Urban News

கரூர், அக்.29: உப்பிடமங்கலம் பேரூராட்சியில் அண்ணா மறுமலர்ச்சி திட்டத்தில் ரூ54 லட்சம் மதிப்பில் பணிகள் நிறைவேற்றப்பட்டுள்ளதாக கலெக்டர் உமாமகேஸ்வரி தெரிவித்தார்.

கரூர் மாவட்டம், உப்பிடமங்கலம் பேரூராட்சியில் அனைத்து பேரூராட்சி அண்ணா மறுமலர்ச்சித் திட்டத்தின்கீழ் (2009&2010) ரூ10 லட்சம் மதிப்பில் புதிய வணிக வளாகக் கட்டடத் திறப்புவிழா நேற்று நடைபெற்றது. உப்பிடமங்கலம் பேரூராட்சி துணைத் தலைவர் மனோகரன் வரவேற்றார். கரூர் கலெக்டர் உமாமகேஸ்வரி புதிய கட்டடத்தைத் திறந்து வைத்து குத்துவிளக்கேற்றி பேசுகையில், உப்பிடமங்கலம் பேரூராட்சியில் 2009&2010ம் ஆண்டில் அனைத்து பேரூராட்சி அண்ணா மறுமலர்ச்சித் திட்டத்தின்கீழ் மொத்தம் 10 பணிகள் நிறைவேற்றப்பட்டுள்ளது. இவற்றின் மொத்த மதிப்பு ரூ54 லட்சத்து 6 ஆயிரம். இத்திட்டத்தின்கீழ் 5வது வார்டு லட்சுமணம்பட்டியில் தார்சாலை ரூ.10 லட்சம் மதிப்பில் அமைக்கப்பட்டுள்ளது. உப்பிடமங்கலம் வாரச்சந்தையில் பஸ் நிறுத்தம் அருகில் ரூ13 லட்சம் மதிப்பில் சமுதாயக்கூடம், பேரூராட்சி அலுவலகம் ரூ.5 லட்சம் மதிப்பில் கட்டி முடிக்கப்பட்டுள்ளது. 7வது வார்டு புகையிலைகுறிச்சியானூர் ஆதிதிராவிடர் தெருவில் ரூ2.76 லட்சம் மதிப்பில் சிமென்ட் தளம், 14வது வார்டு லிங்கத்தூர் ஆதிதிராவிடர் தெருவில் ரூ2.34 லட்சத்தில் சிமென்ட் தளம் அமைக்கப்பட்டுள்ளது. உப்பிடமங்கலம் பஸ் நிறுத்தம் அருகில் ரூ.10லட்சம் மதிப்பில் புதிய வணிக வளாகக் கட்டடம் கட்டப்பட்டு இன்று திறக்கப்பட்டுள்ளது.

13வது வார்டில் உள்ள மயானத்தை ரூ.5லட்சம் மதிப்பில் மேம்படுத்தப்பட்டுள்ளது. 10வது வார்டு புதுக்கஞ்சமனூர் ஆதிதிராவிடர் தெருவில் ரூ2.10லட்சத்தில் சிமென்ட் தளம் உள்ளிட்ட 10 பணிகள் ரூ54.6 லட்சத்தில் பணிகள் முடிக்கப்பட்டு மக்கள் பயன்பாட்டிற்கு வந்துள்ளது என்றார். விழாவில் தொலை பேசி ஆலாசனைக் குழு உறுப்பினர் நன்னியூர் ராஜேந்திரன், உப்பிடமங்கலம் பேரூராட்சித் தலைவர் ராஜலிங்கம், தாந்தோணி ஊரா ட்சி ஒன்றியக்குழு துணைத்தலைவர் ரகுநாதன், பேரூரா ட்சி உறுப்பினர்கள் மற்றும் பலர் கலந்து கொண்டனர். முடிவில் பேரூராட்சி செயல் அலுவலர் பெரியசாமி நன்றி கூறினார்.

புதுடெல்லி, அக். 29: காமன்வெல்த் போட்டியின்போது, ரூ.16,000 கோடி செலவில் மேம்படுத்தப்பட்ட உள்கட்டமைப்புகளை பாதுகாப்பதற்காக சிறப்பு ஒருங்கிணைப்புக் குழுவை முதல்வர் ஷீலா தீட்சித் நியமித்துள்ளார்.

