்ரல் மார்க்கெட் கட்டுவதற்கு வேளாண் விற்பனை வாரியத்திற்கு 26 ஏக்கர் நிலம் ஒதுக்கி மாநகராட்சி நிறைவேற்றிய தீர்மானம் ரத்து செய்யப்பட்டது. இந்த மார்க்கெட்டை அவனியாபுரத்தில் அமைக்க மாநகராட்சி இடம் ஒதுக்கி உள்ளது.

மதுரை மாட்டுத்தாவணி பஸ் நிலையத்திற்கும் பூ மார்க்கெட்டுக்கும் இடையே மாநகராட்சிக்கு சொந்தமான காலி இடம் 26 ஏக்கர் உள்ளது. இதில் தமிழக அரசின் வேளாண் விற்பனை வாரியம் மூலம் ரூ.85 கோடியில் பெரிய அளவில் சென்ட்ரல் மார்க்கெட் கட்டப்படும் என அறிவிக்கப்பட்டு இருந்தது. இந்த திட்டம் அவனியாபுரத்திற்கு மாற்றம் செய்யப்பட்டுள்ளது.

இதுகுறித்து மாநகராட்சி மன்றத்தில் நிறைவேற்றப்பட்ட தீர்மானம்:

மாட்டுத்தாவணியில் தற்போது ரூ.13 கோடியில் கட்டப்பட்ட சென்ட்ரல் மார்க்கெட் செயல்பட்டு வருகிறது.

எனவே மாட்டுத்தாவணி பஸ்நிலையத்திற்கும், பூ மார்க்கெட்டுக்கும் இடையில் புதிதாக சென்ட்ரல் மார்க்கெட் அமைக்க தேவை ஏற்படவில்லை. அந்த இடத்தில் மாநகராட்சி, பொதுமக்கள் தேவைக்கு தகுந்த மாதிரி புதிய திட்டம் செயல்படுத்த பரிசீலனையில் உள்ளது.

எனவே சென்ட்ரல் மார்க்கெட் அமைக்க வேளாண் விற்பனை வாரியத்திற்கு ஒப்புதல் அளித்து கடந்த பிப்ரவரியில் நிறைவேற்றப்பட்ட மாநகராட்சி தீர்மானம் ரத்து செய்யப்படுகிறது. இந்த இடத்திற்கு பதிலாக அவனியாபுரத்திலுள்ள மாநகராட்சிக்கு சொந்தமான 11ஏக்கர் 40 சென்ட் நிலத்தில் சென்ட்ரல் மார்க்கெட் கட்ட வேளாண் விற்பனை வாரியத்திற்கு 33ஆண்டு குத்தகை அடிப்படையில் ஒதுக்கப்படுகிறது.

கூட்டத்தில் கவுன்சிலர்கள் கூறிய புகார்கள்:

அதிமுக சாலைமுத்து: மாடக்குளம் கண்மாயில் திறக்கப்பட்ட தண்ணீர் முத்துப்பட்டி கண்மாய்க்கு செல்ல முடியாமல் கால்வாயில் நிறைந்துள்ளது. இதனால் ஊருக்குள் தண்ணீர் புகுந்துள்ளது. கால்வாயில் ஆக்கிரமிப்பை அகற்ற வேண்டும்.

துணை மேயர் மன்னன்:

பொதுப்பணித்துறையினருடன் ஆலோசித்து அனைத்து கால்வாய் ஆக்கிரமிப்பையும் அகற்ற முடிவு செய்யப்பட்டுள்ளது.

மார்க்சிஸ்ட் கணேசன்:

சாலைகள் குண்டும் குழியுமாக உள்ளது. தெருக்களில் மழை நீர் தேங்குகிறது. உடனே நடவடிக்கை தேவை.

காங்கிரஸ் சிலுவை:

தெருக்களில் மக்கள் நடக்க முடியாத அளவுக்கு சாலைகள் படுமோசமாக உள்ளன. உடனடியாக பேட்ச ஒர்க் பார்த்து சீர்படுத்த வேண்டும். கொசு ஒழிப்பு மருந்து 2 மாதமாக அடிக்கவில்லை. உடனே அடிக்க வேண்டும்.

மேற்கு மண்டல தலைவர் நாகராஜன்:

பைபாஸ் ரோடு சீரமைக்கப்பட்டுள்ளதை மக்கள் வரவேற்கிறார்கள். எல்லீஸ்நகரில் மழை வெள்ளம் தேங்கி நிற்கிறது. வடிய செய்ய மாநகராட்சி நடவடிக்கை தேவை.

திமுக கவுன்சிலர் தம்பித்துரை:

எல்லீஸ்நகர் 70 அடி சாலையில் அய்யப்ப பக்தர்கள் வாகனங்கள் நிறுத்தப்படுவதால் அங்கு நடமாடும் கழிப்பறை வாகனத்தை நிறுத்த வேண்டும்.

காங்கிரஸ் கவுன்சிலர் ரெங்கம்மாள்:

என்னை மக்கள் பணியாற்ற விடாமல், எனது வார்டிலுள்ள ஒருவர் வெட்டுவேன், குத்துவேன் என தொடர்ந்து மிரட்டுகிறார். எனக்கு பாதுகாப்பு தேவை.

இவ்வாறு விவாதம் நடந்தது.