Urban News

வேலூர்,நவ.22: வேலூர் பாலாற்றங்கரையில் தியான மண்டபம் உட்பட அனைத்து வசதிகளுடன் ரூ1 கோடியில் கட்டப்பட்டுள்ள நவீன எரிமேடை விரைவில் திறப்பதற்கான ஏற்பாடுகள் நடந்து வருகிறது.

வேலூர் பாலாற்றங்கரையில் மாநகராட்சிக்கு சொந்தமான மயான தகனமேடை இருந்து வந்தது. விறகுகளால் எரியூட்டும்போது ஏற்படும் சுற்றுசூழல் பாதிப்பை போக்கும் வகையில், நவீன எரிமேடை அமைக்க அரசு நடவடிக்கை எடுத்தது.

அதன்படி மாநில அரசு மற்றும் மாநகராட்சி சேர்ந்து ரூ46 லட்சம் செலவில் நவீன எரிமேடை அமைப்பதற்கான பணிகள் கடந்த 3 ஆண்டுகளுக்கு முன் தொடங்கியது. அனைத்து பணிகளும் 6 மாதத்தில் முடிக்கப்படும் என அறிவிக்கப்பட்டிருந்தது.

ஆனால் காண்டிராக்டர் பணிகளை விட்டு சென்றதால் கட்டிட பணிகளில் தொய்வு ஏற்பட்டது. தொடர்ந்து பல கட்டங்களாக கூடுதல் கட்டிட பணிகள் மேற்கொள்ளப்பட்டது. அதன்படி சுற்றுசுவருடன் கூடிய நவீன எரிமேடை, தியான மேடை ஆகியவற்றுடன் கூடுதலாக ஒரு அறை, குளியலறை மற்றும் கழிவறை, சிற்பங்களுடன் கூடிய முன்மண்டபம் என இப்போது சுமார் ரூ1 கோடி மதிப்புள்ள கட்டுமான பணிகள் மேற்கொள்ளப்பட்டுள்ளன.

எரிமேடையின் முன்பு நீரூற்றுடன் கூடிய அழகிய பூங்காவும் அமைக்கப்பட உள்ளது. மொத்தத்தில் 90 சதவீத பணிகள் முடிவடைந்து விட்டன. நவீன எரிமேடையில் விறகு கட்டைகளை எரித்து அதில் இருந்து கிடைக்கும் காஸ் பயன்படுத்தி எரியூட்டப்பட உள்ளது.

இதற்கான காஸ் பர்னர் மற்றும் மோட்டார் ஆகியவையும் வந்து விட்டது. அவற்றை பொருத்தி சோதனை ஓட்டம் செய்யப்படுகிறது. இந்த மாதத்துக்குள் அனைத்து பணிகளையும் முடித்து விரைவில் நவீன எரிமேடையை திறப்பதற்கான ஏற்பாடுகள் தீவிரமாக நடந்து வருகிறது.

கோவை : பாதாளச் சாக்கடை திட்டப் பணிகளை துரிதப்படுத்துவது தொடர்பான அனைத்துக்கட்சி ஆலோசனைக் கூட்டம், மாநகராட்சி அலுவலகத்தில் மேயர் வெங்கடாசலம் தலைமையில் நேற்று நடந்தது.

கூட்டத்தில், பாதாளச் சாக்கடை திட்டத்தை மேம்படுத்துவது, பணிகளைத் துரிதப்படுத்துவது குறித்து விவாதிக்கப்பட்டது. இது குறித்து மேயர் வெங்கடாசலம் கூறியதாவது:பாதாளச் சாக்கடை திட்டத்தை மேம்படுத்துவது மற்றும் துரிதப்படுத்துவது குறித்த அனைத்துக்கட்சி ஆலோசனைக்கூட்டம் நடந்தது. இதில், பாதாளச்சாக்கடை திட்டத்தில் உள்ள குறைகள், அவற்றை எப்படி நிவர்த்தி செய்வது; பொதுமக்களுக்கு இடையூறு இல்லாத விதத்தில் பணிகளை மேற்கொள்வது; அனைத்துப்பகுதிகளிலும் ஒரே சமயத்தில் பணிகளை மேற்கொண்டால், இடையூறு ஏற்படும் என்பதால், பகுதி பகுதியாக பிரித்து ஒவ்வொரு இடமாக பணிகளைச் செய்வது; பணிகளை துவங்கி துரிதமாக முடிப்பதற்கான ஆயத்தம் செய்வது; போக்குவரத்துக்கு இடையூறு இல்லாமல் பாதாளச்சாக்கடை கட்டுமானப் பணி மேற்கொள்வது குறித்து விவாதிக்கப்பட்டது.குழி தோண்டும் போது, குவிக்கப்படும் மண்ணை, காலியாக உள்ள தனியார் "சைட்'களில் குவித்து வைத்து, "விரைவில் அப்புறப்படுத்தப்படும்' என தகவல் பலகையை அங்கு வைப்பது; சேறும் சகதியுமான இடங்களில், சேறை அப்புறப்படுத்திவிட்டு, கிணத்துமண் போட்டு சமப்படுத்துவது உள்ளிட்ட ஆலோசனைகள் மேற்கொள்ளப்பட்டன, என்றார்.