தினமலர் 26.04.2010
தேனி புதுபஸ்ஸ்டாண்ட் ரூ.16 கோடி மதிப்பீடு
தேனி : தேனியில் புதிய பஸ் ஸ்டாண்ட் அமைக்க பதினாறு கோடி ரூபாயில் திட்ட மதிப்பீடு தயாரிக்கப்பட்டுள்ளது.தேனியில் தற்போதுள்ள பஸ்ஸ்டாண்டில் இட நெருக்கடியால் பயணிகளும், பஸ் டிரைவர்களும் அவதிப்பட்டு வருகின்றனர். நகரின் விரிவாக்கம், மற்றும் இட நெருக்கடியை கருத்தில் கொண்டு தேனி மதுரை ரோட்டில் சிட்கோ பின் பகுதியில் உள்ள வனத்துறைக்கு சொந்தமான இடத்தில் புதிய பஸ்ஸ்டாண்ட் அமைக்க திட்டமிடப்பட்டது.இதற்காக 7.35 ஏக்கர் நிலம் வனத்துறையிடம் இருந்து பெறப்பட்டுள் ளது. பஸ் ஸ்டாண்ட் வரை படம் தயாரிக்கப்பட்டு 16 கோடி ரூபாயில் திட்ட மதிப்பீடு தயாரிக்கப்பட் டுள்ளது.
தமிழ்நாடு நகர்ப்புற உள்கட்டமைப்பு நிதி வசதி கழகத்திடம் இருந்து நிதி பெறுவதற்காக சென்னை நகராட்சிகளின் நிர்வாக இயக்குனர் அலுவலகம் மூலம் நடவடிக்கை எடுக்கப்பட்டுள்ளது. இந்நிலையில் புதிய பஸ்ஸ்டாண்ட் அமைய உள்ள இடத்தில் மண் தரம் குறித்து மண் பரிசோதனை நடந்து வருகிறது.
