Urban News

பல்லடம் பேருந்து நிலையம் விரிவாக்கப் பணிக்கான பூமி பூஜை திங்கள்கிழமை நடைபெற்றது.

பல்லடம் நகராட்சி அறிஞர் அண்ணா மத்திய பேருந்து நிலையம் ரூ.1கோடியே 60 லட்சம் மதிப்பில் விரிவாக்கம் செய்யப்படவுள்ளது.

 இதற்கான பூமி பூஜை நிகழ்ச்சிக்கு  பல்லடம் சட்டப்பேரவை உறுப்பினர் கே.பி.பரமசிவம் தலைமை வகித்தார். நகராட்சி தலைவர் பி.ஏ.சேகர், துணைத்தலைவர் வைஸ் பி.கே.பழனிசாமி ஆகியோர் முன்னிலை வகித்தனர். நகராட்சி ஆணையாளர் பன்னீர்செல்வம் வரவேற்றார். அரசு கேபிள் டிவி வாரிய தலைவர் கே.ராதாகிருஷ்ணன் பூமி பூஜை நடத்தி பணிகளை துவக்கி வைத்தார்.

இவ்விழாவில் மாவட்ட ஊராட்சித் தலைவர் எம்.சண்முகம், நகராட்சி கவுன்சிலர்கள் அம்சவேணி, கிருஷ்ணகுமார், தர்மராஜ், குப்புராஜ் உள்பட பலர் பங்கேற்றனர்.

சென்னையில் உள்ள பூங்காக்களுக்கு தண்ணீர் விடும் பணிக்காக 10 தண்ணீர் லாரிகளை சென்னை மாநகராட்சி கொள்முதல் செய்துள்ளது.

மேலும் கட்டட இடிபாடுகளை அகற்றுவதற்காக 11 பொக்லைன் இயந்திரங்களும் கொள்முதல் செய்யப்பட்டுள்ளன.

இது குறித்து மாநகராட்சி புதன்கிழமை வெளியிட்ட செய்தி: சென்னை மாநகராட்சி விரிவாக்கப் பகுதிகளில் சேரும் கட்டட இடிபாடுகளை அகற்றும் பணிக்காக 11 பொக்லைன் இயந்திரங்களை ரூ. 2.13 கோடியில் மாநகராட்சி கொள்முதல் செய்துள்ளன.

இதேபோல, மாநகராட்சியால் பராமரிக்கப்படும் பூங்காக்களுக்கு தண்ணீர் விடும் பணிக்கு 10 கனரக தண்ணீர் லாரிகள் ரூ. 1.90 கோடியில் கொள்முதல் செய்யப்பட்டுள்ளன.

இந்த வாகனங்களின் மொத்த மதிப்பு சுமார் ரூ.4.03 கோடி ஆகும். இவற்றை பொதுமக்கள் பயன்பாட்டுக்காக மேயர் சைதை துரைசாமி மற்றும் ஆணையர் விக்ரம் கபூர் ஆகியோர் தொடங்கி வைத்தனர் என்று அந்த செய்திக் குறிப்பில் தெரிவிக்கப்பட்டுள்ளது.