காமன்வெல்த் போட்டியின்போது ரூ.16,000 கோடி செலவில் புதிய மைதானங்கள், சாலைகள், நடைபாதைகள், மேம்பாலங்கள், புல்வெளிகள், ஏற்கனவே இருக்கும் மைதானங்கள் புதுப்பிப்பு, தெரு விளக்குகள் என்று பல்வேறு பணிகள் செய்யப்பட்டன. புதிதாக மேம்படுத்தப்பட்ட இந்த உள்கட்டமைப்புகளை பாதுகாப்பது தொடர்பாக முதல்வர் ஷீலா தீட்சித் தலைமையில் உயர்நிலைக் குழு கூட்டம் நடைபெற்றது.

இதில் மாநகராட்சி, நகராட்சி கவுன்சில், பொதுப்பணித்துறை, மத்திய நகர்ப்புற மேம்பாட்டுத்துறை உள்ளிட்ட அமைப்புகளின் பிரதிநிதி கலந்து கொண்டனர். இந்த கூட்டத்தில் முதல்வர் பேசியதாவது:

ரூ.16,000 கோடி செலவில் மேம்படுத்தப்பட்ட உள்கட்டமைப்புகளை பாதுகாக்க சிறப்பு ஒருங்கிணைப்புக் குழு நியமிக்கப்பட்டுள்ளது. இக்குழு உள்ளாட்சி அமைப்புகள் மற்றும் மத்திய அரசு துறைகளுடன் ஒருங்கிணைந்து செயல்பட்டு உள்கட்டமைப்புகளை பாதுகாக்கும் பணியை மேற்கொள்ளும். மாநில அரசின் தலைமைச் செயலாளர் ராகேஷ் மேத்தா தலைமையில் இக்குழு செயல்படும்.

காமன்வெல்த் போட்டியின்போது, புதிய உள்கட்டமைப்புகளை பாதுகாக்க எந்த அளவுக்கு கவனம் செலுத்தப்பட்டதோ, அதே அளவுக்கு தொடர்ந்து இவற்றை பாதுகாப்பதில் உள்ளாட்சி அமைப்புகள் மற்றும் மத்திய அரசு துறைகளின் பிரதிநிதிகள் கவனம் செலுத்த வேண்டும்.

நகரை சுத்தமாக வைத்திருக்கு உள்ளாட்சி அமைப்புகள் அதிக கவனம் செலுத்த வேண்டும். குறிப்பாக சாலைகளை சுத்தமாக வைத்திருக்க வேண்டும். இதேபோல் மைதானங்கள், தெரு விளக்குகள், குறியீடுகள், பஸ் நிறுத்த நிழற்குடைகள், புல்வெளிகள், மேம்பாலங்கள், நடைமேம் பாலங்கள் ஆகியவற்றை பாதுகாக்க வேண்டும். அப்போதுதான் நகரின் அழகு தொடர்ந்து பாதுகாக்கப்படும்.

இதேபோல் உள்கட்டமைப்புகளில் ஏதேனும் பழுது ஏற்பட்டிருப்பதாக தகவல் வந்தால் உடனடியாக அவற்றை சரி செய்ய உள்ளாட்சி அமைப்புகள் நடவடிக்கை எடுக்க வேண்டும்.

புதிதாக அமைக்கப்பட்டுள்ள சிறப்பு குழுவினர் ஒவ்வொரு மாதமும் கூட்டம் நடத்தி பணிகளை கண்காணிக்க வேண்டும்.

பாதாள ரயில் நிலையங்கள் மற்றும் சாலைகளின் சுத்தப் பணியை மெட்ரோ ரயில் நிறுவனமும், போலீசாரும் மேற்கொள்ள வேண்டும். சாலைகளில் செயல்படாத சிக்னல் விளக்குகள், பயன்படாத இரும்பு தடைகளை அகற்ற போலீசார் நடவடிக்கை எடுக்க வேண்டும்.

இவ்வாறு முதல்வர் ஷீலா தீட்சித் பேசினார்.