Urban News

சென்னை, நவ. 2: சைதாப்பேட்டையில் ரூ4 கோடியில் 100 படுக்கை வசதியுடன் கட்டப்பட்டு வரும் மாநகராட்சி மருத்துவமனை ஜனவரி மாதம் திறக்கப்படும் என்று மேயர் கூறினார்.

சென்னை மாநகராட்சி சார்பில் சைதாப்பேட்டை, ஜீனிஸ் சாலையில் கட்டப்பட்டு வரும் நவீன மருத்துவமனை கட்டிட பணியை மேயர் மா.சுப்பிரமணியன் நேற்று நேரில் ஆய்வு செய்தார். பின்னர் அவர் நிருபர்களிடம் கூறியதாவது:

சென்னையில் 2006ம் ஆண்டு சைதாப்பேட்டை, பெருமாள்பேட்டை ஆகிய 2 மாநகராட்சி மருத்துவமனைகளில் மட்டுமே 24 மணி நேர மகப்பேறு சேவை அளிக்கப்பட்டு வந்தது. தற்போது 10 மண்டலங்களிலும் 24 மணி நேர மகப்பேறு சேவை விரிவுபடுத்தப்பட்டுள்ளது. வரும் டிசம்பர் மாதம் அடையாறு, கோடம்பாக்கம் மண்டலங்களில் புதிதாக மகப்பேறு மருத்துவமனைகள் திறக்கப்படும்.

சைதாப்பேட்டை ஜீனிஸ் சாலையில் மகப்பேறு மருத்துவமனை அருகில், மாநகராட்சி சார்பில் தரைத்தளத்துடன் 3 மாடிகள் கொண்ட புதிய மருத்துவமனை கட்டப்பட்டு வருகிறது.

இது 1,995 சதுடி அடி கொண்டது. புதிய மருத்துவமனையில் ஆலோசனை கூடம், பரிசோதனை கூடம், ஆய்வுக்கூடம், கலந்தாய்வுக்கூடம், மருந்தகம், காத்திருக்கும் அறை, அறுவை சிகிச்சை அரங்கு போன்ற பல்வேறு வசதிகளும் இருக்கும்.

இந்த மருத்துவமனையின் பின்புறம் தரைத்தளத்துடன் 3 மாடி கட்டிடம் 21,587 சதுர அடியில் இணைப்பு கட்டிடம் கட்டப்படுகிறது. இதில் பொதுப்பிரிவு, சிகிச்சை அறை, மருத்துவர்கள் அறை என பல்வேறு நவீன வசதிகள் இருக்கும். மொத்தம் 32,582 சதுர அடியில் ரூ4 கோடி செலவில் இந்த மருத்துவமனை கட்டப்படுகிறது. இந்த பிரமாண்டமான மாநகராட்சி மருத்துவமனை வரும் ஜனவரி மாதம் திறக்கப்படும். இவ்வாறு மேயர் மா.சுப்பிரமணியன் கூறினார். ஆய்வின்போது மண்டல குழு தலைவர் தனசேகரன், கவுன்சிலர் மகேஷ்குமார் உடன் இருந்தனர்.

சைதாப்பேட்டை ஜீனிஸ் சாலையில் மாநகராட்சி சார்பில் உருவாகும் நவீன மருத்துவமனை கட்டிடப் பணிகளை மேயர் மா.சுப்பிரமணியன் நேற்று ஆய்வு செய்தார். அருகில், மண்டல குழு தலைவர் க.தனசேகரன், கவுன்சிலர் மகேஷ்குமார்.

நாகர்கோவில், அக்.31:நாகர்கோவில் நகராட்சியில் பாதாள சாக்கடைத் திட்டத்தை செயல்படுத்த 76.04 கோடி ஒதுக்கீடு செய்யப்பட்டுள்ளது.

நாகர்கோவிலில் வெள்ளிக்கிழமை நடைபெற்ற நகர்மன்றக் கூட்டத்தில் இது தொடர்பான தீர்மானம் நிறைவேற்றப்பட்டது.

நகராட்சிப் பகுதியில் செயல்படுத்தப்படவுள்ள இத்திட்டத்துக்கு 76.04 கோடி மதிப்பீட்டில் தமிழ்நாடு குடிநீர் வடிகால் வாரியத்தால் திட்ட மதிப்பீடு தயார் செய்யப்பட்டு நிதி ஒதுக்கீடு செய்ய கடந்த 16.9.2010-ல் ஒப்புதல் வழங்கப்பட்டுள்ளது.

கடந்த 27.9.2010-ம் தேதி நடைபெற்ற மாநில அளவிலான 7-வது ஒப்பளிப்பு கமிட்டிக் கூட்டத்தில் இத்திட்டத்துக்கான நிதி விடுவிப்பு செய்ய தீர்மானம் இயற்றப்பட்டுள்ளது.

அதில் மத்திய அரசு 80 சதவிகிதம் நிதியாக 52.45 கோடியும், மாநில அரசு 10 சதவிகிதம் நிதியாக 6.55 கோடியும், நகராட்சி 10 சதவிகிதம் நிதியாக 6.55 கோடியும் என்று மொத்தம் 65.56 கோடி நிதி ஒதுக்கீடு செய்யப்பட்டுள்ளது.

மீதமுள்ள தொகையை நகராட்சியே செலவிட வேண்டும். இது தொடர்பாக நகர்மன்றக் கூட்டத்தில் கொண்டுவரப்பட்ட தீர்மானம் உறுப்பினர்களின் விவாதங்களுக்கு இடையே நிறைவேற்றப்பட்டது.

இது தொடர்பாக நகர்மன்றத் தலைவர் அசோகன் சாலமன் கூறியதாவது:

பாதாள சாக்கடைத் திட்டத்துக்கு மத்திய அரசு 80 சதவிகிதமும், மாநில அரசு 10 சதவிகிதமும் மானியமாக வழங்குகின்றன. நகரில் 21 வார்டுகளில் முழுமையாகவும், 19 வார்டுகளில் பகுதியாகவும் இத்திட்டப் பணிகள் மேற்கொள்ள திட்டமிடப்பட்டுள்ளது. இத்திட்டத்தின் கீழ் வலம்புரிவிளை நகராட்சி உரக்கிடங்கு அமைந்துள்ள இடத்தில் சுத்திகரிப்பு நிலையம் அமைக்க 5 ஏக்கர் நிலம் ஒதுக்கித்தர வேண்டியுள்ளது என்றார் அசோகன் சாலமன்.