தினமணி 20.04.2010
வைத்தியநாதன் மேம்பாலம் ரூ. 2 கோடியில் புதுப்பிப்பு: மேயர்
சென்னை, ஏப். 19: சென்னை தண்டையார்பேட்டையில் உள்ள வைத்தியநாதன் மேம்பாலம் ரூ. 2 கோடியில் புதுப்பிக்கப்படும் என்று மேயர் மா. சுப்பிரமணியன் கூறினார்.
சென்னை மாநகராட்சி மின்துறை சார்பில், வைத்தியநாதன் மேம்பாலம் அருகில் அமைக்கப்பட்டுள்ள 575 புதிய, தெரு மின்விளக்குகள் இயக்கி வைக்கும் விழா சென்னையில் திங்கள்கிழமை நடைபெற்றது. இதில் பங்கேற்று மின் விளக்குகளை இயக்கி வைத்த மேயர் மா. சுப்பிரமணியன் பேசியது:
வைத்தியநாதன் மேம்பாலம் மற்றும் அருகில் உள்ள பகுதிகளில் ரூ. 98.10 லட்சம் செலவில் 575 தெரு மின் விளக்குகள் அமைக்கப்பட்டுள்ளன. இந்த ஆண்டு ரூ. 1.50 கோடி செலவில் புதிதாக 1000 தெரு மின் விளக்குகள் அமைக்கப்படும். இதுபோல் 50 கி.மீ. நீளத்துக்கு ரூ. 1.75 கோடி செலவில் புதிய மின்வடங்களும் அமைக்கப்பட உள்ளன.
30 ஆண்டுகளுக்கு மேல் பழமைவாய்ந்த வைத்தியநாதன் மேம்பாலத்தில் தினமும் ஆயிரக்கணக்கான கனரக வாகனங்கள் செல்கின்றன. இதனால் பாலம் பாதிப்படைந்துள்ளது. எனவே,ரூ. 2 கோடி செலவில் மேம்பாலம் பலப்படுத்தப்பட்டு, சுற்றுச்சுவர் சீரமைக்கும் பணி விரைவில் தொடங்கும் என்றார்.
